Սարի թաղում այսօր ոստիկանները հատուկ միջոցներ, զանգվածային բռնություն կիրառեցին խաղաղ ցուցարարների եւ լրագրողների հանդեպ:
Ի պաշտպանություն «Սասնա ծռեր» խմբի հանրահավաքի վերջում որոշում կայացվեց Ազատության հրապարակից երթ անել դեպի Խորենացի փողոց: Ոստիկանությունը մեծ ուժեր կենտրոնացրեց Խորենացի փողոցի հատվածում ու թույլ չտվեց մուտք գործել տարածք:
Ցուցարարները կարողանալով ճեղքել ոստիկանական պատը մուտք գործեցին Սարի թաղ՝ մոտենալով արդեն 13-րդ օրը «Սասնա ծռերի» կողմից գրավված ՊՊԾ գնդի շրջակա տարածք: Սակայն, ժամանած ոստիկանական ուժերը, որոնց մեջ կային մի քանի տասնյակ քաղաքացիական հագուստով ոստիկաններ, բռնություններ կիրառեցին խաղաղ ցուցարարների հանդեպ:
Ոստիկանությունը նաև հատուկ միջոցներ է կիրառել: Կան տասնյակ վիրավորներ, որոնց թվում են նաև լրագրողներ ու օպերատորներ, ոստիկանները կոտրել են լրագրողների տեխնիկան:
Ծեծի են ենթարկվել Ազատություն ռադիոկայանի լրագրողներ Հովհաննես Մովսիսյանն ու Կառլեն Ասլանյանը, օպերատոր Գարիկ Հարությունյանը, Lragir.am կայքի օպերատոր Մարութ Վանյանը, կոտրել են նրա տեսախցիկը, վիրավորվել են 1.am-ի լրագրող Մարիամ Գրիգորյանն ու օպերատր Դավիթ Հարությունյանը: Նրանք պայթուցիկ սարքից ոտքի վնասվածք են ստացել: Այլ տեղեկություններ այս պահին չկան:
Ըստ տեղեկությունների՝ Սարի թաղում տասնյակ վիրավորներ են ընկած գետնին, շտապ օգնության մեքենաները տասնյակ վիրավորներ են տեղափոխում հիվանդանոցներ:
Զուգահեռ այս գործողություններին, տևական ժամանակ կրակոցներ ու պայթյուններ են լսվել ՊՊԾ գնդի տարածքում:
Ակցիայի համակարգողներից Դավիթ Սանասարյանը Նորքի հիվանդանոցից «Մեդիալաբին» պատմեց, որ մոտ երեք տասնյակ վիրավորներ կան միայն այդ հիվանդանոցում: Ներկայացնում ենք նրա հետ զրույցը:
-Դավիթ, ի՞նչ իրավիճակ է այդտեղ:
-Մոտ երեք տասնյակ վիրավոր կա, ամենատարբեր վիրավորներ են: Ծանր դեպքեր կան: Բայց նոր ինֆորմացիա եկավ, որ Սարի թաղում մարդիկ պառկած են, անգիտակից ընկած են:
-Ի՞նչ վնասվածքներով են մարդիկ հիվանդանոցում:
-Ամենատարբեր վնասվածքներ են: Աչքի վնասվածք կար, բայց չգիտեմ, ելե՞լ էր աչքը, թե՞ ոչ:
-Ի՞նչ էր տեղի ունենում Սարի թաղում:
-Մենք այնտեղ կանգնած էինք: Արմեն Մարտիրոսյանը համոզում էր, որ չկրակեն մարդկանց վրա: Արմենին տարան հետ ու սկսեցին ժողովրդի վրա կրակել: Դրան գումարած քաղաքացիական հագուստով ոստիկանները երկաթներով ու փետերով հարձակվեցին մարդկանց վրա:
-Ի՞նչ տարիքի են տուժածները հիմնականում:
-Տարբեր տարիքի են: Հիմնականում քաղաքացիական հագուստով ոստիկաններն էին ծեծում մարդկանց:
Էմմա Մանուկյան
MediaLab.am
