Քաղաքական զարգացումները ցույց են տալիս, որ Հայաստանում իշխանության փոխանցման վերաբերյալ պայմանավորվածությունն ի կատար է ածվում: «Մեդիալաբի» հետ զրույցում նման դիտարկում արեց Միջազգային և անվտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը՝ անդրադառնալով Նիկոլ Փաշինյանի՝ վարչապետ ընտրվելու գործընթացին:
«Այս փուլը արժի անվանել իշխանության փոխանցման փուլ, որովհետև մենք ընդամենն առաջին քայլն ունենք, երբ ՀՀԿ-ն որոշեց համապատասխան թվով պատգամավորներով կողմ քվեարկել Նիկոլ Փաշինյանի վարչապետ դառնալուն: Թերևս սա առաջին նշանն է, որ կողմերը պայմանավորվել են իշխանությունը սահուն փոխանցելու շուրջ»,- «Մեդիալաբին» ասում է Ստյոպա Սաֆարյանը:
Նրա խոսքով՝ եթե սրան գումարում ենք այն, որ ՀՀԿ կարկառուն ներկայացուցիչներից Արմեն Աշոտյանն արդեն հայտարարել է, որ ՀՀԿ-ն ընդդիմություն է լինելու, կարելի է ասել, որ իշխանության փոխանցման առումով խնդիրներ չպետք է լինեն: Թե ի՛նչ կլինի գործնականում, ի՛նչ կարգի խոչընդոտներ ու խնդիրներ ի հայտ կգան հետո՝ ցույց կտա ժամանակը: «Բայց, համենայնդեպս, իշխանության փոխանցման վերաբերյալ պայմանավորվածությունը դե յուրե տեսք է ստացել»,- հավելում է նա:
Հիշեցնենք, որ մայիսի 8-ին Ազգային ժողովը հատուկ նիստում վարչապետ ընտրեց Նիկոլ Փաշինյանին: Նրան կողմ քվեարկեց 59, դեմ՝ 42 պատգամավոր: Խորհրդարանում մեծամասնություն կազմող ՀՀԿ-ն որոշել էր, որ խմբակցությունից 11 պատգամավոր պետք է կողմ քվեարկեր Նիկոլ Փաշինյանին, որպեսզի նա ընտրվեր վարչապետ: Արդյունքում՝ Փաշինյանին կողմ քվեարկեց ՀՀԿ-ական 13 պատգամավոր, ինչպես նաև «Ելք», «Ծառուկյան դաշինք» և ՀՅԴ խմբակցությունները: Մայիսի 1-ին, հիշեցնենք, ՀՀԿ-ն տապալեց վարչապետի ընտրությունը՝ դեմ քվեարկելով Նիկոլ Փաշինյանի թեկնածությանը, ինչին հաջորդեց հանրության ընդվզման նոր ալիք: Դրանից հետո մայիսի 2-ին ՀՀԿ-ն փոխեց դիրքորոշումը, հայտարարելով, որ կաջակցի վարչապետի ընտրության գործընթացին:
Անդրադառնալով առաջիկայում սպասվելիք փոփոխություններին՝ քաղաքագետ Ստյոպա Սաֆարյանն ասում է, որ ոչինչ հեշտ չի լինելու: Հանրությունը նորընտիր վարչապետ Նիկոլ Փաշինյանից չափազանց մեծ սպասելիքներ ունի: Իսկ Փաշինյանի թիվ մեկ մարտահրավերն այդ սպասումները կառավարելն է: «Թե ինչպես նա դա կկարողանա անել՝ կտեսնենք հետագայում: Նա արդեն առաջին հանձնարարականների մասին խոսեց, մասնավորապես, մաքսային ոլորտում և այլ ոլորտներում կլինեն փոփոխություններ և այլն»,- նշում է Սաֆարյանը:
Կախարդական փայտիկ, ըստ քաղաքագետի, նորընտիր վարչապետը չունի: Բայց նա կարծես թե գիտի բանաձևը, սկսում է նրանից, ինչ հնարավոր է այս պահին՝ պարզապես օրենքներն է փորձելու աշխատեցնել:
«Այն օրենքները, որոնք կամայական մեկնաբանությունների էին ենթարկվել: Եվ առայժմ, քանի դեռ Նիկոլ Փաշինյանը չի ձևավորել իր կառավարությունը և Ազգային ժողով չի բերել օրենքների նախագծեր, առնվազն անում է այն, ինչ հնարավոր է անել»,- հավելեց քաղաքագետը:
Ինչ վերաբերում է ՀՀԿ-ականների հայտարարություններին, թե այդ ուժն արդեն գործունեություն է ծավալելու ընդդիմադիր դաշտում, Սաֆարյանն ասում է, թե ակնհայտ է, որ ՀՀԿ-ն շահագրգռված կլինի Նիկոլ Փաշինյանի կառավարության ձախողմամբ: «Եվ այս կտրվածքով, իհարկե, փորձելու է և՛ ընդդիմախոսել, և՛ տորպեդահարել, և՛ անգամ կփորձի պոպուլիզմի գնալ, որպեսզի առաջ անցնի Փաշինյանից և ժողովրդին հաճելի բաներ ասի: Ամեն ինչ պետք է սպասել: Բայց այս ամբողջ գործընթացում մի բան լավ է՝ պետությունը շնչելու է, քաղաքական համակարգը շնչելու է»,- ասում է քաղաքագետը:
Ռոզա Հովհաննիսյան
MediaLab.am
