«Եղնիկներ» զորամասում հերթական դժբախտ դեպքը կրկին անգամ քննարկումների եւ դժգոհությունների ալիք է բարձրացրել:
Դեկտեմբերի 14-ին «Եղնիկներ» զորամասում ենթասպա Արմեն Թովմասյանը 10.30-11.00-ի սահմաններում Էջմիածնից զորակոչված 18-ամյա ժամկետային զինծառայող Նարեկ Ավետիսյանի աչքին շղթայով հարվածելով այնպես է վնասել այն, որ զինվորը կորցրել է տեսողական օրգանը:
«Չենք լռելու»-ի ակտիվիստներն այսօր այցելել են Մալայանի անվան աչքի կենտրոն, զրուցել զինվորի և նրա հարազատների հետ:
Նարեկի հայրը` Անդրանիկը, պատմել է, որ զորամասի ճաշարանի պետ Արմեն Թովմասյանը ցանկացել է Նարեկին վերակարգ նշանակել, սակայն վերջինս հրաժարվել է` պատճառաբանելով, որ նոր է իջել դիրքերից: Ի պատասխան դրան, Արմեն Թովմասյանը հետևից անսպասելիորեն մեծ շղթայով հարվածել է Նարեկին, ինչի արդյունքում վնասել է աչքը:
Ստացված հարվածից հետո Նարեկին տեղափոխել են Ստեփանակերտի հիվանդանոց` զգուշացնելով, որ եթե հարցնեն, թե ինչ է պատահել, պատմի, թե բանալին վերևից քցել են, որի արդյունքում այն ընկել է աչքին:
«Ի դեպ, դա ընդունված պրակտիկա է Հայաստանի զինված ուժերում»,-հաղորդագրության մեջ նշում է «Չենք լռելուն»:
Հոր խոսքերով, հարվածած սպայի ընկերներն ու բարեկամներըը ողջ օրը զանգում են իրեն` հորդորելով «ներել»:
«Բայց ներում չկա,-տեսանյութում ասում է Անդրանիկ Ավետիսյանը,- սրան ի՞նչ ներում»:
Ըստ Անդրանիկ Ավետիսյանի, այս օրերի ընթացքում պաշտպանության նախարարությունից որևէ մեկն իրենց չի այցելել: Զանգերին չի պատասխանում նաև ՊՆ-ի 1-88 «շուրջօրյա թեժ գիծը»:
Հատկանշական է, որ Արմեն Թովմասյանն ազատության մեջ է, դեպքի առթիվ քրեական գործ դեռևս չի հարուցվել:
Կից տեսեք «Չենք լռելու»-ի պատրաստած տեսահոլովակ կատարվածի մասին: http://www.youtube.com/watch?v=Tgi6zVSi2-Y&feature=youtu.be
© Medialab.am
