Ազգային ժողովի նախագահ Հովիկ Աբրահամյանի սուր ելույթը Վերահսկիչ պալատի բացահայտումների վերաբերյալ փաստում է ՀՀԿ-ում Հովիկ Աբրահամյանի և վարչապետ Տիգրան Սարգսյանի թևերի միջև անթաքույց պայքարի մասին: «Մեդիալաբի» հետ զրույցում նման տեսակետ հայտնեց քաղաքագետ Երվանդ Բոզոյանը՝ վերլուծելով ԱԺ նախագահի վերջին օրերի պահվածքը:
Հիշեցնենք, որ հունիսի 13-ին Ազգային ժողովում քաղաքաշինության և պետական գնումների ոլորտում Վերահսկիչ պալատի բացահայտումների հրապարակումից հետո Հովիկ Աբրահամյանը բյուջեն թալանողների հասցեին կոպիտ էր արտահայտվել: Ըստ ՎՊ բացահայտումների՝ 2012 թվականին բյուջետային միջոցների չարաշահումը կազմել է 70 միլիարդ դրամ: ԱԺ նախագահն էլ հայտարարել էր, որ վարչապետը պետք է լուրջ քայլեր ձեռնարկի այդ ուղղությամբ, բացահայտումները պետք է լուրջ հետևանքներ ունենան կոնկրետ պաշտոնյաների համար:
«Չկան անփոխարինելի պաշտոնյաներ, զբաղեցրած պաշտոններից ազատեք այն պաշտոնյաներին, ովքեր զբաղվում են թալանով, կեղծարարությամբ և գումարներ լափելով»,- կոչ էր արել Հովիկ Աբրահամյանը:
ԱԺ ՀՀԿ խմբակցության ղեկավար Գալուստ Սահակյանը Հովիկ Աբրահամյանի ըմբոստությունը բացատրում է նրանով, որ թույլ ընդդիմություն ունենալու պայմաններում ՀՀԿ-ն որոշել է նաև ստանձնել ընդդիմության դերը՝ միաժամանակ նշելով, որ իրենք աչք չունեն ընդդիմության աթոռի վրա:
ԱԺ ՀՅԴ խմբակցությունը նույնպես այս կարծիքին է: Խմբակցության ղեկավար Արմեն Ռուստամյանն այն կարծիքին է, որ ՀՀԿ-ն բոլոր ոլորտներում մենաշնորհ ունենալուց հետո հիմա էլ քաղաքական դաշտն է մոնոպոլիզացնում: *
«Իրենք փորձում են ներկայանալ թե´ իշխանություն, թե´ ընդդիմություն, ուզում են ամբողջ դաշտում լինել»,- նշում է Արմեն Ռուստամյանը: ԱԺ ՀԱԿ-ի խմբակցությունը կարծում է, որ Հովիկ Աբրահամյանի ընդդիմադիր ելույթն ընդամենը սովորական շոու է երեք արարով՝ բացահայտում են, հրապարակում, բայց հարց է՝ կպատժե՞ն, թե՞ ոչ: Իսկ «Ժառանգություն» խմբակցության քարտուղար Զարուհի Փոստանջյանն ասում է, որ եթե ԱԺ-ն թատրոն չէ, ՎՊ բացահայտումները պետք է ընդունել որպես հաղորդում հանցագործության մասին և պատժել չարաշահում թույլ տված պաշտոնյաներին:
Քաղաքագետ Բոզոյանի խոսքով` խնդիրը հետևյալն է. հասարակությունում կա պայքար երկու շերտերի միջև: Մի շերտը գործարարներն են, ովքեր դժգոհում են, որ իրենցից շատ հարկեր են գանձում, նրանք փորձում են առավելագույնը քիչ հարկեր ցույց տալ, թաքցնել դրանք: Մյուս կողմից` պետությունը, ստիպելով վերցնելով այդ հարկերը, շատ անարդյունավետ է աշխատում: «Պետությունը, պետական բյուրոկրատիան իր վրա է շռայլորեն ծախսում այդ հարկերը: Եվ, բնականաբար, այդ ամենը խոր դժգոհություն է առաջացնում բիզնեսի ու հասարակության շրջանում: Եվ հասարակությունն ու բիզնեսը փորձում են պայքարել, որ այդ բալանսը փոխվի»,- «Մեդիալաբին» ասում է Բոզոյանը:
