Սերժ Սարգսյանի եւ ՀՀԿ-ի` ԲՀԿ առաջնորդ Գագիկ Ծառուկյանի հասցեին հնչեցրած սուր քննադատությունից եւ անձնական վիրավորանքներից հաշված օրեր անց, Ծառուկյանը հանդես է եկել հայտարարությամբ: Հայտարարությունը հետեւել է երեկ Ծառուկյան-Սարգսյան մի քանի ժամ տեւած հանդիպմանն ու քննարկումներին: Գագիկ Ծառուկյանի հայտարարությունը ներկայացնում ենք ստորեւ:
«Սիրելի՛ հայենակիցներ,
Ինչպես ես բազմիցս ասել եմ, մեր բոլորի, և անձամբ իմ խնդիրը ես միշտ տեսել եմ մեր ժողովրդին, մեր երկրին օգտակար լինելու մեջ: Հայաստանում առկա խնդիրները լուծելու համար մեզ անհրաժեշտ է ոչ թե պատերազմել միմյանց դեմ, այլ հանգիստ, առանց միմյանց վիրավորելու աշխատել, ցույց տալ առկա բոլոր բացերը, գտնել լուծումներ և կյանքի կոչել դրանք: Միայն այդպես է հնարավոր վերացնել այն իրավիճակը, որն այսօր մենք ունենք մեր երկրում:
Ցավով եմ նշում, որ վերջին օրերի ընթացքում գործընթացները մեր երկրում բոլորովին այլ ուղղությամբ են ընթանում: Սա որևէ բարի տեղ չտանող ուղղություն է: Դժվար չէ պատկերացնել, թե այն, ինչ կատարվում է հիմա, ինչի կհանգեցնի ընդամենը մի քանի շաբաթների ընթացքում: Այսպես շարունակվելու դեպքում չի շահի ոչ մեկը և առաջին հերթին մեր ժողովուրդը: Այսպես շարունակել չի կարելի, հետո բոլորս մեղադրելու ենք ինքներս մեզ:
Ինձ համար թանկ է մեր քաղաքացիներից յուրաքանչյուրի կյանքն ու արժանապատվությունը: Ոչ մի նպատակ չի կարող արդարացնել նույնիսկ մեկ անմեղ մարդու արյուն: Թե´ իշխանության, թե´ ընդդիմության խնդիրն է չանցնել ողջամտության սահմանը: Բոլոր խնդիրները պետք է լուծվեն խաղաղ, օրինական, քաղաքական ճանապարհով»:
Տեղեկացնենք, որ օրեր առաջ հունվարի 20-ին նախատեսված հանրահավաքը ԲՀԿ հայտարարությամբ չեղյալ է համարվել:
