Երեւանի ավագանու ընտրություններում «Բարև Երևան» դաշինքի ցուցակում ընդգրկված Ալեն Սիմոնյանը բաց նամակ է հղել դաշինքին եւ «Բարգավաճ Հայաստան» կուսակցությանը` կոչ անելով հրաժարվել ավագանու տեղերից:
Հիշեցնենք, որ երեկ կայացած ավագանու ընտրություններում, ըստ պաշտոնական նախնական տվյալների, ձայների 55,86 տոկոսով հաղթանակ է տարել իշխող ՀՀԿ-ն, ինչը նշանակում է, որ կուսակցության համամասնական ցուցակը գլավորող գործող քաղաքապետ Տարոն Մարգարյանը կրկին կզբաղեցնի այդ պաշտոնը:
ԿԸՀ տվյալների համաձայն, ՀՀԿ-ին ստացած ձայներով հաջորդում է ԲՀԿ-ն, երրորդը «Բարև Երևան» դաշինքն է: Նվազագույն շեմը չհաղթահարած ՕԵԿ-ը, ընդդիմադիր ՀԱԿ-ը եւ ՀՅԴ-ն տեղ չեն ունենա քաղաքի իշխանություններում:
Ընտրությունների ողջ օրվա ընթացքում, թեեւ բազմաթիվ ահազանգեր էին հնչում ընտրախախտումների, ճնշումների, հարկադրանքի եւ ընտրակաշառքի եւ այլնի վերաբերյալ, այնուամենայնիվ շատերը` հաշվի առնելով նախորդ ընտրությունների փորձը, թերահավատ են, թե խախտումների բարձրաձայնում եւ ահազանգերը ինչ որ բան կարող են փոխել:
Ուստի Ալեն Սիմոնյանը բաց նամակով դիմելով դաշինքին եւ ԲՀԿ-ին, որոնք ՀՀԿ-ի հետ ձեւավորելու են քաղաքային ավագանին, կոչ է անում նմամ կերպ բոյկոտի գնալ:
«Հարգելիներս, դիմելով Ձեզ, որպես ՀՀ քաղաքացի, որպես ընկեր և գործընկեր խնդրում և պահանջում եմ Ձեզնից ամբողջ կազմով հրաժարվել ավագանու տեղերից և ավագանին ամբողջությամբ հանձնել ՀՀԿ-ին և Տարոն Մարգարյանին: Դրանով քաղաքական և իրավական կոլապս առաջացնել նոր գնված և զոռբայաստեղծ ավագանիում: ՀՀ հպարտ քաղաքացի, Բարև Երևան» դաշինքի ավագանու թեկնածու` Ալեն Սիմոնյան»,-գրում է դաշինքի 12-րդ համարը զբաղեցնող Սիմոնյանը:
Բաց նամակը թե դաշինքի, եւ թե ԲՀԿ կողմից դեռեւս արձագանքներ չի ստացել:
Լուսանկարում` Ալեն Սիմոնյանը-aravot.am
© Medialab.am
