Ռուսաստանի նախագահ Վլադիմիր Պուտինն այսօր հրավիրած ասուլիսում հայտարարել էր, որ Ղրիմի տարածք ռուսական զորքեր մտցնելու անհրաժեշտություն չկա:
Ըստ Պուտինի՝ Ռուսաստանը չի դիտարկում Ղրիմը ՌԴ-ին միացնելու հնարավորությունը:
Անկախ քաղաքական վերլուծաբան Երվանդ Բոզոյանը Պուտինի այս հայտարարությունը զարմանալի չի համարում: Ըստ Բոզոյանի՝ ՌԴ նախագահը նման հայտարարություն արեց, քանի որ չէր կարող հայտարարել այլ բան:
«Ցանկացած ինքնորոշում պետք է գա այն տարածքից, որտեղ այդ ժողովուրդն ուզում է ինքնորոշվել: Ֆորմալ իմաստով Պուտինը երբեք չի հայտարարի, որ Ղրիմը կմիացնի Ռուսաստանին: Եթե նույնիսկ այդպիսի որոշում կայացվի, ապա դա կկատարվի Ղրիմի ժողովրդի ինքնորոշման արդյունքում: Այսինքն՝ այստեղ ձևակերպել, որ Պուտինը նման բան է հայտարարել, նշանակում է՝ զորք չի մտցնի, դա չի նշանակում, որ այդ զորքը հաստատ չի մտցնի»,- «Մեդիալաբին» ասում է Երվանդ Բոզոյանը:
ՌԴ նախագահը Ղրիմ զորք չի մտցնի նաև այն պատճառով, որ, ըստ վերլուծաբանի, տեղական մակարդակով Ղրիմի իշխանությունները կարողացան չեզոքացնել ներկայիս կենտրոնական Կիևի իշխանության զինված ուժերի հնարավոր մանևրը, և ըստ էության այնտեղ գործընթացը Ղրիմի իշխանությունների վերահոսկողության տակ է:
Այս պայմաններում, բնականաբար, զորք Ղրիմ ռուսական մտցնելու անհրաժեշտություն արդեն չկա:
«Պուտինն այս պայմաններում ավելի հանգիստ կարող է հայտարարել, որ ինքը զորք մտցնելու խնդիրր չունի: Այս փուլում ես չեմ կանխատեսում, թե Ռուսաստանը զորք կմտցնի, իհարկե, եթե կենտրոնական իշխանությունները չճնշեն Արևելյան Ուկրաինայի ռուսալեզու բնակիչներին»,- ասում է նա
Վերլուծաբանի խոսքով՝ այս փուլում Մոսկվան ոչ թե ուզում է Ուկրաինայի մարզերն անջատել կենտրոնական իշխանությունից, այլ փորձում է այդ երկրի տարածքի վրա ձևավորել երկրորդ Ուկրաինա` Արևելյան Ուկրաինա, ինչը արեց Ղրիմի դեպքում:
Դա նշանակում է, որ դրա հետևանքով Ուկրաինան կարող է բաժանվել երկու մասին:
«Եթե այդ քաղաքականությունը վարելու ընթացքում զինված բախում լինի Արևմտյան Ուկրաինայի կողմից, այդ ժամանակ արդեն հնարավոր է Պուտինը զորք մտցնի Ուկրաինա»,- նշում է նա:
Հարցին, թե այդ իրադարձություններն ի՞նչ ազդեցություն կունենան մեր տարածաշրջանի՝ մասնավորապես Հայաստանի վրա, Բոզոյանը պատասխանում է, որ այս պահին ուղղակի ազդեցություն թեև չկա, սակայն ֆոնային մակարդակով կարող է ազդել:
Եթե լարվեն իրադարձություններն այդ տարածաշրջանում, բնականաբար կլարվեն նաև ռուս-ամերիկյան հարաբերությունները և ընդհանրապես Ռուսաստանի հարաբերություններն Արևմուտքի հետ:
