Սուրբ Զատիկի տոնի առթիվ որոշ քաղաքական ուժեր մայիսի 6-ին կայանալիք խորհրդարանական ընտրությունների քարոզարշավի պաշտոնական մեկնարկը ապրիլի 8-ից հետաձգել են ապրիլի 9-ը:
ԱԺ փոխնախագահ և Հայաստանի հանրապետական կուսակցության մամուլի խոսնակ Էդուարդ Շարմազանովը բոլորին շնորհավորում է Հարության տոնի կապակցությամբ:
«Աստված բոլորիս պահապան և թող Զատիկից հետո բոլորս մաքրված հոգիներով և բարի քրիստոնեական շարժառիթներով իրականացնենք մեր քարոզարշավը»,-ասում է նա:
«Բարգավաճ Հայաստան» կուսակցությունը քարոզարշավը կսկսի օրենքով սահմանված ժամկետում` ապրիլի 8-ից:
«Օրինաց երկիր» կուսակցությունն իր վերջին ասուլիսում նշել էր, որ նախընտրական պայքարը կսկսի ապրիլի 7-ին Ազատության հրապարակում անցկացվելիք հանրահավաքով: Եվ հաջորդ օրվանից կսկսեն քարոզարշավը:
Հայ հեղափոխական դաշնակցություն կուսակցությունն իր քարոզարշավը կսկսի ապրիլի 9-ից: ՀՅԴ ԳՄ անդամ և մամուլի խոսնակ Սպարտակ Սեյրանյանը նշում է, որ բուն քարոզարշավը սկսելու է ապրիլի 10-ին Ազատության հրապարակում նախաձեռնած հանրահավաքով: Իսկ հանրահավաքի նախօրեին՝ ապրիլի 9-ին, տեղի է ունենալու ՀՅԴ նախընտրական ծրագրի շնորհանդեսը:
Հայ ազգային կոնգրես ընդդիմադիր դաշինքը նույնպես քարոզարշավի առաջին օրը չի մեկնարկի:
«Քանի որ Զատիկ է, մենք հրապարակային միջոցառում չենք նախատեսել»,- ասում է ՀԱԿ-ի մամուլի խոսնակ Արման Մուսինյանը:
«Ժառանգություն» և «Ազատ դեմոկրատներ» դաշինքը նախընտրական քարոզարշավը կսկսի ապրիլի 9-ից: «Ժառանգություն» կուսակցության առաջնորդ Րաֆֆի Հովհաննիսյանն իր ֆեյսբուքյան էջում բոլորին հրավիրում է մասնակցելու «Ժառանգության» և«Ազատ դեմոկրատների» քարոզարշավի մեկնարկը խորհրդանշող միջոցառմանը, որը տեղի կունենա ապրիլի 9-ին, ժամը 15:00-ին «Արմենիա Մարիոթ» հյուրանոցի Տիգրան մեծ դահլիճում:
«Ձեզ հնարավորություն կընձեռվի ծանոթանալ մեր թեկնածուների և ծրագրերի հետ: Իսկ ցերեկույթն էլ ավելի կգեղեցկացնեն Վարդուհի Վարդերեսյանը, Վահան Արծրունին, «Կարին» ավանդական երգի և պարի համույթը: Մուտքն ազատ է»,- նշում է նա:
Հայաստանի կոմունիստական կուսակցությունը քարոզարշավը կսկսի ապրիլի 10-ին: Ըստ ՀԿԿ նախագահ Ռուբեն Թովմասյանի՝ հաշվի առնելով այն, որ առաջիկայում Սուրբ Զատիկն է, այնուհետև Մեռելոցը, տոներից հետո միայն կսկսեն քարոզարշավը:
«Միավորված հայեր» կուսակցությունը օրենքով սահմանված կարգով քարոզարշավը կսկսի ապրիլի 8-ից:
«Կուսակցության ներսում կլինի շտաբերի բացում իսկ հանդիպումները կլինեն հաջորդ օրվանից»,- ասում է կուսակցության մամուլի պատասխանատու Անուշ Ղահրամանյանը:
Հայաստանի դեմոկրատական կուսակցությունն իր քարոզարշավը կսկսի ապրիլի 8-ին, սակայն միայն հեռուստատեսությամբ: Կուսակցության նախագահ Արամ Սարգսյանը նշում է, որ Սուրբ Զատիկը կտոնեն, ապա անդրանիկ հանդիպումը կունենան ապրիլի 10-ին Պատանի հանդիսատեսի թատրոնում, որի ժամանակ կներկայացնեն նախընտրական ծրագիրը:
Լիլիթ Առաքելյան
© Medialab.am