Պաշտպանության փոխնախարար Գաբրիել Բալայանը մնացել է մինչհեղափոխական Հայաստանում, եթե սպառնում է իրավապաշտպաններին: «Մեդիալաբի» հետ զրույցում նման դիտարկում է անում Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը:
Հիշեցնենք, որ պաշտպանության փոխնախարար Գաբրիել Բալայանը լրագրողների հետ զրույցում այսօր անդրադարձել էր բանակի խնդիրների մասին բարձրաձայնող իրավապաշտպանների գործունեությանը: Նա ասել էր, որ որոշ իրավապաշտպաններով առաջիկայում կզբաղվեն իրավապահ մարմինները:
«Ես այդ իրավապաշտպաններին համարում եմ չակերտավոր իրավապաշտպաններ: Ես անգամ ունեմ տեղեկություն, որ այդ իրավապաշտպանները կոնկրետ քայքայիչ գործունեություն են իրականացնում:
Իմ պատկերացմամբ՝ նրանցից մի քանիսի մոտ յուրաքանչյուր ողբերգական դեպք հրճվանք է առաջացնում: Փորձում են գնալ, տեղում հրահրել հարազատներին՝ որոշակի գործողություններ իրականացնելու համար:
Դռնից հանում են, լուսամուտից են փորձում մտնել, լուսամուտից հանում են, դռնից են փորձում մտնել: Ես կարծում եմ՝ շուտով իրավապահ մարմինները կսկսեն զբաղվել այդ դեպքերով, որովհետև վիշտ ունեցող մարդու վիշտը նորից փորձում են խորացնել, տարբեր պատմություններ հորինել»,- ասել էր Բալայանը:
Նա որոշ իրավապաշտպանների գործունեությունը «քայքայիչ» էր որակել՝ նշելով, որ իրավապահ մարմինները կպարզեն՝ ովքեր են ֆինանսավորում նրանց և ինչի համար:
Իրավապաշտպան Արթուր Սաքունցն ի պատասխան ասում է, որ Գաբրիել Բալայանը նման հայտարարությամբ բացառիկ անպատասխանատու պաշտոնատար անձ է հանդես գալիս և բացարձակապես չի խոսում գերատեսչության և իր կողմից պարտավորությունների կատարման մասին:
«Նա հաշվետվություն չի ներկայացնում և չի հասկանում, որ իրենց չարած գործողությունների հետևանքով են տեղի ունենում այդ մահվան դեպքերը: Իսկ այդ դեպքերի վերաբերյալ ահազանգերին որակումներ տալով՝ նա նպատակ է հետապնդում լռեցնել, ավելին, սպառնում է ենթադրյալ քրեական հետապնդմամբ՝ մոռանալով, որ պաշտոնատար անձի կողմից հենց իր պարտականությունները չկատարելն է, որ հանգեցրել է ծանր հետևանքների, հանդիսանում քրեական հետապնդման հիմք»,- ասում է Սաքունցը:
Նա հավելեց, որ կոչ է անում պաշտպանության փոխնախարարին զերծ մնալ նման գնահատականներից և զբաղվել գործով:
«Դա էր մնացել պակաս, որ ժողովրդավարական ու իրավական պետությունում պաշտոնատար անձը հաթաթա տա իրավապաշտպաններին»,- հավելեց իրավապաշտպանը:
Ռոզա Հովհաննիսյան
MediaLab.am
