Ազգային ժողովի «Քաղաքացիական պայմանագիր» խմբակցության պատգամավոր Արփի Դավոյանը տեղյակ չէ, որ «դեղին ձնծաղիկը»՝ ՀՀ Կարմիր գրքում գրանցված Շտերնբերգիա Ֆիշերի անվամբ ծաղիկը, վերացող տեսակ է, հետևաբար դրա վաճառքը արգելված է: Նա իր ֆեյսբուքյան էջի «սթորի» բաժնում հրապարակել է ծաղկի լուսանկարը՝ սեղանին ծաղկամանի մեջ դրված:
«Այդ ծաղիկները նվեր եմ ստացել քրոջս աղջկանից», -«Մեդիալաբին» ասաց պատգամավորը՝ նշելով, որ ինքը տեղյակ չի եղել ծաղկի վերացող տեսակ լինելու ու դրա վաճառքի արգելված լինելու մասին:
Համացանցում պատգամավորը քննադատության է արժանացել:
Շրջակա միջավայրի նախարարի մամուլի խոսնակը անդրադարձել է մեկնաբանություններին և նշել. «Հարգելի գործընկերներ, Շրջակա միջավայրի նախարարությունը չունի վերահսկողական գործառույթ, այն վերապահված է Բնապահպանության և ընդերքի տեսչական մարմնին: Տիկին Դավոյանն արդեն տեղյակ է խնդրի վերաբերյալ և պատրաստակամ է այսուհետ անձամբ հետևողական լինել տեսչական մարմնի աշխատանքի նկատմամբ:
Խնդիրը գտնվում է Շրջակա միջավայրի նախարարության ուշադրության կենտրոնում:
Տեղեկացնեմ նաև, որ տեսչական մարմնի կողմից իրականացվող ստուգայցերի ժամանակ հաճախ պարզվում է, որ փողոցներում վաճառվող ծաղիկները հավաքված են ոչ թե բնության գրկից, այլ աճեցված են ջերմոցներում»:
Ավելի վաղ ՇՄ նախարարությունը տեղեկացրել էր, որ Կարմիր գրքում գրանցված բույսերի ոչնչացման կամ հավաքի համար ՀՀ օրենքով սահմանվում է վարչական տուգանք։ Կոնկրետ այս՝ Շտերնբերգիա Ֆիշերի բույսի հավաքի յուրաքանչյուր միավորի (հատի) համար տուգանքը կազմում է 25 000 դրամ, իսկ 200 000 դրամը գերազանցելու դեպքում՝ հնարավոր է քրեական պատասխանատվություն սահմանել։
Քրիստինե Աղաբեկյան
MediaLab.am
