Ազգային ժողովի Ժառանգություն խմբակցության պատգամավոր Զարուհի Փոստանջյանն այսօր լրագրողների հետ հանդիպմանը պարզաբանեց, թե ինչու է ԵԽԽՎ աշնանային նստաշրջանում Սերժ Սարգսյանին խաղատանը 70 մլն եվրո գումար պարտվելու վերաբերյալ հարց ուղղել:
Հիշեցնենք, որ հոկտեմբերի 2-ին ԵԽԽՎ աշնանային նստաշրջանի լիագումար նիստում Սերժ Սարգսյանի ելույթից հետո Զարուհի Փոստանջյանը նրան հարցրել էր.
«Դուք վերջերս եղել եք Եվրոպայում` կազինոյում, քանի որ դուք հանրությանը հայտնի եք որպես խաղամոլ, և այնտեղ կորցրել եք 70 միլիոն եվրո: Ո՞վ է վճարել Ձեր տեղը այդ կորցրած գումարի համար»:
Ի պատասխան Սերժ Սարգսյանն ասել էր. «Դա ձեր հերթական երևակայության արդյունքն է: Ես երբեք չեմ եղել Եվրոպայի որևէ կազինոյում, ես չեմ խաղում կազինոներում, ես, ցավոք սրտի, հնարավորություն չունեմ տնօրինելու 70 միլիոն եվրո: Եթե այդպիսի հնարավորություն ունենայի, մի մասը ձեզ կնվիրեի, որպեսզի գոե կյանքից գոհ լինեք»:
Զարուհի Փոստանջյանն այսօր լրագրողներին ասաց, որ իր հարցը հայ ժողովրդի 80 տոկոսի անունից է հնչեցրել այդ հարցը:
Նրա խոսքով՝ հարցն ուներ հետևյալ նախաբանն ու ենթատեքստը՝ Սերժ Սարգսյանը չի կարող ներկայացնել հայ ժողովրդի կամքը մի պարզ պատճառով՝ նա նախագահի աթոռին հայտնվել է կեղծված ընտրությունների արդյունքում, կազմակերպված հանցագործության միջոցով, ներկայացնում է կրիմինալ խմբավորում:
Փոստանջյանը նշեց, որ նախքան իր հարցը հնչեցնելն էր Սերժ Սարգսյանը խայտառակված, և ինքը չէ, որ պետք է նրան խայտառակեր:
«Մենք վաղուց արդեն խայտառակված ու վարկաբեկված ենք, մենք այսօր նսեմացված վիճակում ենք գտնվում: Անկախանալուց հետո Հայաստանից 1.5 մլն մարդ է հեռացել: Սա հենց այս խայտառակ անձի միջոցով է, որ այս հանգրվանին ենք հասել»,- ասաց նա:
Զարուհի Փոստանջյանի խոսքով՝ խայառակությունն այն է, երբ Հայաստանի ժողովրդրի 35 տոկոսն աղքատ է, մարդիկ արտագաղթում են, խայտառակությունն այն է, երբ Սերժ Սարգսյանը հայտարարում է, թե սահմանամերձ գյուղերը պետք է վերանան:
Փոստանջյանի խոսքով՝ ինքը նաև եվրոպացի պաշտոնյաներին է որպես մեսիջ ուղղել իր հարցը, հասկացրել նրանց, որ նման անձի են հովանավորել, աչք են փակել կեղծված ընտրությունների վրա ու հայտարարել, թե նախագահի ընտրությունները առաջընթաց են արձանագրում:
Հիշեցնենք, որ Զարուհի Փոստանջյանի հարցը բուռն քննարկումների առիթ հանդիսացավ Հայաստանում: Ընդդիմադիր ուժերն ու առանձին գործիչներ շատապեցին հայտարարել, որ ավելի կարևոր հարցեր կարելի էր երկրի ղեկավարին ուղղել ԵԽԽՎ-ում:
«Բոլոր քաղաքական ուժերի ներկայացուցիչներն ունեին հացեր տալու այդ հնարավորությունը, կարող էին գրանցվել և ավելի կարևոր հարց ուղղել, եթե ավելի կարևոր հարցեր ունեին»,- իր հասցեին հնչեցվող մեղադրանքներին այսպես պատասխանեց Փոստանջյանը:
Նա ասաց, որ համամիտ չէ այն տեսակետների հետ, որ ոմանք Սերժ Սարգսյանին պետականության հետ են ասոցացնում և ասում, որ իր հարցով ինքը վտանգել է Հայաստանի պետականությունը:
Զարուհի Փոստանջյանը նշեց, որ խղճում է այդպես մտածող անձանց:
Հիշեցնենք, որ Փոստանջյանի հարցից հետո Ազգային ժողովի նախագահ Հովիկ Աբրահամյանը հայտարարել էր, որոշել է նրան հանել ԵԽԽՎ հայաստանյան պատվիրակության կազմից: Զարուհի Փոստանջյանը նշեց, որ իր կարծիքով՝ դա Սերժ Սարգսյանի ցանկությունն է: Նա նշեց, որ դիմել է ԵԽԽՎ կանոնակարգ հանձնաժողով, հարցը քննարկվել է ԵԽԽՎ բյուրոյում:
«Երբ Հովիկ Աբրահամյանի կողմից կլինի պաշտոնական քայլ, այդ ժամանակ ԵԽ կողմից պաշտոնական արձագանք կլինի»,- ասաց նա:
© Medialab.am
