«Որ Հայաստանը եւ Արցախը ժողովրդավարացման չափանիշներով համեմատության եզրեր չունենան Ադրբեջանի հետ». Ղարաբաղում նախագահ են ընտրում

«Որ Հայաստանը եւ Արցախը ժողովրդավարացման չափանիշներով համեմատության եզրեր չունենան Ադրբեջանի հետ». Ղարաբաղում նախագահ են ընտրում
«Որ Հայաստանը եւ Արցախը ժողովրդավարացման չափանիշներով համեմատության եզրեր չունենան Ադրբեջանի հետ». Ղարաբաղում նախագահ են ընտրում
Հեղինակ MediaLab

Լեռնային Ղարաբաղում այսօր ընտրություններ են: Առավոտյան ժամը 8-ից մեկնարկած նախագահական ընտրություններում ավելի քան 95 հազար ընտրելու իրավունք ունեցող քաղաքացիներ առաջադրված երեք թեկնածուներից՝ նախագահ են ընտրում:
Լեռնային Ղարաբաղի 5-րդ նախագահական ընտրություններում պայքարի են դուրս եկել գործող նախագահ Բակո Սահակյանը, Արցախի հերոս Վիտալի Բալասանյանը եւ ագրարային համալսարանի Արցախի մասնաճյուղի պրոռեկտոր Արկադի Սողոմոնյանը: Չնայած առաջադրված երեք թեկնածուներին, իրապես պայքարն ընթանում է երկու թեկնածուների՝ Սահակյանի եւ Բալասանյանի միջեւ:
«Արցախում այսօր նախագահական ընտրություններ են: Լավ է, որ ընտրությունները ձևական չեն, և կա բավական լուրջ ընդդիմադիր թեկնածու: Հուսանք, որ կոպիտ խախտումներ և ընտրակեղծիքներ չեն լինի: Ճիշտ է՝ ժողովրդավարությունը միայն ընտրություններով չի որոշվում, բայց ընտրությունները հասարակության և միջազգայաին հանրության համար ժողովրդավարության մակարդակի ամենատեսանելի և շոշափելի ցուցիչն են»,-անդրադառնալով ղարաբաղյան ընտրություններին արձանագրել է նախկին արտգործնախարար, ԲՀԿ պատգամավոր Վարդան Օսկանյանը:

Օսկանյանը նշում է, որ «դժբախտաբար», այսօր արդեն միջազգային ընկալման մեջ, ինչպես ցույց է տալիս Freedom House միջազգային իրավապաշտպան կազմակերպության զեկույցը, Արցախն ու Ադրբեջանը նույն մակարդակում են հայտնվել՝ ոչ ազատ երկրների շարքում: Ըստ նրա, Արցախին վերաբերող ցուցիչի փոփոխությունը պայմանավորված է եղել նրանով, որ 2010թ. ԼՂՀ խորհրդարանական ընտրություններին ոչ մի ընդդիմադիր թեկնածու չի մասնակցել: Հայաստանը նույն այդ զեկույցներում անկախության սկզբներից դասվել է մասամբ ազատ երկրների շարքում, բայց վերջին տարիներին իր հավաքած բալերի տեսանկյունից անընդհատ նահանջ է արձանագրել և հասել է արդեն ոչ ազատ երկրների դասակարգման նախաշեմին:

«Ինչու է այս ամենը կարևոր: Անկախ նրանից, թե մենք ինչպես ենք վերաբերվում Freedom House-ի և այլ միջազգային կազմակերպությունների գնահատականներին, փաստ է, որ խոշոր երկրներն ու միջազգային կազմակերպությունները Հայաստանի ու Լեռնային Ղարաբաղի մասին կարծիք են կազմում ոչ թե մեր իշխանությունների հայտարարություններով և տեղական հեռուստատեսությունների ռեպորտաժներով, այլ հեղինակավոր միջազգային կազմակերպությունների զեկույցներով ու գնահատականներով:

Այսօր նաև փաստ է, որ Ղարաբաղյան խնդրի կարգավորման գործընթացը փակուղում է: Բայցևայնպես, բանակցությունների հիմքում հաջողվել է ամրագրել հայկական կողմի համար մի շատ կարևոր սկզբունք՝ Լեռնային Ղարաբաղի ժողովրդի ինքնորոշման իրավունքը:

Իրոք, այսօր մեր խնդիրը պետք է լինի Լեռնային Ղարաբաղի ժողովրդի ինքնորոշման իրավունքի ճանաչման հարթությունից նրա՝ արդեն ինքնորոշված լինելու փաստի միջազգային ճանաչման հասնելը: Դա անելու կարևորագույն նախապայմաններից մեկն այն է, որ Հայաստանն ու Արցախը ժողովրդավարացման չափանիշներով համեմատության եզրեր չունենան Ադրբեջանի հետ և այդ չափանիշներով իրական մասը կազմեն եվրոպական մեծ քաղաքակրթության:

Ահա նաև ինչու է այսքան կարևոր թե՛ Ղարաբաղում, թե՛ հաջորդ տարի Հայաստանում ազատ, արդար և մրցակցային նախագահական ընտրությունների անցկացումը»,-Facebook սոցիալական ցանցի իր էջում գրում է Վարդան Օսկանյանը:

Հիշեցնենք, որ նախագահական ընտրությունները լուսաբանում են ավելի քան 50 լրագող, Ղարաբաղում են ՀՀ Կենտրոնական ընտրական հանձնաժողովի պատվիրակությունը, ԱԺ պատվիրակությունը, առնվազն 80 դիտորդներ եւ այլ կարեւոր կառույցների ներկայացուցիչներ:

Այսօր, Ղարաբաղում նախագահական ընտրությունների կապակցությամբ հայտարարություն է տարածել նաեւ ՀԱԿ-ը՝ կոչ անելով ԼՂՀ իշխանություններին անել հնարավորը օրինական, ազատ եւ արդար ընտրություններ ապահովելու համար:

«Թե ռազմի դաշում եւ թե դիվանագիտական ասպարեզում Ադրբեջանի հետ տարվող անհավասար պատերազմում ԼՂ հիմնական ռեսուրսներից պետք է լինի ժողովրդավարական ինստիտուտների անհամեմատ ավելի բարձր մակարդակը և կենսունակությունը, ինչը միանշանակորեն կնկատվի միջազգային հանրության կողմից: Վերջինիս արձագանքը ընտրություններին մեծապես պայմանավորված է լինելու հենց ընտրությունների որակով: Միեւնույն ժամանակ, ազատ եւ արդար ընտրությունների ամենամեծ պահանջատերը Լեռնային Ղարաբաղի ժողովուրդն է, որի օրինակարգ իշխանությունները նոր լիցքեր կստանան ԼՂ պետական շահերը բանակցային գործընթացում առաջ մղելիս: Եւ վերջապես, օրինական ընտրությունները ԼՂՀ անվտանգության հարց է, ինչը չեն կարող չգիտակցել ընտրություններում ներգրավված բոլոր կողմերը»,-նշված է ՀԱԿ տարածած հայտարարության մեջ:

© Medialab.am