Առողջապահության նախարարության հրապարակած տվյալները ցույց են տալիս, որ կորոնավիրուսային հիվանդությունը հանրապետությունում դարձյալ գլուխ է բարձրացնում. մեկ շաբաթում շուրջ 2000 նոր դեպք է գրանցվել, 2 մարդ էլ մահացել է: Սակայն կորոնավիրուսի հետ միասին այս օրերին շատ տարածված են վիրուսային հարուցիչով պայմանավորված մրսածության հիվանդությունները:
Մանկաբույժ Նունե Բաղդասարյանի անձնական կլինիկական վերլուծությունը ցույց է տալիս, որ շնչառական վարակները, որոնք ձմեռային ցուրտ եղանակների հարուցիչներ են, տարածվում են նաև այսօր՝ շոգ եղանակին: Մասնագետը դա դիսոնանս է համարում:
«Եթե հայաստանյան գոտում ցուրտ եղանակը նոյեմբերից մինչև ապրիլ ամիսներն է, ապա, օրինակ՝ Հոնկոնգում մարտից օգոստոս ամիսներն են: Այս ամենից կարելի է ենթադրել, որ ճանապարհորդությունը, միգրացիան նպաստում են վարակների տարածմանը, արդյունքում՝ սեզոնայնությունը վերանում է, և վիրուսների կառուցվածքային բնութագիրը խախտվում է»,- «Մեդիալաբին» ասում է Նունե Բաղդասարյանը:
Նրա խոսքով՝ կորոնավիրուսային հիվանդության տարածման նախորդ երկու տարիների ընթացքում մասնագետները փաստում են, որ ամռան ամիսներին հիվանդության բռնկման հաճախությունը նվազել է: Այդպիսին է պատկերը նաև մի շարք այլ վիրուսների համար, օրինակ՝ գրիպն իր ենթատեսակներով: Ամռան վերջին ամսին կորոնավիրուսը դարձյալ ակտիվացել է, ու ինչպես Նունե Բաղդասարյանն է կանխատեսում, դեռ կշարունակի տարածվել:
«Գրիպի վիրուսը ևս ունեցել է սեզոնայնություն, և դրանք անվանում ենք մրսածության հիվանդություններ: Սովորաբար ասում ենք, չէ՞, մրսել եմ, դողացնում եմ, բայց մենք դողացնում ենք, քանի որ վիրուսը սկսում է բազմանալ, այդ իսկ պատճառով դրանք կոչվում են մրսածության հիվանդություններ (cold disease): Բայց դրա հիմքում վիրուսն է, որը բազմանում է, ու արդյունքում սկսվում է մկանային դողը: Ջերմության բարձրացում, շնչառական կամ ռեսպիրատոր գանգատներ, ցավ կոկորդում, հազ և այլն՝ սրանք բոլորը վկայում են, որ դա վիրուս է, հարուցիչ ունի»,- նշում է մանկաբույժը:
Նա ասում է, որ այսօր շատ դժվար է տարբերել կորոնավիրուսն այլ ռեսպիրատոր վարակներից: Բայց ախտորոշելու համար կան «հուշող» նշաններ, որոնք առանձնանում են քովիդ ունեցող հիվանդների մոտ օրինակ՝ դժվարաշնչությունը, խիստ արտահայտված թուլությունը, բարձր ջերմությունը, կոկորդի ցավը: Շնչառական խանգարումները, մանկաբույժի խոսքով, շատ ավելի բնորոշ են կորոնավիրուսային հիվանդությանը, քան, օրինակ՝ գրիպին:
«Կան վիրուսային վարակներ, որոնք շոգ ժամանակահատվածի վիրուսներ են, բավական տարածված են և՛ երեխաների, և՛ մեծահասակների շրջանում: Ես ուզում եմ շեշտել իմունային համակարգի կարևորությունը: Նույն հիվանդությունը մի երեխայի մոտ ընթանում է ծանր, բարդություններով, մյուսը՝ թեթև, ոտքի վրա է անցկացնում: Բայց մենք հասկանում ենք, որ նույն վարակն է, հետևաբար իմունային համակարգի պաշտպանական պատասխանը հարուցիչին շատ կարևոր նշանակություն ունի: Ե՛վ շոգը, և՛ ցուրտը սթրես են մեր իմունային համակարգի համար: Նման պայմաններում շատ կարևոր է վիտամին D-ն, մաքուր օդը, օդափոխությունը»,- ասում է Նունե Բաղդասարյանը:
Վերջին շրջանում տարածված են նաև ստամոքսաղիքային խանգարումները, որի հետևանքով մարդկանց մոտ փսխում ու փորլուծ են առաջանում: Այս առնչությամբ մասնագետն ասում է, որ դա վիրուսային ծագման ստամոքսաղիքային ուղու ախտահարումներ են: «Դրանք վիրուսներ են, որ ախտահարում են աղիների էպիթելը, որն էլ ուղեկցվում է փորլուծով, փսխումով, որովայնի ցավերով: Այս իրավիճակներում բժիշկները պետք է գնահատեն հիվանդի վիճակը անկախ հարուցիչից ու բուժօգնություն տրամադրեն»,- նշում է նա:
Հասմիկ Համբարձումյան
MediaLab.am
