«Մեդիալաբի» հարցերին պատասխանում է իրավապաշտպան Ժաննա Ալեքսանյանը
– Տիկի՛ն Ալեքսանյան, երեկ, երբ խորհրդարանական ընդդիմադիր երեք կին պատգամավոր մուտք գործեց Կառավարության երրորդ մասնաշենք՝ իրենց դժգոհությունն արտահայտելու նախարար Անահիտ Ավանեսյանին, եղան մարդիկ, որոնք դժգոհեցին շենքի անվտանգությունն ապահովող ոստիկաններից: Նրանց համոզմամբ՝ ոստիկանները չպետք է թույլ տային պատգամավորներին ներխուժել շենք: Համակարծի՞ք եք, որ ոստիկանները իրենց առաքելությունը պատշաճ չեն իրականացրել:
– Նախ խոսեմ այդ կանանց պահվածքի մասին. նրանք դրսևորել են անվայել պահվածք՝ իրենց լրիվ արտոնյալ զգալով, որ իրենք իրավունք ունեն և ում հետ ինչպես ուզեն՝ կարող են խոսել, բայց ո՞վ են նրանք: Ո՞վ են ընդհանրապես այդ երեք կին պատգամավորը, որոնց հանրությունը չի հասցրել ճանաչել, եթե նույնիսկ ճանաչեին՝ ինչպե՞ս կարելի է այդպիսի պահվածք դրսևորել:
Գրոհել են նախարարի աշխատասենյակ, ամոթանք են տալիս, իսկ ի՞նչ են արել իրենք որևէ զինվորի համար, ինչ-որ մեկի կողքին այդ երեքից ո՞վ է կանգնել: Այդ կեղծ հայրենասիրությունը, որ իրենք բեմադրում են, նկարներ են տանում, իսկ ի՞նչ է արել ընդդիմությունը հազարավոր ծանր վիճակում գտնվող զինվորների ընտանիքների համար: Այդ ի՞նչ էին արել նրանց համար, որ եկել էին նախարարին ամոթանք տալու:
Ոստիկանությունն ի՞նչ պետք է աներ, այսինքն՝ ի՞նչ կարող էր անել, որ պրծներ դրանց շառից: Ես տեսանյութը տեսա, չնայած այդ ագրեսիվ վարքագծով մուտք գործելուն, այնուամենայնիվ, ամեն բան այդքան կանխատեսելի չէր: Ոստիկանները չգիտեին, թե իրենց ինչպես պահել, այդ իրավիճակն էր: Ես ոստիկաններին չեմ մեղադրում ու չեմ էլ համարում, որ իրենց վատ են պահել:
Բայց ես կհորդորեի առողջապահության նախարարին դատի տալ այդ կանանց, որոնք ներխուժել էին ու խաթարել իր անդորրը, ամոթանք էին տալիս: Չեմ կարծում, որ նախարարը պետք է այդ պահվածքը հանդուրժի, որ այդ շենքը, այսպես ասած, պրոխոդնոյ դվոր չդառնա, որ Աննա Մկրտչյանը երբ ուզենա գա, նախարարին ամոթանք տա, գնա: Ես ամաչում եմ, որ մենք այդպիսի պատգամավորներ ունենք: 24 տարեկան է այդ Աննա Մկրտչյանը, նրան իրենց տանը չե՞ն դաստիարակել, չեմ հասկանում:
– Բայց կան մարդիկ, որոնք ողջունում են պատգամավորների այդ արարքը, օրինակ՝ «Հայաստան» խմբակցության պատգամավոր Արամ Վարդևանյանը ֆեյսբուքյան իր էջում տարածել էր այդ տեսանյութն ու կից գրել, որ ութերորդ գումարման ԱԺ-ն կհիշվի «իր խիզախ, հայրենասեր ու պայքարող» կին պատգամավորներով:
– Այդ կերպ հաճոյանում են իրենց առաջնորդին: Չեմ կարծում, թե դա սոսկ այդ կանանց նախաձեռնությունն էր, պարզ է, որ համաձայնություն են ստացել իրենց առաջնորդներից: Չեմ էլ զարմանում, որ նրանք հիացած են իրենց պատգամավորների պահվածքով: Իրենք են ուղարկել, ի՞նչ պետք է անեին, չհիանայի՞ն:
– Պատգամավորների արարքը քննադատողներին ընդդիմադիրները հիշեցնում են, որ երբ նախարար Ավանեսյանի գիտությամբ զինվորների մասունքները պարկերով նկուղներում էին, ոչ ոք այն ժամանակ բառ չասաց, տիկի՛ն Ալեքսանյան:
– Ո՞վ է ասել, որ ոչ ոք չի արձագանքել: Շատ մեծ աղմուկ բարձրացավ, հարցին անդրադարձավ նաև վարչապետը, այնպես որ, դա սուտ հայտարարություն է: Չեմ ոգևորվում նախարարի աշխատանքով, համարում եմ, որ դա թերի է, բայց հիմա ի՞նչ կարիք կա դա շահարկելու: Իբր իրենք էլ հայրենասերնե՞րն են: Իրենց քաղաքական ակցիաներին հենց իրենց պահվածքի պատճառով շատ մարդ չի միանում, իրենց նմաններն են այնտեղ հավաքված: Կանայք ամենավատ օրինակն են ցույց տալիս, չեմ պատկերացնում, որ այդպիսի կանայք կարող են օրինակ լինել մեր հանրության, աղջիկների համար: Իրենց պետք զսպել, որպեսզի նման պահվածք թույլ չտան:
Քրիստինե Աղաբեկյան
MediaLab.am
