Մարտի մեկին Ազատության հրապարակում նախատեսված հանրահավաքից ընդդիմությունը մեծ ակնկալիքներ ունի:
«Դժգոհողների թիվը շատ-շատ մեծ է, նորանոր խմբեր են ի հայտ գալիս, որոնք երբեք ըմբոստ չեն եղել, երբեք ձայն չեն բարձրացրել, հիմա շատ են: Կենսաթոշակայինի դեմ բողոքողները գումարվել են, տաքսիստները գումարվել են, ինչ-որ խնձորի այգիներից բողոքավորներ կան, գործարարններից բողոքավորներ կան, շատ մարդիկ կան, որ հույս են կապում մարտի մեկի հանրահավաքի հետ: Այդ քանակը, այդ էներգիան կկանխորոշի մեր հետագա անելիքը»,- «Մեդիալաբին» ասում է Ազգային ժողովի ՀԱԿ խմբակցության քարտուղար Արամ Մանուկյանը:
ՀԱԿ խմբակցության անդամ Հրանտ Բագրատյանը կանխատեսել է, որ մարտի մեկը կազդարարի հանրահավաքների ու բողոքի նոր ալիքի սկիզբ: Բագրատյանն այս հարցում տեսնում է նաև Ուկրաինայի Մայդանում կատարվող իրադարձությունների ազդեցությունը: Ըստ նրա, ուկրաինական զարգացումները հայկական Մայդանի ստեղծման համար հիմքեր են ստեղծում:
Արամ Մանուկյանն ասում է, որ Հայաստանում կուտակված խնդիրները հինգ Մայդան արժեն:
«Ուկրաինան արտագաղթ չուներ, սոցիալական խնդիրներ չուներ, ավելի շուտ կողմնորոշման խնդրի համար հավաքվեց Մայդանում: Մեր մոտ սոցիալական խնդիրները, արտագաղթը, իշխանության ապօրինություններն այնքան շատ են, որ որևէ շերտ չի մնացել, որի ոտքը տրորած չլինեն, որին ցավ պատճառած չլինեն»,- ասում է նա: Արամ Մանուկյանի խոսքով` մեր երկիրն ուղղակի ձեռքից գնում է, մարդը Հայաստանից դուրս է գալիս, իսկ երկում մնացածներն ուղղակի չեն կարողանում դուրս գալ:
Նա ընդգծեց, որ սոցիոլագիական հետազոտություններից մեկի համաձայն` Հայաստանի բնակչության 48 տոկոսը հնարավորության դեպքում Հայատսանը կլքի, ինչը ողբերգություն է:
«Մեր մոտիվացիան հետևյալն է` փրկել մարդկանց` այստեղ ապրելու իրավունքը»,- ասում է նա:
Քաղաքական վերլուծաբան Երվանդ Բոզոյանը համամիտ է ընդդիմության ներկայացուցիչների հետ և ասում է, որ Հայաստանում կան բոլոր հիմքերը մարտի մեկի հանրահավաքից հետո պայքարը թեժացնելու համար:
«Գիտեք, թե ինչ պայթյունավտանգ իրավիճակ է այսօր սոցիալական տեսանկյունից, մարդիկ անհամբեր սպասում են Սահմանադրական դատարանի մարտի 28-ի որոշմանը` կապված կենսաթոշակային բարեփոխումների հետ: Ես կարծում եմ, որ եթե իշխանությունները զիջման չգնան այս խնդրի շուրջ, ապա իսկապես սոցիալական պայթյունավտանգ իրավիճակը կարող է ըստ էության զարգանալ, և լուրջ հակամարտություն կառաջանա Հայաստանում, ինչը մոտավորապես եղավ Ուկրաինայում, բայց մեզ մոտ խաղաղ տարբերակով կլինի»,- «Մեդիալաբին» ասում է Երվանդ Բոզոյանը:
Նա նշում է, որ Մայդանի իրադարձությունները չեն կարող Հայաստանում տեղի ունեցող զարգացումների վրա ազդեցություն չունենալ, որովհետև սա շղթայական ռեակցիա է:
Նրա խոսքով` ցանկացած երկրում, երբ լուրջ փոփոխություն է տեղի ունենում, դա ուղղակի կամ անուղղակի հետք է թողնում մյուս երկրների վրա:
«Ուկրաինական ներկայիս Մայդանը անխուսափելի կերպով իր ազդեցությունը թողնելու է նաև հետխորհրդային մյուս երկրների վրա»,- ասում է Բոզոյանը:
ՀՀԿ-ական պատգամավորները չեն կիսում այս տեսակետները և լարվածության սրացում չեն կանխատեսում:
«Դա ինչ կանխատեսում է, ով է կանխատեսել, ես չեմ կիսում այդ կարծիքը»,- «Մեդիալաբի» հարցին կարճ պատասխան տվեց ՀՀԿ պատգամավոր Շուշան Պետրոսյանը` խուսափելով պատասխանել այլ հարցերի պատասխանելուց:
Իսկ ՀՀԿ խմբակցության ղեկավար Գալուստ Սահակյանը, ով վերջին շրջանում բացառում է Հայաստանում Մայդանի կրկնությունն ու պայքարի թեժացման մասին հայտարարություններին լուրջ չի վերաբերվում, այսօր խորդարանում, դիմելով ընդդիմադիր պատգամավորներին, հայտարարեց.
