6-օրյա տարածաշրջանային պաշտոնական այցով Հարավային Կովկասում ժամանած Լեհաստանի նախագահ Բրոնիսլավ Կոմորովսկին երեկ ժամանել է Երեւան, իսկ այսօր սկսել է իր երեւանյան հանդիպումները:
Երեւանյան իր այցելությունը Կոմորովսկին սկսել է Ծիծեռնակաբերդի հուշահամալիր այցելությամբ, որտեղ հարգանքի տուրք է մատուցել Հայոց ցեղասպանության զոհերի հիշատակին:
Այնուհետեւ Սերժ Սարգսյանի նստավայրում տեղի է ունեցել բարձրաստիճան հյուրի ընդունելության պաշտոնական արարողությունը, որին հաջորդել են նախագահների առանձնազրույցը, եւ երկու երկրների պաշտոնական պատվիրակությունների մասնակցությամբ ընդլայնված կազմով բանակցությունները:
Ինչպես տեղեկացնում են նախագահական նստավայրից, հանդիպումից հետո տեղի է ունեցել երկու երկրների միջեւ երկկողմ համագործակցության զարգացմանն ուղղված փաստաթղթերի ստորագրման արարողությունը`մշակույթի, կրթության եւ գիտության, գյուղատնտեսության եւ անասնաբուժության բնագավառներում համագործակցության մասին:
Բանակցությունների արդյունքներն ամփոփվել են Սարգսյանի եւ Կոմորովսկու համատեղ մամուլի ասուլիսում:
Ասուլիսի ժամանակ իր խոսքում Սերժ Սարգսյանը` ողջունելով Լեհաստանի նախագահ պարոն Կոմորովսկուն, նրա տիկնոջն ու ուղեկցող պատվիրակության անդամներին, նշել է, որ Հայաստանի եւ Լեհաստանի անկախության հռչակումից ի վեր Հայաստանի և Լեհաստանի հարաբերություններում արձանագրվել է զարգացման բնականոն ընթացք:
«Բանակցությունների օրակարգը բավականին հագեցած էր, եւ նշեմ ամենակարեւորը՝ վերահաստատվեց հարաբերություններն ամրապնդելու երկուստեք ցանկությունն ու հանձնառությունը: Արձանագրվեց, որ Հայաստանի եւ Լեհաստանի միջեւ գոյություն ունեցող քաղաքական երկխոսությունը, համագործակցությունն առեւտրատնտեսական, մշակութային ոլորտներում զարգանալու լուրջ ներուժ ունեն, եւ պայմանավորվեցինք լրացուցիչ ջանքեր ներդնել հայ-լեհական փոխգործակցությանը նոր դինամիկա եւ բովանդակություն հաղորդելու ուղղությամբ: Ստորագրվեցին փաստաթղթեր, որոնք ընդլայնում են մեր երկկողմ շփումների շրջանակը` ավելացնելով դրանց շահառուների թիվը»,- հայտարարել է Սարգսյանը:
Սարգսյանը նշել է, որ բանակցությունների ընթացքում իրենք առաջին հերթին ուշադրություն են դարձրել հարաբերությունների առեւտրատնտեսական բաղադրիչի զարգացմանը: Բացի այդ, Սարգսյանի խոսքով, քննարկվել են նաեւ տարածաշրջանային եւ միջազգային կարեւորության հարցեր։
Իր խոսքում Սարգսյանը անդրադարձել է նաեւ ԼՂ հիմնախնդրին, հայտարարելով, թե հանդիպման ընթացքում արձանագրեցին, որ «կազանյան հանդիպումից եւ մեր, եւ միջազգային հանրության սպասելիքները մեծ էին, բայց, ցավոք, այդ սպասելիքները չարդարացան»:
«Կազանում մենք իրականում շատ մոտ էինք հաջողությանը: Անհրաժեշտ է հարգել Լեռնային Ղարաբաղի ժողովրդի սեփական ճակատագիրը տնօրինելու, անվտանգության երաշխիքներ ունենալու եւ իր պատմական հայրենիքում զարգանալու օրինական իրավունքը. այն պարտավոր են հարգել բոլորը: Այլ լուծում գոյություն չունի: Ուրախ եմ եւս մեկ անգամ արձանագրել, որ Լեհաստանը Հայաստանի համար հանդիսանում է ավանդական բարեկամ երկիր, որի հետ մենք կարող ենք ազատ եւ հանգիստ քննարկել խնդիրներ եւ աջակցության հույս ունենալ»,- հայտարարել է Սարգսյանը:
Հիշեցնենք, սակայն, որ Կոմորովսկին Երեւան է ժամանել Բաքվից, որտեղ Ադրբեջանի նախագահ Իլհամ Ալիեւի հետ համատեղ մամլո ասուլիսում անդրադառնալով ԼՂ հիմնախնդրին` ուշագրավ հայտարարություններ էր արել:
«Առաջին հերթին ես կիսում եմ ձեր վիշտը: Քանի որ այստեղ կան այնպիսի խնդիրներ, որոնք խոչընդոտում են ողջ տարածաշրջանի գործունեությունը: Ինչ վերաբերվում է այս տարածաշրջանին, ապա աշխարհի քարտեզի այդ հատվածում Ադրբեջանը հայտնի է որպես երկիր, որը իր լուման է ներդնում կայունության համար, կատարում է կայունության գործոնի դեր: Ես ասել եմ պարոն նախագահին, (Ալիեւին-հեղ.), եթե լիներ այդպիսի բանաձեւ, որով հնարավոր կլիներ ինչ-որ առւմով ելք գտնել այդ բարդ խնդրից, որպեսզի ԼՂ հիմնախնդրին անդրադառնալով` Հայաստանի եւ Ադրբեջանի միջեւ այդ հակամարտությունը հնարավոր լիներ լուծել խաղաղ ճանապարհով: Սակայն մենք ինքներս բարդ փորձ ունենք: Մենք գիտենք, թե որքան կարեւոր է տարածքային ամբողջականության հարցը: Դա սուրբ հարց է»,- հայտարարել էր Կոմորովսկին:
Լեհաստանի նախագահը հավելել էր, թե միաժամանակ, կարեւոր է նաեւ ազգերի ինքնորոշման իրավունքը:
«Այնտեղ, որտեղ կան հակամարտություններ, այդ սկզբունքները հաստատված են: Ամենավտանգավորն այն է, որ ինչ-որ մեկը, անկախ աշխարհագրությունից, քաղաքական պայմաններից, այդ խնդրին կմոտենա տարբեր տեսանկյուններից»,- հայտարարել էր Լեհաստանի նախագահը:
Հիշեցնենք նաեւ, որ հայաստանյան իր այցի շրջանակներում Լեհաստանի նախագահը հանդիպումներ կունենա Ազգային ժողովի նախագահ Հովիկ Աբրահամյանի, վարչապետ Տիգրան Սարգսյանի եւ Ն.Ս.Օ.Տ.Տ Գարեգին Բ Ամենայն Հայոց Կաթողիկոսի հետ:
Քրիստինե Խանումյան
© Medialab.am