Օրերս համացանցում լուսանկարներ ու տեսանյութ տարածվեցին, որոնցում Արցախյան պատերազմում զոհված զինծառայողների մասունքներն էին պոլիէթիլենային տոպրակներով՝ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի նկուղի հատակում, անխնամ թափված: Լուսանկարների տարածումից ու հանրային մեծ աղմուկից հետո առողջապահության նախարարի պաշտոնակատար Անահիտ Ավանեսյանը ներողություն խնդրեց, իսկ այսօր արդեն հայտարարվեց, որ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի վարիչը և այս գործընթացում ընդգրկված 2 աշխատակից ազատվել են աշխատանքից: ՊՈԱԿ-ի տնօրենը ստացել է խիստ նկատողություն:
Կատարվածի հանգամանքները պարզելու և մեղավորներին քրեական պատասխանատվության ենթարկելու կապակցությամբ փաստաբան Գարիկ Գալիկյանը դիմել է ՀՀ գլխավոր դատախազություն:
ՀՀ գլխավոր դատախազությունից «Մեդիալաբին» տեղեկացրի՝ Գալիկյանի դիմումն այսօր ստացել են, որի ուսումնասիրությունից հետո միայն պարզ կլինի՝ կտրվի՞ ընթացք դրան, թե՞ ոչ:
«Մեդիալաբը» ներկայացված հաղորդման վերաբերյալ մի քանի հարց է ուղղել փաստաբան Գարիկ Գալիկյանին:
– Պարո՛ն Գալիկյան, ՀՀ գլխավոր դատախազին հաղորդում եք ներկայացրել՝ Դատաբժշկական կենտրոնի Աբովյան մասնաճյուղում արձանագրված դիերի և մասունքների ոչ պատշաճ պահման փաստի առնչությամբ: Ինչո՞ւ չեք սպասել, մինչև նշանակված ծառայողական քննությունն ավարտվի, և կա՞ն բավարար հիմքեր քրեական գործ հարուցելու համար:
– Ծառայողական քննություն կարող են նշանակել ու մարդուն նկատողություն տալ կամ, առավելագույնը՝ աշխատանքից ազատել, իսկ այն, ինչ տեղի է ունեցել, չեմ կարծում, թե կարելի է բավարարվել միայն անձին նկատողություն տալով, որովհետև այսօր պղծել ու անարգել մեր տղաների դիակները, որոնք հանուն մեզ կյանքները զոհեցին, համաձայնեք, որ ծառայողական քննությունը պարզապես ձեռառնելիք է:
Իրենց ներքին կանոնակարգով կարող են ծառայողական քննություն նշանակել, ես, իմ ընկալմամբ, գտնում եմ, որ կա քրեորեն պատժելի արարք, այսինքն՝ հանցակազմ արարքում, այդ պատճառով էլ հաղորդում եմ ներկայացրել:
Այսօր հեռախոսազրույց եմ ունեցել Կոտայքի մարզի դատախազի տեղակալի հետ, որը հսկում է գործը, արդեն նյութերը նախապատրաստվում են: Չեմ ուզում ավել բան ասել, որպեսզի վարույթն իրականացնող մարմինը չկաշկանդվի, բայց ես կարծում եմ, որ քրեական գործն ամեն դեպքում կհարուցվի, իսկ թե ինչ հոդվածներով և մեղադրանքներով՝ այս պահին չեմ կարող ասել:
– Այսինքն՝ գտնում եք, որ համապատասխան հիմքերն առկա՞ են՝ գործի առնչությամբ քրգործ հարուցելու համար, և Դատախազությունը ձեր հաղորդմանն ընթացք կտա:
– Կարծում եմ՝ այո՛, բայց ժամանակը ցույց կտա, ինձ թվում է, որ մեկ-երկու օրվա հարց է, որովհետև ես առձեռն եմ մուտք արել Գլխավոր դատախազություն, կարծում եմ, որ ըստ ընթացակարգերի, գործը կուղարկեն Կոտայքի դատախազություն, որտեղ էլ որոշումը կկայացվի՝ հարուցե՞լ գործ, թե՞ ոչ: Այս պահին նախապատրաստվում են նյութեր:
Ես զրուցել եմ նաև այն մարդկանց հետ, ովքեր այդ ամենը նկարահանել են ու տեղադրել համացանցում, մասնավորապես՝ Արսեն Ղուկասյանի հետ: Որքան ներում են մասնագիտական կարողություններս ու մարդկային արժեքներս, հետևողական եմ լինելու այդ գործին:
– Պարո՛ն Գալիկյան, իսկ ինչ եք կարծում՝ կատարվածի հիմնական պատասխանատուն ո՞վ է:
– Բոլորն էլ մեղավոր են, ես չեմ ուզում ամբողջ բեռը բարդել նախարարի վրա, որովհետև մեկ անձը չի կարող հսկողություն իրականացնել բոլոր տեղերում: Կարծում եմ՝ տեղի մարդիկ պետք է մի քիչ նորմալ վերաբերվեին, և եթե կար խնդիր՝ բարձրաձայնեին, իսկ եթե իրենք որևէ մեկի հրամանն են կատարել…
Էլի եմ ասում, բոլորն առանց բացառության մեղավոր են կատարվածի համար՝ ինձանից, ձեզանից սկսած, բայց կոնկրետ ո՞վ է մեղավոր, ո՞ւմ մեղադրանք կառաջադրվի կամ չի առաջադրվի, քննությունը ցույց կտա: Այս պահին ես ավել բան չեմ կարող ասել, որ նախաքննող մարմնին չկաշկանդեմ:
Եթե զգանք, որ այն ճիշտ չի աշխատում, օբյեկտիվորեն չի մոտենում խնդրին, այն ժամանակ մենք ինքներս կբարձրաձայնենք մանրամասները:
Քրիստինե Աղաբեկյան
MediaLab