Վերլուծաբանի խոսքով` ընդդիմության և «Բարգավաճ Հայաստան» կուսակցության միջոցով գործարար խավը փորձում էր լոբբինգ անել` լուծելու իրենց խնդիրները: Երբ պարզվեց, որ ընդդիմությունը հաջողության չհասավ, Հանրապետական կուսակցությունը պահպանեց իր մենաշնորհային դիրքը, փաստորեն հիմա էլ գործարար շրջանակները փորձում են լոբբինգով այդ խնդիրները լուծել ՀՀԿ մի խմբի միջոցով: «Նույն Հովիկ Աբրահամյանը, Իշխան Զաքարյանը, ՀՀԿ որոշ շրջանակներ փորձում են իրենց վրա վերցնել այդ խնդիրը»,- կարծում է Բոզոյանը:
«Համագործակցություն հանուն ժողովրդավարության» կենտրոնի ղեկավար, քաղաքագետ Ստեփան Դանիելյանը նույնպես արձանագրում է, որ ՀՀԿ-ն իր մեջ ունի խմբավորումներ, և տարբեր խմբավորումների մարդիկ տարբեր շահեր ունեն: Ուղղակի խմբավորումներից մեկն ուզում է առիթից օգտվել ի հաշիվ մյուս խմբավորման:
«Իմ կարծիքով՝ երևի Հովիկ Աբրահամյանը դեռևս վարչապետ դառնալու ցանկություն ունի: Հովիկ Աբրահամյանը և այն խմբավորումը, որի առաջնորդն է ինքը, փորձում են գործադիր իշխանության լծակները վերցնել և օգտվել այն խմբավորման տապալումից, որը գլխավորում է վարչապետը: Այսինքն` սա ներխմբակային պայքար է, բարոյաէթիկական որակներով այս երկու խմբավորումներն իրարից առանձնապես չեն տարբերվում: Այսինքն` Հովիկ Աբրահամյանը լինի վարչապետ, թե Տիգրան Սարգսյանը` գոնե կոռուպցիայի առումով, ինձ թվում է` շատ մեծ տարբերություն չի լինի»,- «Մեդիալաբին» ասում է Դանիելյանը:
Վարչապետ Տիգրան Սարգսյանի օֆշորային պատմությանն անդրադառնալով՝ վերլուծաբանը նշում է, որ այս դեպքում էլ մի խումբը կցանկանա, որ մյուս խումբը վարկաբեկվի, կամ կօգնի, որ վարկաբեկվի: Հիշեցնենք, որ ի պատասխան այն հրապարակումների, թե վարչապետն օֆշորային գոտում գրանցված ձեռնարկություններից մեկի սեփականատերերից է և ադամանդագործ Աշոտ Սուքիասյանի ու Նավասարդ արքեպիսկոպոս Կճոյանի հետ միասին սնանկացրել է գործարար Փայլակ Հայրապետյանին, Տիգրան Սարգսյանն օրերս Ազգային ժողովում հայտարարեց, թե դա անհեթեթություն է, որն իր մտքով անգամ չէր անցնի: Վարչապետը նաև հայտարարեց, որ օֆշորային գոտում ցանկացած ոք կարող է իր անունով հաշիվ բացել՝ նպատակ ունենալով վարկաբեկել իրեն, օֆշորի առանձնահատկությունն էլ հենց դա է:
Քաղաքագետ Ստեփան Դանիելյանն ասում է, որ եթե վարչապետը նման հայտարարություն է անում, ինքը պետք է բացատրի, որ արդյոք յուրաքանչյուր ոք, եթե հաշիվ բացի օֆշորներում, միլիոնավոր դոլարների փոխանցումներ կլինե՞ն այդ հաշվին, և այդ փոխանցումները կլինե՞ն որևէ հայկական բանկից:
«Բոլորս գիտենք, որ եթե գոնե 10 հազար դոլարից ավելի գումար է փոխանցվում որևէ մեկին հայկական բանկով, ապա գրվում է բացատրություն՝ այդ ի՞նչ գումար է, ո՞վ է ուղարկել, ի՞նչ նպատակներով: Եվ ամենահետաքրքիրն այն է, որ այդ սահմանած կարգի հեղինակը հենց Տիգրան Սարգսյանն է, ով եղել է Կենտրոնական բանկի նախագահը: Նա շատ լավ պետք է իմանա, որ նման երևույթ գոյություն ունի և պետք է բացատրի դա: Կենտրոնական բանկը ստուգում է այդ բոլոր փոխանցումները»,- ասում է Դանիելյանը:
Լուսանկարը՝ http://www.armtimes.com
© Medialab.am
