5 րոպե մեջքով ՀՀԿ դեռեւս պատգամավոր, «Հարսնաքար» ռեստորանային համալիրի սեփականատեր Ռուբեն Հայրապետյանի «ապարանքի» մոտ Վահե Ավետյանի հիշատակին հարգանքի լռության րոպեններից հետո, բողոքի ակցիայի բազմաթիվ մասնակիցները սկսեցին միաձայն «նեմեց մարդասպան» վանկարկել:
Ինչպես տեղեկացնում են «Մեդիալաբի» լրագրողները, բազմաթիվ ոստիկանները շրջապատել էին Ռուբեն Հայրապետյանի տունը, ուղեկցնում են բողոքի երթի մասնակիցներին:
«Իսկ ու՞ր էին այս ոստիկանները, երբ մարդ էին սպանում, թփերի մեջ թաքնվա՞ծ էին»,-բարձր բոլորին դիմեց Վարդգես Գասպարին, որին կրկին հետեւեցին «նեմեց մարդասպան» վանկարկումները:
Փորձելով հանդարտեցնել խիստ լարված իրավիճակը, «Ժառանգության» նախկին պատգամավոր Լարիսա Ալավերդյանն ասաց, թե «ոստիկաները ծառայության մեջ են եւ պետք չէ նրանց մեղադրել»:
Բողոքի ակցիայի բազմաթիվ մասնակիցները, որոնց մեջ հայտնի հասարակական գործիչներ, քաղաքական դեմքերը, ակտիվիստներ եւ երկրի համար մտահոգ քաղաքացիները կրկին շարժվում են «Հարսնաքարի» ուղղությամբ, ուր նրանց թույլ չտվեցին ի հիշատակ Վահե Ավետյանի մոմավառություն իրականացնել:
Չնայած Ռուբեն Հայրապետյանի խիստ զգայական նամակին՝ «ամեն ինչ կտայի, որ այս այն», եւ մանդատը վայր դնելու մասին հայտարարությանն, այսօր ոչ միայն աննախադեպ այլեւ անսպասելի բռնություն է կիրառվեց «Հարսնաքար» ռեստորանի մոտ նախատեսված մոմավառություն բողոքի ակցիայի մասնակիցների հանդեպ: Ուժայինները սեռական բնույթի հայհոյանքներ տեղացին մասնակիցների հասցեին, ոմանց, ինչպես նաեւ «Մեդիալաբի» լրագրողին բռնության ենթարկեցին:
Ինչպես «Հարսնաքարից» տեղեկացրել էին «Մեդիալաբի» լրագրողները, փողոցով մեկ ցաքուցրիվ էին եղած մոմավառության համար նախատեսված մոմերն ու այդ նպատակի համար նախատեսված բաժակները:
Հիշեցնենք, որ հունիսի 17-ին «Հարսնաքար» ռեստորանային համալիրում անվտանգության աշխատողների կողմից վայրագ ծեծի ենթարկվելու հետեւանքով, 12 օր անց՝ հունիսի 29-ին ռազմական բժիշկ Վահե Ավետյանը մահացավ հոսպիտալում: Վահե Ավետյանի մահը հազարավոր մարդկանց հանեց փողոց՝ պայքարելու արդարության եւ մեղավորներին արժանի պատժի արժանացնելու համար:
Ավելի ուշ «Մեդիալաբի» ֆոտոպատմությունն ու տեսանյութը՝ այսօրվա բողոքի ակցիայի վերաբերյալ:
© Medialab.am