Չենք կարող ասել, որ շարժումը մարում է, բայց որ թուլացման միտում կա, տեսանելի է. Արմեն Բադալյան

Լուսանկարը՝ «Ֆակտոր»

«Մեդիալաբի» հարցերին պատասխանում է քաղտեխնոլոգ Արմեն Բադալյանը

– Պարո՛ն Բադալյան, ինչպե՞ս կգնահատեք «Տավուշը հանուն հայրենիքի» շարժման ընթացքը, արդեն երկրորդ մեծ հանրահավաք է անցկացրել շարժումը։ Շարժումը մարո՞ւմ է, ինչպես նշում են իշխանության որոշ ներկայացուցիչներ, թե՞ ընդհակառակը։

– Ցանկացած գործընթաց միշտ էլ ավելի մեծ թափով ու ոգևորությամբ է սկսվում, բայց եթե ժամանակի ընթացքում հաջողություններ չեն լինում, այն աստիճանաբար սկսում է գնալ թուլացում, որը հետո կարող է հանգել մարման։ Այս պահի դրությամբ՝ կարող ենք ասել, որ շարժումը տոտալ բնույթ չկրեց, որովհետև երբ Սրբազանը կիրակի օրվա հանրահավաքին ասաց, որ երկուշաբթի՝ ժամը 8-ին, տոտալ շրջափակում ու պարալիզացնում ենք հանրապետությունը, տեսանելի է, որ այդպես չեղավ։ 

Եթե այսպես շարունակվի, թուլացումից դեպի մարում կարող է գնալ, որովհետև պետք է հասկանալ, որ մարդիկ միշտ ձգտում են լինել հաղթանակի կողքին։ Այս պահին չեմ կարող ասել, որ կա զարգացում, լավագույն դեպքում կարող ենք ասել, որ կա մի քիչ թուլացում, որովհետև նշեցինք, որ շրջափակումը տոտալ բնույթ չստացավ, բայց որ ասենք՝ ամբողջական թուլացման միտում է, այդպես չէ։ 

Եթե տեսնենք, որ մի քանի օր անց այս միտումը պահպանվում է ու թեկուզ 5 տոկոսով հաջողություն էլ չի ունենում, դա արդեն գրանցելու ենք թուլացում։ Չենք կարող ասել, որ շարժումը մարում է, բայց որ թուլացման միտում կա, դա տեսանելի է։ Մշակութային տարբեր հաստատություններ այցելությունների ընթացքում, կարելի է ասել, որ Սրբազանը որոշակի հաջողություններ է գրանցել՝ հաշվի առնելով ընդունելությունը, բայց, արդեն նշեցի, որ չի հաջողվում տոտալ անհնազանդություն կազմակերպել:

– Ինչո՞ւ։

– Մի քանի պատճառներով․ կազմակերպչական հարցը շատ վատ է դրված կամ, կարելի է ասել՝ ընդհանրապես դրված չէ, որովհետև չի կարելի ասել՝ գնացեք ինքնաբուխ ճանապարհ փակեք: Վարչական տարբեր տարածքների համար պետք է առնվազն պատասխանատուներ լինեն, այդ աշխատանքները ինչ-որ մի ձևով կոորդինացնող է պետք։ Շարժման կազմակերպչական կողմը բավականին թույլ է։ 

– Պարո՛ն Բադալյան, իսկ ռուսների ազդեցությունը, նախկինների կապ ունենալը՝ նմանատիպ հայտարարություններն արդյոք որևէ կերպ ազդո՞ւմ են շարժման վրա բացասաբար։

– Ինչպես 2018-ին, այնպես էլ հիմա, բնականաբար, իշխանությունները սև փիարի են անցել: Այս դեպքում փորձում են այս շարժումը կապել երկու նախկին նախագահների, ռուսական կողմի հետ։ Ինչո՞ւ, որովհետև, ըստ իրենց՝ այդ սև ու սպիտակի քաղաքականությունը շարունակվում է։ 

Ռուսական կողմի հետ էլ կապում են, որովհետև այսօր Հայաստանում հակառուսականությունը մեծ թափ է ստացել։ Կան սև փիարի որոշակի կանոններ, որ պետք է իմանաս՝ ինչպես դա աշխատեցնես, որպեսզի արդյունք տա: Իշխանությունները սև փիար են անում, բայց դա որևէ արդյունք չի տալիս, որովհետև չեն տիրապետում այդ կանոններին։ 

– Վարչապետի թեկնածուի հարցն է հիմա օրակարգում, ի՞նչ անուն պետք է հնչի, որ մարդկանց ավելի հավաքի շարժման շուրջը, Բագրատ Արքեպիսկոպոսի անունն են ոմանք շրջանառում, դուք ինչպե՞ս եք վերաբերվում այդ հարցին։

– Եթե հիշում եք՝ 2018-ին շարժումը սկսվեց «Մերժիր Սերժին» ու ավարտվեց «Կա՛մ ես կլինեմ վարչապետ, կա՛մ Հայաստանը վարչապետ չի ունենա» կարգախոսներով, ու դա բերեց հաջողության, ոնց տեսնում ենք՝ նույն միտումը, բայց ոչ այդպես կատեգորիկ։ Եթե դու հիմա ցանկացած անուն տաս, նա կունենա հակաէլեկտորատ, ցանկացածը՝ կլինի Արման Թաթոյանը թե մեկ ուրիշը, քանի որ երկիրը շատ փոքր է, մարդիկ հասկանում են, որ այդ անձը այս կամ այն քաղաքական շրջանակի շահեր ներկայացնող է, ինչն անմիջապես վանելու է մի մասին: Քանի որ դու իրավունք չունես անգամ մեկին վանելու, բնականաբար, այդ հարցին պետք է շատ զգույշ մոտենալ։ 

Այսօր, ինչպես ցույց են տալիս հանրահավաքին եկած մարդկանց տրամադրությունները, բացի Սրբազանից՝ որևէ մեկին չեն տեսնում վարչապետի թեկնածու։ Բացի այդ՝ դիտարկումներն էլ ցույց են տալիս, որ ժամանակավոր վարչապետի թեկնածու դիտարկվում է միայն նա։ 

Ինչ վերաբերում է հարցի իրավական կողմին, դա ընդամենը ձևական կողմ է, որը շատ հանգիստ կարելի է լուծել, միակ խնդիրն այստեղ ՔՊ 20 պատգամավորի ձայներն ստանալն է՝ անվստահության գործընթացը ավարտին հասցնելու համար։

– Կկարողանա՞ն այդ ձայները ստանալ։

– Քաղաքականության մեջ անհնարին ոչինչ չկա, կախված է նրանից, թե դու ինչ աշխատանք ես տանում և այլն, բազմաթիվ գործոններից է կախված, ես հիմա չեմ կարող գուշակություններ անել ու ասել՝ կստանան կամ չեն ստանա։ 

Քրիստինե Աղաբեկյան

MediaLab.am