Սերժ Սարգսյանի՝ Մաքսային միություն առանց Ղարաբաղի մտնելու վերաբերյալ այսօր արած հայտարարության պարագայում, Հայաստանը շատ տխուր վիճակում է հայտնվում: Այս կարծիքին է «Ժառանգություն» կուսակցության քարտուղար, վերլուծաբան Ստյոպա Սաֆարյանը:
Հիշեցնենք, որ Սերժ Սարգսյանն այսօր Ծաղկաձորում անդրադարձել է Աստանայում օրերս անցկացված Եվրասիական տնտեսական բարձրագույն խորհրդի ընդլայնված կազմով նիստի ժամանակ տեղի ունեցածին՝ նշելով.
«Իսկ ո՞վ է ասել, որ մենք Ղարաբաղով ենք մտնելու Մաքսային միություն: Այդպիսի բան չի եղել և չի էլ կարող լինել, որովհետև Ղարաբաղը գոնե մեր օրենսդրությամբ, գոնե մեր պատկերացումներով Հայաստանի մաս չէ այսօր կազմում»:
Հիշեցնենք, որ Աստանայի համաժողովում այս հարցը բարձրացրել էր Ղազախստանի նախագահ Նուրսուլթան Նազարբաևը, ով ընթերցել էր Ադրբեջանի նախագահի նամակը, որում նշվում էր, թե Հայաստանը պետք է Եվրասիական միության անդամ դառնա ՄԱԿ-ի կողմից ճանաչված սահմաններով, այսինքն՝ առանց Ղարաբաղի:
«Ոչ միայն Հայաստանը չի ճանաչում Լեռնային Ղարաբաղի անկախությունը, այլև Հայաստանի Հանրապետության նախագահը, Հայաստանը մտցնելով Եվրասիական միություն, ինքն էր հայտարարել, որ մտնում ենք՝ լուծելու մեր անվտանգության խնդիրները: Իսկ մեր անվտանգության թիվ մեկ խնդիրը դա Ղարաբաղի խնդիրն է: Փաստորեն ստացվում է, որ մենք Մաքսային միություն մտնելով՝ ոչ մի խնդիր չենք լուծում ըստ էության»,- «Մեդիալաբին» ասում է վերլուծաբանը:
Նրա խոսքով՝ այս դեպքում հետաքրքիր է, թե ինչո՞ւ է Հայաստանը մտնում Մաքսային միություն, եթե Ղարաբաղը մեզ հետ չէ: Նա նշում է որ փաստորեն Սերժ Սարգսյանը համաձայն է Ղազախստանի նախագահ Նուրսուլթան Նազարբաևի հետ, ով Աստանայում ընթերցել էր Ադրբեջանի նախագահի նամակը:
«Մի բան էլ ավելին է ստացվում, ոչ միայն Նազարբաևի, այլև Սերժ Սարգսյանը համաձայն է նաև Ալիևի հետ»,- ասում է Ստյոպա Սաֆարյանը:
Նրա խոսքով՝ Հայաստանը հայտնվում է շատ տխուր վիճակում, որովհետև փաստորեն Սերժ Սարգսյանն արտաքին քաղաքականության առումով ինչ որ նախաձեռնեց, Հայաստանի համար չափազանց վտանգավոր դարձավ:
«Քաղաքական և միջազգային հարաբերությունների հայկական կենտրոնի» տնօրեն, քաղաքագետ Աղասի Ենոքյանը կարծում է, որ Սերժ Սարգսյանի այս հայտարարությունը հետևյալն է փաստում.
«Հայաստանի համար կհնարվի Մաքսային միության անդամ դառնալու միջանկյալ տարբերակ: Դրանով և Ռուսաստանի ցանկությունները կբավարավեն, այսինքն՝ Հայաստանը կհամարվի Մաքսային միության անդամ, և Նազարբաևի ընկեր Իլհամի պայմանները կբավարարվեն»:
Վերլուծաբանի խոսքով՝ առանց Ղարաբաղի Մաքսային միություն մտնելը վտանգ է պարունակում:
«Սա Ղարաբաղը Հայաստանից հեռացնելու հերթական տարբերակ է»,- «Մեդիալաբին» ասում է վերլուծաբանը:
Աղասի Ենոքյանի խոսքով՝ Հայաստանն արդեն մտել է, այսպես կոչված, ռուսական թիմի մեջ և փաստորեն ամեն գնով պետք է մնա այդտեղ: Իսկ դա նշանակում է, որ Հայաստանը գնալով կորցնում է արտաքին քաղաքականությունը:
Սերժ Սարգսյանի այն տեսակետը, թե «Մաքսային միությանն անդամակցելը նպաստում է Լեռնային Ղարաբաղի խնդրի լուծմանը, սա միանշանակ է»,- Աղասի Ենոքյանը չի կիսում:
«Նա մտածում է իր տրամաբանությամբ, Սերժ Սարգսյանի և ընդհանրապես Հայաստանի քաղաքականության տրամաբանությամբ Ղարաբաղի խնդրի լուծումը Ռուսաստանի ազդեցության ներքո լինելն է: Այս առումով, քանի որ մենք մնում ենք Ռուսաստանի ազդեցության գոտում, նրա կարծիքով՝ դա նպաստում է: Շատերի կարծիքով՝ լրիվ հակառակն է»,- ասում է նա:
Վերլուծաբանի խոսքով, այօր ակնհայտ տեսնում ենք հետևյալը. Աստանայում հայտարարություն է արվում Նազարբաևի կողմից, բայց իրականում դա Ռուսաստանի հայտարարությունն է:
«Այդ հայտարարությամբ Ռուսաստանը ցույց է տալիս, որ ինքը երբեք էլ չի եղել Հայաստանի անվտանգության գարանտը»,- ասում է Աղասի Ենոքյանը:
Հիշեցնենք, որ Աստանայում Հայաստանը չստորագրեց Եվրասիական տնտեսական միությանը միանալու փաստաթուղթը, հայտարարվեց, որ դեռևս խնդիրներ կան, և Հայաստանին մինչև հունիսի 15-ը ժամանակ տրվեց: Սերժ Սարգսյանը այս կապակցությամբ ասել է, որ զուտ տեխնիկական նշանակության հարցեր են դրանք:
© Medialab.am