«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը
– Պարո՛ն Աղազարյան, համացանցում հայտնված արդեն իսկ աղմկահարույց դարձած տեսանյութի մասով ի՞նչ կարող եք ասել, երբ ակնհայտ երևում է, որ մարդկանց բերել են ՔՊ-ի քարոզարշավին:
– Բայց հանրահավաքը տեղի է ունեցել աշխատանքային ժամի ավարտից հետո, հետևաբար յուրաքանչյուրը կարող է մասնակցել հանրահավաքին, ի՞նչ խնդիր կա:
– Բայց հանրահավաք կար նաև աշխատանքային ժամերին նշանակված, պարո՛ն Աղազարյան, օրինակ՝ Նոր Նորքում սեպտեմբերի 6-ին ու 7-ին, համապատասխանաբար, ժամը 14:00-ին ու 13:30-ին էր նշանակված հանրահավաք:
– Չէ՛, հանրահավաքին ես մասնակցել եմ, ժամը 19:00-ին էր, իսկ դա աշխատանքային ժամից հետո է, իսկ այսօր տարածված տեսանյութի հանրահավաքը տեղի է ունեցել ժամը 19:00-ին՝ Նոր Նորքում, որին ես ներկա եմ եղել:
– Եթե անգամ այդպես է, բայց այդպես կազմակերպված, ամբողջ կոլեկտիվներով եկե՞լ էին, այդքան շա՞տ են համակրում ձեր քաղաքական ուժին:
– Գիտեք ինչ, դա արդեն ուրիշ խնդիր է, որովհետև եթե որևէ մեկը եկել է հանրահավաքի ինչ-որ մեկի պարտադրանքով, ապա այդ մեկը պոտենցիալ դառնալու է մեզ չընտրող, հետևաբար ով որ դա արել է, արել է որպես արջի ծառայություն քաղաքական թիմին, դրանից օգուտ չկա: Քաղաքացիներն իրավունք ունեն աշխատանքից հետո իրենց ժամանակն ազատորեն տնօրինեն, մասնակցեն հանրահավաքի, այդ թվում՝ դպրոցում ու մանկապարտեզներում աշխատողները, բայց եթե նրանցից ինչ-որ մեկը հանրահավաքին մասնակցել է պարտադրանքով, ապա այդ ինչ-որ մեկն արջի ծառայություն է իրականացրել է թիմին:
– Այսինքն՝ ձեր թի՞մը չի արել, ինչ-որ մե՞կն է արել, ճի՞շտ եմ հասկանում ձեր ասածը:
– Եթե մեր թիմից որևէ մեկն է նման բան արել, ապա ես նրան կհամարեմ անձնական-քաղաքական թշնամի, սա իմ գնահատականն է, ավելի խորը բան չեմ կարող ասել: Եթե մեր թիմից որևէ մեկն ինչ-որ մեկին պարտադրաբար բերի մեր թիմի կազմակերպած հանրահավաքին, ապա այդ որևէ մեկին ես կհամարեմ իմ անձնական, քաղաքական ոչ թե հակառակորդ, այլ թշնամի:
– Պարո՛ն Աղազարյան, այսինքն՝ չե՞ք ընդունում, որ վարչական լծակներ է կիրառում ձեր թիմը:
– Եթե ձևակերպումը տաք՝ ո՛րն է կոչվում վարչական լծակների կիրառում, կփորձեմ ինչ-որ ձևով պատասխանել:
– Մեկ օրինակը հենց այդ տեսանյութում է առկա, մյուս օրինակների մասին էլ դիտորդական առաքելություն իրականացնող կազմակերպություններն են բարձրաձայնել արդեն:
– Դե ես ասում եմ, որ նման բան չգիտեմ, եթե ինչ-որ մեկն էլ դա արել է, ես համարում եմ նրան ինձ անձնական, քաղաքական թշնամի: Էլ ո՞նց պատասխանեմ ձեր հարցին, ի՞նչ կարող եմ ասել ավել:
Քրիստինե Աղաբեկյան
MediaLab.am
