«Ադրբեջանի կողմից սադրանքներն ուղղված են լրացուցիչ խոչընդոտներ ստեղծելուն և բանակցային գործընթացը խանգարելու»,- այսօր հրավիրած ասուլիսում ասաց Հայաստանի արտաքին գործերի նախարար Էդվարդ Նալբանդյանը՝ անդրադառնալով ադրբեջանական կողմի իրականացրած դիվերսիային և հրադադարի ռեժիմի խախտման դեպքերին:
«Անգամ եռանախագահներից մեկն իր Թվիթերում մեկնաբանություն թողեց, որ այդ կարգի միջադեպերը, սադրանքները խանգարում են բանակցային գործընթացին: Բայց պետք է շարունակել բանակցային գործընթացը, սա է իրականությունը, որովհետև այլընտրանք չկա: Այդ պատճառով էլ մենք շարունակում ենք բանակցել»,-ասաց նա:
Արտգործնախարարը նաև նշեց, որ ԵԱՀԿ Մինսկի խմբի համանախագահների կողմից ներկայացված Ղարաբաղյան հիմնախնդրի կարգավորման հիմնարար սկզբունքները բանակցությունների սեղանին են:
Նա հիշեցրեց, որ եռանախագահող երկրները բազմիցս կոչ են արել կողմերին արագացնել այդ պայմանավորվածության ձեռբերումը հիմնարար սկզբունքների շուրջ:
«Այդ հիմնարար սկզբունքները հիմնված են ուժի չկիրառման, ինքնորոշման և տարածքային ամբողջականության սկզբունքների վրա: 2013 թվականին Մեծ ութնյակի գագաթնաժողովի շրջանակներում Լեռնային Ղարաբաղի վերաբերյալ ԱՄՆ, Ֆրանսիայի և Ռուսաստանի նախագահների կողմից ընդունած հայատարարությունում կոչ էր արվում վերահաստատել հավատարմությունն ու հանձնառությունը այդ սկզբունքներին: Ի տարբերություն Ադրբեջանի՝ Հայաստանն անմիջապես վերահաստատեց հավատարմությունն այս սկզբունքներին»,- ասաց արտգործնախարարը՝ հավելելով, որ Ադրբեջանն ապարդյուն փորձեր էր անում անտեսել թե այս սկզբունքները, թե համանախագահների կոչերը:
Էդվարդ Նալբանդյանը նաև նշեց, որ հունվարի 23-ին մեկնելու է Փարիզ, որտեղ հունվարի 24-ին նախատեսված է հանդիպում ԵԱՀԿ Մինսկի խմբի համանախագահների և Ադրբեջանի ԱԳ նախարարի հետ:
Հիշեցնենք, որ հունվարի 19-ի լույս 20-ի գիշերը ադրբեջանցիների դիվերսիոն գործողությունների հետեւանքով զոհվել է կրտսեր սերժանտ, 20-ամյա Արմեն Հովհաննիսյանը` գրեթե կես ժամ միայնակ մարտնչելով 30 հոգանոց թշնամու ուժերի հետ: Այսօր Երեւանում եւ Ստեփանակերտում մոմավառությամբ մարդիկ հարգել են Արմենի հերոսական հիշատակը: Արմեն Հովհաննիսյանը ԼՂՀ նախագահ Բակո Սահակյանի կողմից պարգեւատրվել է «Արիության համար» մեդալով: Հովհաննիսյանը հուղարկավորվել է Եռաբլուր պանթեոնում:
Medialab.am