«Իսկ Ռուսաստանն ու Արևմուտքն այսօր աշխատում են ԵԱՀԿ Մինսկի խմբում, և եթե հակասությունը տեղափոխվի Լեռնային Ղարաբաղի հիմնախնդրի կարգավորման դաշտ, ապա դա կբերի նրան, որ լարվածություն կառաջանա նաև մեր տարածաշրջանում»,- կարծում է վերլուծաբանը:
Ուկրաինայում ընթացող զարգացումների ֆոնին Հայաստանի իշխանությունները լռություն են պահպանում և որևէ հայտարարությամբ հանդես չեն եկել: Միայն առանձին պաշտոնյաներ բացառել են Հայաստանում Մայդանի կրկնությունը:
Երվանդ Բոզոյանն ասում է, որ տվյալ դեպքում ըմբռնումով է վերաբերվում Հայաստանի իշխանությունների լռությանը՝ նշելով, որ այս իրավիճակում հայտարարություններ անելը բավականի բարդ է:
«Ուկրաինայում տեղի ունեցածը Ռուսաստանի և Արևմուտքի միջև բախում է, այդ բախման պարագայում, եթե Հայաստանն արձագանքի և աջակցի Կիևի ներկայիս կենտրոնական իշխանություններին, ապա անխուսափելիորեն կփչացնի հարաբերությունները Ռուսաստանի հետ: Եթե պաշտպանի Ռուսաստանի տեսակետը, կփչացնի հարաբերությունները Արևմուտքի հետ»,- նշում է Բոզոյանը:
Նրա խոսքով՝ հասկանալի է, որ այսօր Հայաստանին շահավետ չէ փչացնել հարաբերությունները ոչ Արևմուտքի, ոչ Ռուսաստանի հետ:
«Այդ իմաստով միգուցե կարելի է այնպիսի տեսակետ հայտնել, որ այդ տեսակետի մեջ չլինի կոնկրետ տեսակետ: Կոնկրետ այս պահին, եթե մեր իշխանությունները ձայն չեն հանում, ես կարող եմ ըմբռնումով մոտենալ իրենց»,- ասում է Երվանդ Բոզոյանը:
Տեղեկացնենք, որ Հայաստանում ստեղծված Մայդանի համերաշխության կոմիտեն, որի կազմում ընդգրկված են մարդու իրավունքների պաշտպաններ, քաղաքական-հասարակական գործիչներ երեկ տարածած հայտարարության մեջ «ոչ արժանապատիվ» է որակել Հայաստանի իշխանությունների լռությունը:
«Մենք դատապարտում ենք Հայաստանի իշխանությունների ոչ արժանապատիվ լռությունը Ուկրաինայի դեմ Ռուսաստանի ագրեսիայի վերաբերյալ:Կոչ ենք անում միջազգային կազմակերպություններին, բոլոր պետություններին եւ առաջին հերթին ԱՄՆ-ին եւ Եվրոպական միությանը կանխել Ուկրաինայի նկատմամբ ահագնացող բռնությունները եւ պաշտպանել նրա ազատ ընտրությունը, ինքնիշխանությունն ու միասնականությունը»,-նշված է հայտարարության մեջ:
Կոմիտեի անդամ Դավիթ Շահնազարյանը այսօր լրագրողներին հայտնել է, որ այս հարցում, Ռուսաստանը Հայաստանի իշխանությունների վրա լուրջ ճնշում է գործադրում:
«Ամբողջ աշխարհում որևէ երկիր չկա, որ այսօր պաշտպանի Ռուսաստանի այս դիրքորոշումը։ Կարծում եմ, որ հիմա Ռուսաստանի կողմից Հայաստանի իշխանությունները ենթարկվում են բավական լուրջ ճնշման, որպեսզի արտահայտվեն,-ասել է Շահնազարյանը:- Հուսանք, որ գոնե կկարողանան պահպանել այս լռությունը, թեև երաշխիք չունենք։ Գոնե այս ոչ արժանապատիվ լռությունը, որ մինչև այսօր ցուցաբերում են Հայաստանի իշխանությունները, հուսանք, որ կկարողանան պահպանել»:
© Medialab.am