«Եթե Հովիկ Աբրահամյանը մտնի որևէ կուսակցություն կամ դաշինք, նշանակում է, որ նրան իշխանություններն են ուղարկել այնտեղ»․ վերլուծաբաններ

«Եթե Հովիկ Աբրահամյանը մտնի որևէ կուսակցություն կամ դաշինք, նշանակում է, որ նրան իշխանություններն են ուղարկել այնտեղ»․ վերլուծաբաններ
«Եթե Հովիկ Աբրահամյանը մտնի որևէ կուսակցություն կամ դաշինք, նշանակում է, որ նրան իշխանություններն են ուղարկել այնտեղ»․ վերլուծաբաններ
Հեղինակ MediaLab

Հովիկ Աբրահամյանի հեռացումը ՀՀԿ-ից կարող է պայմանավորվածություն լինել Սերժ Սարգսյանի հետ, միգուցե նրա առաջ որևէ ֆունկցիա է դրված իշխանության կողմից: «Մեդիալաբի» հետ զրույցում նման դիտարկում արեց քաղաքական վերլուծաբան Ստյոպա Սաֆարյանը՝ անդրադառնալով ՀՀԿ փոխնախագահ, նախկին վարչապետ Հովիկ Աբրահամյանի՝ ՀՀԿ-ից դուրս գալու մասին որոշմանը:

«Միանգամայն կարող են պայմանավորված լինել, միգուցե Հովիկ Աբարահամյանի առաջ այդ խնդիրն է դրված, որ այդ ձևով ինքը իշխանության համար որոշակի ֆունկցիա կատարի: Այլապես նա վերջին շրջանում որևէ ֆունկցիա Սերժ Սարգսյանի ու իշխանության համար չէր կատարում»,- «Մեդիալաբին» ասում է  «Միջազգային և անվտանգության հարցերի հայկական ինստիտուտի» նախագահ Ստյոպա Սաֆարյանը:

Ըստ նրա՝ միգուցե վերջին շանսը, որը կարող է Հովիկ Աբրահամյանի համար նորից որևէ կարգավիճակ ապահովել իշխանության մեջ, ընդդիմության մեջ որոշակի ֆունկցիա կատարելն է:

«Հիմա թե այդ առումով պայմանավրվել են, թե Սերժ Սարգսյանը հաշվարկել է, սա արդեն տեխնիկական հարց է դառնում»,- հավելում է Սաֆարյանը:

Վերլուծաբանը միժամանակ նշում է՝ եթե անգամ պայմանավորվածություն չէ դա, Հովիկ Աբրահմայնանն ու նման քայլի դիմող գործիչները իշխանության համար այնքան կանխատեսելի խաղացողներ են և այնքան խոցելի, որ իշխանությունը նրանց հարցն ուղղակի մեկ վայրկյանում կլուծի: Եվ թերևս նրանք տեսել են, թե ինչ է լինում անհնազանդ վարքագիծ դրսևորելու դեպքում:

«Հանկարծ որևէ գծից շեղումն անշուշտ թանկ է արժենալու, և նրանք դա լավ գիտեն: Նրանք մաքուր կեսագրությամբ քաղաքական գործիչներ չեն, որպեսզի թքած ունենան դրա վրա»,- ասում է նա:

Ստյոպա Սաֆարյանը չի կարծում, թե իշխանության ներսում առանձնապես լուրջ գործըթնաց է տեղի ունենում այս փուլում: Նրա խոսքով՝ Հովիկ Աբրահամյանն, իհարկե, երկրորդական կուսակցական չէր ՀՀԿ-ում, նա ռեսուրսներ տնօրինող մարդ է, և պարզ է, որ նրա ամբիցիաները չեն բավարարվել:

«Նա վարչապետ է դարձել, կարող էր ընտրություններից հետո լավագույն դեպքում հավակնել նոր վարչապետի տեղին, բայց քանի որ ՀՀԿ-ն արդեն հայտարարել է, որ Կարեն Կարապետյանն առնվազն խորհրդարանական ընտրություններից հետո էլ է լինելու վարչապետ, բնականաբար Հովիկ Աբրահամյանը ոչ կարող է գնալ ու նրա ենթակայությամբ նախարար աշխատել կամ փոխվարչապետ, Ազգային ժողովի նախագահի տեղում էլ հավանաբար նրան չեն տեսնում: Եվ կուսակցության ներսում տեղի ունեցող իրադարձություները զուտ այդ դաշտում են»,- ասում է նա:

Սաֆարյանի խոսքով՝ չի բացառվում, որ Հովիկ Աբրահամյանն անձնական նեղացվածության խնդրով է դուրս գալիս ՀՀԿ-ից, բայց նա այնքան անխոցելի կերպար չէ, որ կարող է առաջնորդել որոշ ընդդիմադիրների փայփայած ու երազած իշխանափոխությունը: Բացառվում է, որ Հովիկ Աբրահամյանը դառնա ընդդիմադիր գործիչ:

«Նա չի կարող ընդդիմադիր կեցվածք ընդունել: Գալիս է ընդդիմություն, որ ժողովրդի միջոցով Սերժ Սարգսյանին պարտադրի, որ իրենց ավելի բարձր պաշտոնի՞ նշանակի: Նա գալիս է դառնալու ընդդիմություն, որ ասի՝ գիտեք, ես իմ պոտենցիալը չեմ իրացրե՞լ: Նրանք զբաղեցրել են հանրապետության ամենաբարձր պաշտոնները, հետևաբար, այն ինչ կարող էին նրանք անել այս երկրի ու ժողովրդի համար: Թերևս արել են այնքանով, որքանով այդ պոտենցիալն ունեցել են: Հիմա էլ ինչո՞վ պետք է զարմացնեն մեզ, որ՝ գիտեք մեզ հիմնական խանգարողը Սերժ Սարգսյա՞նն էր»,- հարցդրում է անում Սաֆարյանը:

Քաղաքական վերլուծաբան Աղասի Ենոքյանը կարծում է, որ տեսականորեն հետևյալ գործընթացն է տեղի ունենում՝ Հայաստանում ավելի շատ մարդ ցանկություն ունի քաղաքականությամբ զբաղվելու, քան Սերժ Սարգսյանն է թույլատրում:

«Եվ դրա հետ կապված որոշակի կոնֆլիկտներ են առաջանում իշխանական կուսակցության ներսում»,- «Մեդիալաբին» ասում է Աղասի Ենոքյանը:

Միաժամանակ նա նշում է, որ չի կարծում, թե Հովիկ Աբրահամյանը կարող է ընդդիմության շարքերը համալրել մի պարզ պատճառով՝ Հայաստանում ընդդիմություն չի կարող լինել: Հայաստանում կարող է լինել այնպիսի ընդդիմություն, ինչ որ կնշանակի Սերժ Սարգսյանը:

«Այսինքն՝ եթե Հովիկ Աբրահամյանը մտնի որևէ կուսակցություն կամ դաշինք, նշանակում է, որ նրան իշխանություններն են ուղարկել այնտեղ: Սպասենք զարգացումներին»,- ասում է Ենոքյանը:

Էմմա Մանուկյան

MediaLab.am