Կառավարությանը մտահոգում են գազի ցածր կալորիականության վերաբերյալ վերջին շրջանում բնակչությունից ստացվող բողոքները: Գազի որակը ստուգելու համար գործադիրն այսօրվա նիստում որոշեց հանձնաժողով ստեղծել:
Էկոնոմիկայի նախարարության գլխավորությամբ ստեղծվելիք հանձնաժողովի կազմում կընդգրկվեն գիտնականներ, Հանրային խորհրդի անդամներ, ինչպես նաև հասարակական կազմակերպությունների ներկայացուցիչներ:
Հանձնաժողովի ստեղծման առաջարկությունը վարչապետ Տիգրան Սարգսյանին արեց Հանրային ծառայությունները կարգավորող հանձնաժողովի նախագահ Ռոբերտ Նազարյանը: Երբ վարչապետը նրանից հետաքրքվեց, թե ինչպե՞ս կարելի է հանրությանը գազի որակի վերաբերյալ մասնագիտական մատչելի բացատրություններ ներկայացնել, Նազարյանն առաջարկեց հանձնաժողով ստեղծել:
Վարչապետն ասաց, որ մտահոգիչ են հանրության կողմից ստացվող բողոքները, պետք է հասկանալ, թե ինչ է տեղի ունենում:
«Պետք է հասկանանք՝ ի՞նչ կարող ենք անել, որ վստահությունը գազի կալորիականության նկատմամբ հանրության կողմից մեծանա»,- վարչապետին ասաց Ռոբերտ Նազարյանը:
Նրա խոսքով՝ Հանրային ծառայությունները կարգավորող հանձնաժողովը ևս վերջին ժամանակահատվածում բողոքներ է ստանում գազի որակի հետ կապված: Անկախ լաբորատորիա ստեղծելու համար, Ռոբերտ Նազարյանի խոսքով, 25-60 հազար դոլար է անհրաժեշտ:
Մասնագետներն, ըստ վարչապետի, կառավարություն ներկայացրել են եզրակացություն այն մասին, որ գազի կալորիականության արհեստական փոփոխություն իրականացնելն անհնար է:
Այնինչ բնակչությունը, վարչապետի խոսքով, բողոքում է, թե գազին ազոտ են խառնում:
Կառավարության նիստից հետո լրագրողները էներգետիկայի և բնական պաշարների փոխնախարար Լևոն Շահվերդյանից հետաքրքվեցին՝ գազին ազոտ խառնում են, թե՞ ոչ:
Փոխանխարարը նշեց, որ նման մեթոդի մասին տեղյակ չէ, առաջին անգամ վարչապետից լսեց:
«Մենք էլ ենք ընդունում, որ խնդիր կա, սաղ ժողովուրդն է գտնում, որ խնդիր կա, դուք կարծում եք, որ ես այդպես չե՞մ գտնում, իհարկե, գտնում եմ»,- ասաց փոխնախարարը՝ հավելելով, որ գազի որակի հետ կապված խնդիր կա, բայց թե դա ինչ խնդիր է, պետք է պարզել:
Նա նշեց, որ մասնագետներից բաղկացած հանձնաժողովը կտա բոլոր հարցերի պատասխանները, հանձնաժողովում կընդգրկվեն շահագրիգիռ բոլոր կողմերը:
Շահվերդյանը նշեց, որ Հայաստանի խոշոր ձեռնարկություններից չորսն ունեն սեփական լաբորատորիաները, պարբերաբար գազի որակն ստուգում են, կալորիականության խնդիր այսօր չեն բարձրացնում: Իսկ թե ինչո՞ւ է այս փուլում սրվել գազի որակի հարցը, ըստ փոխնախարարի, պետք է այդ հարցի պատասխանը տա ստեղծվելիք հանձնաժողովը: Նա բացառեց, որ գազի կալորիականությունը հնարավոր է նվազեցնել:
«Ճանապարհի կեսից գազի միջից կալորիան չի կարելի հանել: Կարելի է գազը գողանալ, ծավալը տանել, բայց միջի կալորիան հանել չի կարելի: Ես կարծում եմ՝ հնարավոր չէ սահմանից մինչև սպառող գազի կալորիականությունն ընկնի»,- ասաց նա:
© Medialab.am