Մինչ Ադրբեջանում կրկին հիստերիա է բարձրացել Ուրուգվայի պաշտոնյաների ԼՂՀ կատարած այցի և Արցախի հնարավոր ճանաչման հարցով հայ-ուրուգվայական ջերմ հարաբերությունների կապակցությամբ, Ադրբեջանի Միլլի Մեջլիսի պատգամավորներից մեկը հանդես է եկել խիստ ինքնատիպ առաջարկով:
Միլլի Մեջլիսի պատգամավոր Զահիդ Օրուջն առաջարկել է պետբյուջեից ֆինանսավորել «Ադրբեջանի Հանրապետության Լեռնային Ղարաբաղի մարզը»:
Ըստ ադրբեջանական լրատվամիջոցների` Զահիդ Օրուջն այդ մասին հայտարարել է խորհրդարանում` 2013-ի Ադրբեջանի պետբյուջեի նախագծի քննարկումների ժամանակ:
«Ցանկալի կլիներ պետական բյուջեից միջոցներ հատկացնել Լեռնային Ղարաբաղին, որպեսզի ողջ աշխարհին ցուցադրել, որ մենք դեմ ենք այլ աղբյուրներից այդ մարզի ֆինանսավորմանը,- ըստ ադրբեջանական ԶԼՄ-ների հայտարարել է ադրբեջանցի պատգամավորը: – Լեռնային Ղարաբաղում բնակվող հայերը թող ճանաչեն մեր Սահմանադրությունը, ապրեն մեր օրենքներով, և այդ դեպքում կֆինանսավորվեն մեր բյուջեից»:
Նա ադրբեջանցի պատգամավորներին «տեղեկացրել» է, որ մինչ «օկուպացիայի տակ» գտնվող Լեռնային Ղարաբաղի տարեկան բյուջեն կազմում է 178 մլն դոլար, միայն Նախիջևանին Ադրբեջանի պետբյուջեից տարեկան հատկացումները կազմել են 322 մլն մանաթ` ավելի քան 400 մլն դոլար:
Ադրբեջանցի պատգամավորի առաջարկը բուռն քննարկումների առիթ է հանդիսացել, հատկապես վերջին օրերին ԼՂՀ-ում և Հայաստանում «ծավալվող» իրադարձությունների շեմին:
Հիշեցնենք, որ դեռևս անցյալ տարի Ուրուգվայի խորհրդարանում տեղի ունեցած գիտական սեմինարի ժամանակ Ուրուգվայի արտգործնախարար Լուիս Ալմագրոն հայտարարել էր, որ Լեռնային Ղարաբաղի ճանաչման գործընթացը կարող է բնական հուն մտնել: Իսկ արդեն այս տարի մայիսին Երևան կատարած իր այցելության ժամանակ հայտարարել էր, որ Լեռնային Ղարաբաղը սերտորեն շաղկապված է Հայաստանի հետ, ինչը Ղարաբաղի ապագան է, և որը նա կարող է ընտրել` օգտագործելով ինքնորոշման իրավունքը:
Ուրուգվայի բարեկամական վերաբերմունքը չորեքշաբթի ավելի տաք գույներ ստացավ` ԼՂՀ-ում պաշտոնական այցով գտնվող Ուրուգվայի Արևելյան Հանրապետության Ներկայացուցիչների պալատի նախագահ Խորխե Օռիկոյի, Ուրուգվայ-Հայաստան միջխորհրդարանական բարեկամության խմբի ղեկավար, Ուրուգվայի խորհրդարանի արտաքին հարաբերությունների հանձնաժողովի անդամ Ռուբեն Մարտինես Ուելմոնի և այլ բարձրաստիճան պաշտոնյաների այցից հետո:
Ուելմոնը նախագահ Բակո Սահակյանի հետ հանդիպումից հետո լրագրողներին ասել էր, որ ԼՂՀ ճանաչումը Ուրուգվայի կողմից «քաղաքական գործընթաց է, և պետք է քայլ առ քայլ ընթանա»:
«Ադրբեջանի խորհրդարանը պետք է բողոք հայտնի Ուրուգվայի ղեկավարությանը,-Մելլի Մեջլիսում ի պատասխան հայտարարել է պատգամավոր Գանիրա Փաշաևան: – Ուրուգվայցի պատգամավորի գործողությունն անհարգալից վերաբերմունք է ադրբեջանական ժողովրդի հանդեպ: Դրանք հակասում են միջազգային նորմերին և բացասաբար են ազդում հայ-ադրբեջանական, ղարաբաղյան հակամարտության կարգավորման գործընթացի վրա: Արտաքին գործերի նախարարությունը անհրաժեշտ միջոցներ է ձեռնարկում, սակայն խորհրդարանը ևս պետք է իր բողոքն արտահայտի Ուրուգվայի ղեկավարությանը»:
Հիշեցնենք, որ ըստ «Մեդիալաբի» տված մեկնաբանությունների` վերլուծաբանների կանխատեսումներով ԼՂՀ անկախությունը ճանաչող առաջին երկիրը հնարավոր է հենց Ուրուգվայը լինի, ինչը նոր լիցք կարող է հաղորդել ԼՂՀ կարգավորման գործընթացին, ինչպես նաև բարերար ազդեցություն ունենալ տարածաշրջանային լարված իրավիճակի վրա:
«Մենք տեսնում ենք, թե որքան հաճախակի են դարձել Ադրբեջանի հոխորտանքները, որ պատրաստվում է նոր պատերազմի Հայաստանի դեմ: Այս դեպքում միջազգային հանրության կողմից ԼՂՀ ճանաչումը արգելք է դնում պատերազմի վերսկսման վտանգի վրա, լեգիտիմացնում պատերազմի վերսկսումը,- «Մեդիալաբին» ասել է «Ժառանգություն» կուսակցության քարտուղար, քաղաքագետ Ստեփան Սաֆարյանը: – Ադրբեջանն արդեն սկսել է շանտաժի ենթարկել միջազգային հանրությանը»:
© Medialab.am