«Այդ ձևաչափը թույլ չի տալիս, որ իրավիճակը վերածվի պատերազմի». Շավարշ Քոչարյան

ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի կարծիքով՝ ԼՂ հիմնախնդրի լուծման ներկայիս ձևաչափը նպաստում է, որպեսզի զինադադարի մասին համաձայնագիրը չվերածվի ռազմական գործողությունների: Այսօր կառավարությունում լրագրողների հետ ճեպազրույցի ժամանակ Կասպրշիկի տեսակետը փոխանցեց Հայաստանի արտաքին գործերի փոխնախարար Շավարշ Քոչարյանը: 

Նա նշեց, որ բանակցային գործընթացում առաջընթաց ակնկալելը դժվար է, քանի դեռ Ադրբեջանը նման պահվածք է դրսևորում:

«Բայց պետք է հաշվի առնել, որ այդ ձևաչափն իր ներդրումն ունի այս ոչ պատերազմ, ոչ խաղաղություն իրավիճակը պահպանելու հարցում, թույլ չի տալիս, որ իրավիճակը վերածվի պատերազմի»,- նշեց Շավարշ Քոչարյանը:

Նա նշեց, որ այս փուլում խնդիրը վերաբերում է այն սկզբունքների համաձայնեցմանը, որոնք հրապարակված են: Փարիզում Հայաստանի և Ադրբեջանի արտգործնախարարների՝ հունվարի 24-ին կայացած հանդիպումն ըստ էության որևէ որակական փոփոխություն, ըստ Շավարշ Քոչարյանի, չի հաղորդել բանակցային գործընթացին:

«Կա միայն մեկ բան՝ դա ձգտումն է միջազգային հանրության, միջնորդների՝ Ադրբեջանին կառուցողական դաշտ բերել: Մի կողմից ակնհայտ է, որ Ադրբեջանն ավելի շատ բանակցային գործընթացն օգտագործում է որպես քող՝ իր քարոզչությունն առաջ տանելու համար: Մյուս կողմից, միջնորդ երկրները չեն ցանկանում, որպեսզի վերսկսվեն ռազմական գործողությունները: Բանակցությունները նաև դրա համար են»,- ընդգծեց փոխնախարարը:

Նա նշեց, որ սխալ կլինի միջնորդներից պահանջել, որպեսզի հասցեական հայտարարություններ անել, թե որ երկիրն է խախտում հրադադարի ռեժիմը, դիվերսիա անում:  

«Բայց ես համաձայն եմ, որ եթե դա միջնորդը չի կարող անել, ապա միջազգային կառույցները դա պարտավոր են անել: Այդ ուղղությամբ մենք աշխատում ենք, հուսով եմ, որ վերջիվերջո միջազգային կառույցները շատ ավելի հստակ և հասցեավորված կխոսեն նմանատիպ գործողությունների մասին»,- ասաց Քոչարյանը:

Արտաքին գործերի փոխանախարարն անդրադարձավ նաև այն հարցին, թե ինչո՞ւ է Հայաստանը շտապողականություն ցուցաբերում Մաքսային միությանը միանալու հարցում:

Նա հիշեցրեց, որ շուտով նախատեսվում է ստորագրել համաձայնագիր Եվրասիական միության ձևավորման մասին:

«Հենց սկսի գործել գործել Եվրասիական միությունը, որպես կազմակերպություն Մաքսային միությունը և ընդհանուր տնտեսական տարածքն էության տարրալուծվելու են դրա մեջ: Եթե դու դանդաղում ես, կարող ես դառնալ անդամ մի կազմակերպության, որն ըստ էության չկա»,- ասաց նա՝ հավելելով, որ Հայաստանի նպատակն է դառնալ Եվրասիական միության անդամ:

© Medialab.am