Քաղաքական վերլուծաբանները, ողջունելի համարելով Ազգային ժողովի «Բարգավաճ Հայաստան» խմբակցության քարտուղար Նաիրա Զոհրաբյանի հայտարարությունը կառավարման խորհրդարանական համակարգին անցնելու վերաբերյալ, այդկերպ նախանշում են դրական միտումներ դեպի ժողովրդավարացման ուղին գնալու համար:
Միեւնույն ժամանակ, նրանք հավելում են, որ ԲՀԿ-ի քայլի մեջ «որեւէ սենսացիոն եւ արտառոց երեւույթ չկա»:
«Այս հարցի շուրջ ժամանակին իրենց տեսակետներն են արտահայտել և պաշտպանել նաև այլ քաղաքական ուժեր:-«Մեդիալաբին» ասում է ընտրական և քաղաքական տեխնոլոգիաների փորձագետ Արմեն Բադալյանը,-Եվ քանի որ հիմա նախագահական ընտրարշավ է, քաղաքական ուժերը տարբեր հարցեր են բարձրացնում»:
Հիշեցնենք, որ հայտարարության մեջ ԲՀԿ քարտուղար Նաիրա Զոհրաբյանը նշել է 2017-ից կառավարման խորհրդարանական համակարգին անցում կատարելու անհրաժեշտության մասին, և կարևոր համարել այդ կապակցությամբ ԱԺ-ում 100 տոկոսանոց համամասնական ընտրակարգին անցնելը։
«Անցումը կառավարման խորհրդարանական համակարգին ենթադրում է, որ 2013-ին ընտրվող նախագահը գործելու է առավելագույնը չորս տարի ժամկետով և մինչև խորհրդարանական հաջորդ ընտրությունները (2017 թ.)` քաղաքական մյուս ուժերի հետ իրականացնելու է սահմանադրական համապատասխան փոփոխություններ և հիմք է դնելու նոր համակարգի»,- ասվում է հայտարարության մեջ:
Այս կապակցությամբ ԲՀԿ-ն կսկսի խորհրդակցությունների շարք այլ քաղաքական ուժերի հետ` տեսնելու, թե արդյոք կա՞ ահա այս գաղափարի շուրջը համախմբվելու հնարավորություն:
«Ժառանգություն» կուսակցության անդամ, քաղաքական վերլուծաբան Ստեփան Սաֆարյանը ողջունելի է համարում այս առաջարկը և նշում է, որ «Ժառանգություն» կուսակցությունն ամբողջովին բաց է քննարկումների համար:
«Ողջունելի է, որ քաղաքական ուժերից մեկը համախոհ է այն ծրագրին, որը «Ժառանգության» առանցքային խնդիրներից մեկն է և համակարգված բարեփոխումների ծրագրի մեջ է մտնում, որը դեռ ներկայացվել է մեր կուսակցության կողմից 2012-ի խորհրդարանական ընտրություններում»,- «Մեդիալաբին» ասում է Սաֆարյանը:
Լինելով խորհրդարանական կառավարման մոդելի ջատագով՝ Սաֆարյանը կարծում է, որ Հայաստանի ավտորիտարիզմի խորացմանը մեծապես նպաստում է ներկայիս սահմանադրական կարգը:
«Նախագահական կառավարումը բերում է երկրի ավտորիտար ռեժիմի խորացմանը և ժողովրդավարացման նահանջին: Այլընտրանքը Հայաստանի համար, ըստ վերջին 10 տարիների փորձառության, սա է՝ անցում խորհրդարանական կառավարման»,- հավելում է Սաֆարյանը:
Մինչդեռ Արմեն Բադալյանի կարծիքով` կա ևս մի կարևոր հանգամանք` արդար, թափանցիկ ընտրությունների անցկացում և ժողովրդավարության համակարգի ձևավորում:
«Եթե ընտրություններն արդար չանցան, ժողովրդավարական համակարգ չձևավորվեց, ապա խորհրդարանական կառավարման մոդելի դեպքում վարչապետը նույն կշիռը կունենա, ինչ այսօր նախագահն ունի: Այսինքն` կապ չունի խորհրդարանակա՞ն կառավարման մոդել է, թե՞ նախագահական, ամեն ինչ պայմանավորված է ժողովրդավարության կառուցման կամքով»,- «Մեդիալաբին» ասում է Բադալյանը:
Մատնանշելով խորհրդարանական կառավարման դրական կողմերը՝ Բադալյանն ասում է , որ այսօր քաղաքական դաշտում աչքի ընկնող, կրեատիվ քաղաքական գործիչները չեն կարողանում իրենց դրսևորել, նրանք դառնում են այս կամ այն քաղաքական կուսակցության առաջնորդին սատարող ուժ, և այս իմաստով նույնպես խորհրդարանական կառավարման մոդելը նպաստող դեր կունենա:
«Մեր երկրում քաղաքական մշակույթն այնպիսին է, որ ով անցնում է նախագահի պաշտոնի, երկիրը տանում է ոչ ժողովրդավարացման: Հիմա ԲՀԿ-ն առաջարկում է, որ այս երևույթը պետք է անջատել, բարեփոխումների միջոցով պետք է վերացնել»,- ասում է Բադալյանը:
Լիլիթ Առաքելյան
© Medialab.am
