Փաշինյանն ու Բաբլոյանը հանդիպել են. ընտրությունները կանցկացվեն առավելագույնը մեկ տարվա ընթացքում

Փաշինյանն ու Բաբլոյանը հանդիպել են. ընտրությունները կանցկացվեն առավելագույնը մեկ տարվա ընթացքում
Փաշինյանն ու Բաբլոյանը հանդիպել են. ընտրությունները կանցկացվեն առավելագույնը մեկ տարվա ընթացքում
Հեղինակ MediaLab

Օգոստոսի 27-ին կայացել է ՀՀ Ազգային ժողովի նախագահ Արա Բաբլոյանի եւ ՀՀ վարչապետ Նիկոլ Փաշինյանի հանդիպումը։ Այս մասին տեղեկանում ենք ԱԺ տարածած հաղորդագրությունից:

«Բարձրացված հարցերի շուրջ քննարկումների արդյունքում օրենսդիր եւ գործադիր մարմինների ղեկավարները մասնավորապես արձանագրել են.

Անկախ քաղաքական հայացքներից Հայաստանի Հանրապետությունում յուրաքանչյուր ոք ունի խոսքի եւ տարբերվող կարծիքի ազատության իրավունք։

Դատարանների անկախությունը երկրում արդարադատության ապահովման կարեւորագույն երաշխիք է, հետեւաբար օրենսդիր, գործադիր եւ դատական իշխանությունների բաժանման ու հավասարակշռման մեխանիզմը որեւէ կերպ չպետք է խաթարվի։

Արդարադատության իրականացման գործում Հայաստանի դատական համակարգն իր ողջ գործիքակազմով իրեն չի սպառել, այդուհանդերձ, եթե քաղաքական քննարկումների արդյունքում կողմերը գտնեն, որ կա անհրաժեշտություն «անցումային արդարադատության» ինստիտուտի, ապա դա պետք է իրականացվի Սահմանադրության եւ համապատասխան օրենսդրական դաշտի փոփոխություններով եւ միեւնույն ժամանակ որեւէ կերպ չվնասի արդարադատությանը:

ՀՀ ԱԺ կողմից 07.06.2018 թվականին հավանության արժանացած Կառավարության ծրագրի համաձայն «Արտահերթ խորհրդարանական ընտրություններն անհրաժեշտ է անցկացնել առավելագույնը մեկ տարվա ընթացքում»: Արտահերթ խորհրդարանական ընտրությունները սահմանադրական փոփոխությունների միջոցով անցկացնելու դեպքում` մեխանիզմների շարքում հանրաքվեի ինստիտուտը կարող է լինել ամենաժողովրդավարականը, քանի որ փոփոխության ենթակա Սահմանադրությունն ընդունվել է հանրաքվեով։ Այդուհանդերձ, այս հարցում որեւէ տարբերակի ընտրությունը պետք է արվի հանրային ու քաղաքական լայն քննարկումների  արդյունքում։ Այդպիսի հնարավորությունները սպառված չեն թե խորհրդարանում եւ թե հանրային լայն շրջանակներում»,- ասվում է ԱԺ հաղորդագրությունում։

Նշենք, որ օրերս Ազգային ժողովի նախագահը խոր մտահոգություն էր հայտնել երկրում ստեղծված իրավիճակի, հասարակության վտանգված համերաշխության, անհանդուրժողականության խորացման առնչությամբ և խստորեն քննադատել վարչապետ Նիկոլ Փաշինյանին, որի խոսքում նա նկատել էր Հայաստանի Հանրապետության սահմանադրական կարգի, պետականության հիմքերի համար խիստ վտանգավոր ուղերձներ։

Բաբլոյանը նշել էր, որ ստեղծված իրավիճակը քննարկելու նպատակով նախատեսում է հանդիպումներ հանրապետության նախագահի, վարչապետի, Մարդու իրավունքների պաշտպանի, Բարձրագույն դատական խորհրդի և միջազգային դիվանագիտական առաքելությունների ներկայացուցիչների հետ։ Փաշինյանը հայտարարել էր, որ կհանդիպի Բաբլոյանի հետ: