Մինչ իշխանությունները, որոնք առաջատարի դիրք են զբաղեցրել մայիսի 6-ին կայացած ԱԺ ընտրություններում հայտարարում է, որ տեղի ունեցածը Հայաստանում 21-րդ ամենաարդար եւ թափանցիկ ընտրություններն էին, ընդդիմությունը, տեղական դիտորդներն ու վերլուծաբանները պնդում են, որ ամեն ինչ ընթացել է «ընդունված սցենարի համաձայն»`խախտումներով, կեղծիքներով եւ տոտալ ճնշումներով:
«Ես ամբողջ օրը հետեւել եմ թե՛ լրահոսին, թե՛ սոցիալական ցանցերին, թե՛ քաղաքական շտաբների կողմից եկած հայտարարություններին, թե՛ Կենտրոնական ընտրական հանձնաժողովի արձագանքներին, եւ մի բան կարող ենք արձանագրել. Հայաստանի պատմության` 21-րդ դարի պատմության ընթացքում այս ընտրությունները լավագույնն են, եւ եթե որեւէ մեկը ունի այլ կարծիք, թող խնդրեմ ներկայացնի փաստեր, ոչ թե հռետորական ելույթներ ունենա, այլ` կոնկրետ փաստեր։ Նման փաստեր չեն եղել. եթե լինեին` արդեն բազմիցս նշված կլինեին»,-«Ազատություն» ռադիոկայանին ասել է ՀՀԿ մամլո խոսնակ Էդուարդ Շարմազանովը։
Հիշեցնենք, որ ԿԸՀ հաշվարկների համաձայն, հինգերորդ գումարման ԱԺ-ում ներկայացված 8 կուսակցությունն +մեկ դաշինքից, տեղեր կունենան ՀՀԿ-ն (44,05 %), ԲՀԿ-ն (30,20 %), ՀԱԿ դաշինքը (7,10 %), ՀՅԴ-ն (5,73 %), «Ժառանգությունը» (5,79 %) եւ ՕԵԿ-ը (5,49 %):
Այսինքն, անցողիկ շեմը չեն հաղթահարել ՀԴԿ-ն, ՀԿԿ-ն, եւ «Միավորված հայեր» կուսակցությունները:
Որոշ միջազգային դիտորդներ արդեն հայտարարել են, որ Հայաստանը կարող է հպարտանալ մայիսի 6-ի ընտրություններով, սակայն այս կարծիքը բոլորը չէ, որ կիսում են:
Խորհրդարանական ընտրությունների անցկացման լայնածավալ ընտրակաշառքներն ու ընտրախատումների մեխանիզմեների կատարելագործումը, ըստ վերլուծաբանների, նորից հանրապետականներին թույլ տվեց ներխուժել քաղաքական դաշտ:
«Համատարած կաշառքներ, թե ընտրություններից առաջ, թե ընտրության օրը, դրսից մեքենաներով մարդկանց բերել, տեղափոխել մի ընտրատեղամասից մյուսը, անձնագրային քվեարկումներ. Սա ընտրություններ չէր, պարզապես ընտրություն անունը կրող մի միջոցառում»,- «Մեդիալաբին» ասում է ընտրական տեխնոլոգիաների փորձագետ Արմեն Բադալյանը:
Ըստ նրա՝ 2012-ի ընտրությունները ոչնչով չէին տարբերվում նախորդից՝ պարզապես ընտրախախտումների մեխանիզմներն էին կատարելագործվել:
Հելսինկյան քաղաքացիական անսամբլեայի Վանաձորի գրասենյակի ղեկավար Արթուր Սաքունցը նշում, որ ընտրողը ազատ կամքի արտահայտում այս ընտրություններին ընդհանրապես չունեցավ:
«Թե ծրագրային, թե տեխնիկական, թե կազմակերպչական առումով ազատ ընտրելու իրավունքը չիրականացավ: Անընդհատ տեղի էին ունենում ճնշումներ, մեծածավալ ընտրակաշառքներ եվ այդ ամենը իշխանության գիտակցված անգործությամբ: Ըստ նախօորոք մշակված սցենարի ընտրություններն անցան ընտրախախտումների լայածավալ կիրառմամբ»,- ասում է Սաքունցը:
Լիլիթ Առաքելյան
© Medialab.am
