Ինչպես հայտնի է, այսօր մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու կասկածանքով ձերբակալվել է ազատամարտիկ, «Նոր Հայաստան» հանրային փրկության ճակատի համակարգող Ժիրայր Սեֆիլյանը:
Պաշտոնական հաղորդագրության համաձայն՝ քրեական գործի շրջանակներում պարզվել է, որ «Ժիրայր Սեֆիլյանը մի խումբ անձանց հետ ծրագրել էր զինված խմբավորումների միջոցով, զենքի գործադրմամբ, զավթել շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը»: Իրավապահներն այժմ խուզարկություն են կատարում նրա տանը: Սեֆիլյանի ձերբակալության վերաբերյալ «Մեդիալաբը» մի քանի հարց ուղղեց «Նոր Հայաստան» հանրային փրկության ճակատի անդամ Սյուզան Սիմոնյանին:
-Տիկին Սիմոնյան, ի՞նչ տեղեկություն կարող եք մեզ հայտնել տեղի ունեցածի մասին:
-Դեռ հստակ տեղեկություն չունենք՝ իրականում ինչ է եղել: Գիտենք, որ Սեֆիլյանի տան դուռը կոտրել են, մտել են այնտեղ: Պատգամավոր Զարուհի Փոտանջյանը զանգ տվեց, ասում է՝ ինքն այնտեղ է, մի քանի մեքենաներ են կանգնած Սեֆիլյանի տան մոտ և ոչ ոքի ներս չեն թողնում: Սեֆիլյանի կինը՝ Նանոր Սեֆիլյանը զանգեց, գնում էր այնտեղ, տեղեկություն չունի: Ժիրայր Սեֆիլյանի տանն այժմ խուզարկություն է կատարվում, նաև ՇԱԳԱՄ-ում (Շուշիի առանձնակի գումարտակի ազատամարտիկների միավորում) է խուզարկություն կատարվում:
-Ի՞նչ տեղեկություն ունեք, նրա հետ այլ անձի՞նք էլ են ձերբակալվել, որովհետև Քննչական կոմիտեի հաղորդագրությունում գործի հետ կապվող մի խումբ անձանց մասին հիշատակում կա:
-Հենց այդ է, որ մենք տեղյակ չենք: Ոչ Կարո Եղնուկյանն է տեղյակ, ոչ էլ ես, իսկ մնացածների հեռախոսներն անջատված են: (Ավելի ուշ Սյուզն Սիմոնյանը հրապարակեց, որ Բերման են ենթարկվել Վարուժան Ավետիսյանը, Արմեն Միքայելյանը, Վիտո Դավթյանը, Արմեն Լուսինյանը, Էդուարդ Գրիգորյանը, Երեմ Խոնդկարյան֊ Խմբ․)
-Տիկին Սիմոնյան, իսկ ինչ գնահատական կտաք տեղի ունեցածին, սա քաղաքական հետապնդո՞ւմ է:
-Իհարկե, քաղաքական հետապնդում է: Սեֆիլյանը թույլ չի տալու, որ Սերժ Սարգսյանը Արցախի հողերն ինքնակամ հանձնի: Եվ քանի որ ինքը տեսավ, որ իր խոստումները չի կարողանալու իրականացնել, դրա համար Սեֆիլյանին մեկուսացրեց: Այլ հարց չկա այստեղ:
-Այսինքն՝ շինծո՞ւ է այն մեղադրանքը, որ զենք են հայտնաբերել նրա մոտ:
-Իհարկե, շինծու է: Սեֆիլյանն ամեն ինչ անում է օրենքով, օրենքի սահմաններում: Եվ նման բան հնարավոր չէ: Փողոցում ինչ-որ մի մեքենա են կանգնեցրել, չգիտեմ, տեղյակ էլ չեմ, ասում են՝ զենք կա: Ես ուշ երեկոյան Սեֆիլյանի հետ եմ եղել, եթե այդպիսի բան լիներ, ես տեղյակ կլինեի:
-Ինչո՞ւ հենց հիմա որոշվեց Սեֆիլյանին ձերբակալել: Այս նույն մեղադրանքով՝ զենքի գործադրմամբ շենքեր ու շինություններ գրավելու, նախորդ տարեվերջին եղան ձերբակալություններ:
-Որովհետև հենց հիմա նա բավական մարդ է հավաքել, որպեսզի գնան Արցախ ու հետ բերեն հողերը: Որովհետև այսօր Սերժ Սարգսյանը գնացել է նրանց հետ հանդիպման: Նա գնացել է նորից ծախելու երկիրը, այդ նպատակով է գնացել, ուրիշ ի՞նչ նպատակով պետք է գնար:
-Այսինքն՝ անմիջական կա՞պ եք տեսնում Սանկտ-Պետերբուգում անցկացվող հանդիպման ու Սեֆիլյանի ձերբակալության միջև:
-Իհարկե, անմիջական կապ կա Սերժ Սարգսյանի՝ այնտեղն գնալու, նրանց հետ հանդիպելու և Սեֆիլյանին մեկուսանցնելու միջև:
Էմմա Մանուկյան
MediaLab.am