Ո՞նց էր համը իմ ձագի. Բնապահպանները`«Խոսրով պետական արգելոցում» տիրող խայտառակ վիճակի մասին /Տեսանյութ/

Ո՞նց էր համը իմ ձագի. Բնապահպանները`«Խոսրով պետական արգելոցում» տիրող խայտառակ վիճակի մասին /Տեսանյութ/
Ո՞նց էր համը իմ ձագի. Բնապահպանները`«Խոսրով պետական արգելոցում» տիրող խայտառակ վիճակի մասին /Տեսանյութ/

Մորթված կենդանիներ, մորթի, գլուխ, աղիքներ…
«Խոսրովի արգելոցում» տիրող խայտառակ վիճակի մասին են բարձրաձայնել բնապահպանները, ի դեմս «Խոսրովի արգելոց» քաղաքացիական նախաձեռնության, ներկայացնելով ինչպես լուսանկարներ, այնպես էլ տեսանյութ:
«Մեր մուտքը արգելումա նախարարը, բայց ներսում դրած ջնջխում են Կարմիր գրքում գրանցված վայրի կենդանիներին, է’ նախարար, պարզից էլ պարզա, որ մեր դեմ ես մուտքը փակում, բայց որքա՞ն կարող եք կոծկել այս պատժելի հանցագործությունները,-ասում է հայտնի բնապահպան Մարիամ Սուխուդյանը եւ շարունակում,-«Պատասխան եք տալու»:
Նախաձեռնության անդամները մեջբերում են ՀՀ քրեական օրենսգրքի 294-րդ հոդվածը, որի համաձայն՝ապօրինի որսը, որը «կատարվել է այնպիսի թռչունների և վայրի կենդանիների նկատմամբ, որոնց որսն ամբողջովին արգելված է», «կատարվել է որսի իրականացման այլ սահմանափակումների խախտմամբ» պատժվում է տուգանքով` նվազագույն աշխատավարձի չորսհարյուրապատիկից վեցհարյուրապատիկի չափով, կամ կալանքով` չորսից վեց ամիս ժամկետով:
Օրենքի հղմամբ, ուրիշ դրույթի անդրադառնալով, բնապահպանները նշում են, որ նույն արարքները, որոնք կատարվել են՝ «պաշտոնեական դիրքն օգտագործելով», «մի խումբ անձանց կողմից նախնական համաձայնությամբ», պատժվում են տուգանքով` նվազագույն աշխատավարձի հինգհարյուրապատիկից յոթհարյուրապատիկի չափով, կամ ազատազրկմամբ` առավելագույնը չորս տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը չորս տարի ժամկետով»:

ՀՀ քրեական օրենսգրքի 298-րդ հոդվածի համաձայն՝ արգելոցների, արգելավայրերի, ազգային պարկերի, բնության հուշարձանների և պետության կողմից հատուկ պահպանվող բնական այլ տարածքների կամ օբյեկտների ռեժիմը խախտելը, որը դիտավորությամբ կամ անզգուշությամբ առաջացրել է էական վնաս՝ պատժվում է տուգանքով՝ նվազագույն աշխատավարձի երկուհարյուրապատիկից հինգհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով:

«Պետբյուջեից գումարներ են հատկացվում տարածքը պահպանելու համար, էս ի՞նչ ա կատարվում, պարոն նախարար»,-բնապահպանության նախարարին դիմելով հարցնում է Սուխուդյանը:

Իրենց ձայնը բարձրացնելով, «Խոսրովի անտառ» քաղաքացիական նախաձեռնությունը նաեւ հայտարարություն է տարածել, որը ստորեւ ներկայացնում ենք ամբողջությամբ:

«ՀՀ կառավարությունը 24.05.2007թ. ընդունել է «Խոսրովի անտառ» պետական արգելոցի տարածքում «Գիլան» պետական արգելավայր ստեղծելու մասին թիվ 673-Ն որոշումը, որով «Խոսրովի անտառ» պետական արգելոցի կազմում ստեղծել է այսպես կոչված` «Գիլան» պետական արգելավայր` նրան ամրացնելով «Խոսրովի անտառ» պետական արգելոցի «Բայբուրդ» կոչված տեղամասը` 118 հեկտար տարածքով: Այս որոշման արդյունքում փոփոխություններ են մտցվել «Խոսրովի անտառ» պետական արգելոց» ՊՈԱԿ-ի կանոնադրության մեջ եւ 29-րդ կետը լրացվել է հետևյալ բովանդակությամբ նոր պարբերությամբ`«Գիլան» պետական արգելավայրի համապատասխան հողամասերը կարող են կառուցապատման իրավունքով տրամադրվել մինչեւ 60 տարի ժամկետով, գյուղատնտեսական գործունեության համար հողամասերը կարող են վարձակալության իրավունքով տրամադրվել մինչեւ 10 տարի ժամկետով, խոտհնձի համար` մինչև 5 տարի ժամկետով»:

Այս որոշումների նախագծերը չեն անցել Օրհուսի կոնվենցիայով սահմանված հանրային լսումները:

Սույն թվականի հուլիսի 30-ին Խոսրովի արգելոցի վերաբերյալ բնապահպանության նախարարի գլխավորությամբ տեղի ունեցած քննարկման ժամանակ նախարարի կողմից եղավ հավաստիացում, որ արգելոցի կարգավիճակը վերականգնելուց հետո «Գիլան» արգելավայրի տարածքում կառուցված շինություններն այլեւս անօրինական կարգավիճակ ունեն ու ապամոնտաժվելու են, որի համար անհրաժեշտ է անցնել իրավական ընթացակարգեր: Հավաստիացում եղավ նաեւ, որ դադարեցվելու է ճանապարհաշինությունը, մինչեւ բնապահպանության նախարարությունում այդ հարցը չքննարկվի: Նշվեց նաեւ, որ մշակվել է «Բնության հատուկ պահպանվող տարածքների մասին օրենքում լրացումներ եւ փոփոխություններ կատարելու մասին» օրենքի նախագիծ, որտեղ արտացոլված են հանրության մտահոգությունները եւ որը առաջիկա օրերին կներկայացվի հանրության դատին:

Վերը նշված հավաստիացումները հույս են ներշնչում, որ հանրությունը գործուն մասնակցություն կունենա «Խոսրովի անտառի» եւ Հայաստանի մյուս հատուկ պահպանվող տարածքների իրավական կարգավիճակի` միջազգային չափանիշներին համապատասխան կարգավորման, դրանց կառավարման եւ որոշումների կայացման գործընթացին:

Այնուհանդերձ, չի իրականացվել մեր կողմից ներկայացված պահանջներից մեկը: Այն է` պատասխանատվության ենթարկել այն պաշտոնատար անձանց, ում գործողությունների հետեւանքով «Խոսրովի անտառ» արգելոցից անօրինական կերպով առանձնացվել է «Գիլան» արգելավայրը` վնասելով արգելոցի բնականոն վիճակը: Մենք համոզմունք ենք հայտնում, որ քանի դեռ Հայաստանում չի գործում օրինազանց պաշտոնատար անձանց պատասխանատվության ենթարկելու ինստիտուտը, մեր երկրում շարունակվելու են կայացվել անօրինական որոշումներ եւ վարչական ակտեր»:

© Medialab.am

http://www.youtube.com/watch?v=eYX71Qz9GwI