Ներքաղաքական իրավիճակին եւ քիչ առաջ ՕԵԿ-ի իշխանական կոալիցիայից դուրս գալուն է անդրադարձել «Ժառանգություն» կուսակցության քարտուղար, քաղաքագետ Ստյոպա Սաֆարյանը`նշելով թե վերջին քսանամյակում նման թատրոն չի տեսել:
Սաֆարյանի ֆեյսբուքյան գրառումն ամբողջությամբ ներկայացնում ենք ստորեւ:
«Հովիկ Աբրահամյանի կառավարությունում նիդաբոռ է՝ նախարարական տեղերն ավելի շատ են, քան հայտերը: Խեղճը դեռ կառավարություն չձեւավորած, անփառունակ դիսկրեդիտացիայի հուժկու փուլ է մտել…
Առաջին օրը «երկիր-երկիր» համակարգով հրթիռակոծություն Լեւոն Տեր-Պետրոսյանի «նենգ» անկյունը, հիմա էլ նույնիսկ ՕԵԿ-ը չի «ցանկանում» նրա հետ աշխատել…
ՕԵԿ-ն էլ «կոալիցիայից» դուրս է գալիս մե խինդ, մե ծեծաղով, մե ուրախուչյամբ, կարծես միջնակարգ դպրոցի շրջանավարտի դիպլոմ ստացած լինի, բայց դեռ չգիտի՝ ընդդիմություն է, թե ընդդիմություն չի. համ կուսակցության ղեկավար մարմինը «հանձնարարություն» է տալիս Արթուր Բաղդասարյանին՝ ի կատարում, համ չգիտի՝ առաջիկայում Արթուր Բաղդասարյանն ինչ է ասելու՝ իրենք ընդդիմությո՞ւն են, թե՞ ոչ :
Երկրիս Անվտանգության խորհրդի կազմն էլ արդեն անցել է ընդդիմության «ձեռքը»: Տեսնես այս մի «հաղթանակի» պատասախանատվությունն ո՞վ է ստանձնելու՝ Ալ-Քաիդա՞ն, թե՞ Հեզբոլլահը
Այսպիսի թատրոն վերջին քսանամյակում չեմ տեսել…»
Տեղեկացնենք, որ ապրիլի 16-ի երեկոյան ՕԵԿ-ի քաղխորհրդի նիստից հետո կուսակցության հաղորդագրությունից պարզ է դարձել, որ վերջիններս նպատակահարմար չեն համարում ՀՀԿ-ի հետ կոալիցիա կազմելը` պատճառաբանելով, թե Սերժ Սարգսյանը վարչապետի պաշտոնում չի քննարկել Արթուր Բաղդասարյանի թեկնածությունը:
«ՕԵԿ-ի՝ կոալիցիայի կազմում մնալու միակ հիմնավոր պատճառ կարող էր դիտարկվել իշխանության մեջ իրական դերակատարման ստանձնումը, ինչը չէր կարող դրսևորվել երեք նախարարական պորտֆելների շուրջ առաջարկությամբ»,- նշված էր ՕԵԿ-ի հաղորդագրության մեջ:
© Medialab.am
