Ամիսներ շարունակվող փոխոստիկանապետի պաշտոնանկության մասին խոսակցություններն այսօր կարծես թե իրականություն են դարձել, որի մասին խոսել է հենց ինքը` Ռոբերտ Մելքոնյանը: Ինչպես միշտ, նա չի զրկել իր ընկերներին եւ Ֆեսյբուկ սոցիալական ցանցի օգտատերերին իր գրառումները կարդալու հաճույքից, ուր խոսել է իր այլեւս նախկին ոստիկան լինելու, զգացմունքները կիսել աշխատանքի հանդեպ ունեցած նվիրման մասին:
Գրառումն ամբողջությամբ`ստորեւ:
«Ցնծացեք, ցնծացեք որոշակի շրջանակներ, վայելեք հաճույքը…Կատարվեց շատ-շատերի երազանքը, ես այսուհետ նախկին ոստիկան եմ… Հպարտ եմ, որ աշխատել եմ ՆԳ եւ ոստիկանական համակարգերում, աշխատել եմ տարբեր պաշտոնների, բավականին լարված, բարդ, հակասական, վճռորոշ ժամանակաշրջանում՝ խորհրդային տարիներից առ այսօր:
Համակարգում ինչ պաշտոն էլ, որ վարել եմ, աշխատել եմ նվիրումով, պատասխանատվությամբ, նկատվել, առանձնացել ընդհանուրից իմ աշխատանքային պարտականությունների կատարմանը ստեղծագործաբար, պրոֆեսիոնալ եւ լրջագույն մոտեցում ցուցաբերելու ունակությամբ:
Համակարգի հազարավոր աշխատակիցներից առանձնացել եմ նաեւ ժողովրդի հետ անմիջական շփման, իմ նախաձեռնությամբ «ՖԲ»-ում ձեզ հետ բարեկամանալու, համագործակցելու, ինչու չէ ոստիկանություն-հասարակություն կապի ամրապնդմանը մի փոքր լումա ներդնելու գործում: Ժողովուրդ, գիտե՞ք ինչն էր ինձ համար ամենամեծ գնահատականը, այն որ դուք ինձ չէիք դիմում որպես
Երեւանի փոխոստիկանապետի, ես ձեզ համար փոխոստիկանապետ էի, որին հղում էիք առաջարկներ, խնդիրներ, հղում հարցեր հենց ողջ ոստիկանական համակարգի վերաբերյալ: Շնորհակալ եմ ու չեմ ուզում համեստություն անել, դուք իմ կարծիքով ճիշտ էիք գնահատել իմ արժանիքները եվ ակամա ինձ բարձր պաշտոն էիք տվել եւ որը իմ կարծիքով ես հաջողությամբ կատարեցի…
Ինչեւէ, ես այլեւս ոստիկան չեմ, բայց ոստիկանությունը եղել է իմ կյանքը, իմ անցած երկարամյա ուղին եւ միշտ կմնա ինձ հարազատ… Դեռ կյանքը ցույց կտա ոստիկանությու՞նը կորցրեց ինչ-որ բան իմ հեռանալով, թե՞ ես այլ աշխատանքի անցնելով… Ինձ թվում է երկուստեք կորցրեցինք շատ-շատ բան… Հարգելի «ՖԲ»-ներ մնում եմ ձեր բարեկամը, ես ձեզ սիրում եւ հարգում եմ:Նույնիսկ նրանց, որոնց թիրախում եմ գտնվել մշտապես, գուցե որոշ դեպքերում նաեւ տեղին…
Աստված ձեզ հետ»:
© Medialab.am