«Դուք արդեն հայտարարել եք` մարտի մեկի հավաքից հետո այստեղ Մայդան կլինի, թե չի լինի: Էն մարդիկ, որոնք մտածում են, որ Մայդան պիտի լինի Հայաստանում, թող էդ Մայդանն իրենց հոր բոստաններում լինի, բայց մեզ հետ երբեք չկապեք»:
Սակայն, ՀԱԿ խմբակցության անդամ Լյուդմիլա Սարգսյանն խորհուրդ է տալիս ոչինչ չբացառել: Նա եւս հավատում է, որ մարտի մեկը կարող է պայքարի նոր սկիզբ լինել:
«Այստեղ որոշիչն էլի ժողովուրդն է` իր դժգոհություններով, իր կուտակված խնդիրներով, Ազատության հրապարակի էներգետիկայով: Ամեն ինչ կարծում եմ` տեղում հստակ կլինի: Որոշողն այլևս քաղաքական ուժերը չեն, եկել է պահը, որ ժողովուրդն է որոշում»,- «Մեդիալաբին» ասում է Լյուդմիլա Սարգսյանը:
ՀՅԴ խմբակցության անդամ Արծվիկ Մինասյանը պայքարի թեժացումը մարտի մեկով չի պայմանավորում:
«Ես դա ավելի շատ պայմանավորում եմ կուտակված այն խնդիրներով, որոնք մեր երկիրը տանում են դեպի անդունդ»,- «Մեդիալաբին» ասում է Արծվիկ Մինասյանը:
Պատգամավորի խոսքով` ամենավատն այն է, որ իշխանութունն ընդունել է մի կեցվածք, որը հետնահանջի տեղ չի տալիս: Սա արդեն հասարակությանն ընդհանրապես կարող է հունից հանել:
Արծվիկ Մինասյանը նշում է, որ մեծ կարևորություն է տալիս պարտադիր կուտակային համակարգի շուրջ ձևավորված պայքարին, դրա շուրջ համախմբված սերունդին, որը պատրաստ է պայքարելու, վճռական է և գնալու է մինչև վերջ:
Իսկ դա, ըստ նրա, կարող է հանգուցալուծվել իշխանության համար ոչ ցանկալի սցենարներով:
«Ես կարծում եմ, որ Մայդանի ազդեցությունը կա տարբեր պատկերացումներում: Իհարկե, չէի ցանկանա, որ մայդանյան հանգուցալուծում լիներ, բայց իշխանությանը շանս է տրված, որ մի պահ հետ կանգնի, հասկանա, որ ամեն ինչում չէ, որ իրենք ճիշտ են կամ իրենց պնդումը պետք է միակ ճշմարտությունն ընկալվի: Այդպես չէ, անգամ հանրապետության նախագահն իր խոսքում ասաց, որ հասարակության 80 տոկոսը դեմ է պարտադիր կուտակային համակարգին: Եթե դեմ են, նշանակում է այդ պարդիկ պատրաստ են նաև վճռականորեն պայքարել իրենց իրավունքների համար»,- «Մեդիալաբին» ասում է Արծվիկ Մինասյանը:
© Medialab.am