«Մեդիալաբի» հարցերին պատասխանում է ֆրանսիահայ գործարար Վալերի-Աշխեն Գործունյանը:
-Տիկին Գործունյան, Հայաստանի վարչապետ Հովիկ Աբրահամյանը բիզնեսը ստվերից հանելու նախաձեռնությամբ է հանդես եկել: Իշող ռեժիմի պայմաններում որքանո՞վ է դա հնարավոր:
-Ես չեմ կարող դրան հավատալ: Նախ ինքը՝ վարչապետը, օլիգարխ է, այսինքն՝ այդ համակարգի մի մասն է, այդ համակարգի միջոցով հարստություն է կուտակել, ինչպե՞ս կամ ինչո՞ւ պետք է պայքարի այդ նույն համակարգի դեմ: Ես ընդհանրապես չեմ հավատում, որ այսօրվա իշխանավորները կարող են երկրում որևէ բան փոխել դեպի լավը, ժողովրդի համար աշխատեն: Ոչ, ես չեմ հավատում:
-Այսինքն՝ Հովիկ Աբրահամյանը նախ պետք է իրեն ու իր շրջապատի՞ն ստվերին հանի:
-Այո, այդ մարդիկ իրենք են պատկանում այդ համակարգին, ինչպե՞ս կարող են պայքարել ստվերի դեմ: Չեն կարող, որովհետև իրենք այդ համակարգի միջոցով օլիգարխիա են ստեղծել:
-Ձեր կարծիքով ի՞նչ պետք է անել՝ երկրում փոփոխության հասնելու համար:
-Ի՞նչ փոխել, այսօրվա ղեկավարությունից ով էլ իշխանության գլուխ գա, բոլորն էլ փչացած են: Նոր երիտասարդություն է պետք՝ իր ժողովրդին սիրող ու հարգող, հայրենասեր պետական գործիչներ: Այն մարդիկ պետք է Հայաստանում իշխանության գան, ովքեր Հայաստանի լավն են ցանկանում: Նման մարդիկ, վստահ եմ, կան մեր երիտասարության մեջ, ովքեր պետք է փոխեն այս փչացած համակարգը, որն իշխում է Հայաստանում ու մարդկանց դեպի արտագաղթ մղում: Մարդիկ գնում են, որովհետև այլևս հույս չունեն իրենց երկրի ապագայի վերաբերյալ:
-Արտագաղթի օրեցօր ավելացող ծավալը դեպի ո՞ւր է տանում Հայաստանը:
-Շատ վտանգավոր է, երբ երկիրը դատարկվում է: Պետք չէ գիտնական լինել՝ հասկանալու համար, որ արտագաղթը շատ վտանգավոր ու վատ երևույթ է Հայաստանի համար: Բայց ինչպե՞ս պայքարել դրա դեմ: Ինչքան ժողովուրդը անհույս լինի, այնքան շատ պետք է հեռանա: Իշխանությունները մտածում են, որ արտագաղթը լավ է, արտագաղթն իրենց սրտով է, բայց իրականում դա վատ երևույթ ե պետության համար, և պետք է մտահոգվել: Հետևաբար Հայաստանի ղեկավարությունը պետք է փոխվի, որպեսզի մարդկանց մոտ նորից հույս լինի, հայերը վերադառնան իրենց երկիր: Այսպիսով մենք մեզ տանում ենք մահվան:
-Տիկին Գործունյան, ձեր տպավորությամբ՝ ի՞նչ վիճակում է այսօր Հայաստանի տնտեսությունը և ի՞նչ վիճակում կհայտնվի՝ միանալով Մաքսային միությանը:
-Իսկ ո՞ւր է տնտեսություն, ի՞նչ է արտադրում Հայաստանը: Հայաստանի տնտեսության վիճակը շատ վատ է, այսօր երկրում չկա զարգացող տնտեսություն, այլ կան սեփականություններ, որոնք պատկանում են մի քանի օլիգարխի: Կասկածում եմ, որ Մաքսային միություն մտնելով՝ մեր երկրի տնտեսության համար լավ է լինելու: Տեսնելով մեր երկիր վիճակը և այդ միության վիճակը՝ կասկածում եմ, որ լավ կլինի մեզ համար, մեր երկրի համար: Ստեղծվել է մի իրավիճակ, որի Հայաստանն ընտրության հնարավորություն չունի: Մեր դիվանագետներն այնքան սխալ են աշխատել, որ երևում է՝ երկիրն ընտրության հնարավորություն չունի:
-Արդեն տեղեկությունը կարծես հստակ է, որ Երևանում առաջիկայում կբացվի ֆրասիական «Քարֆուր» սուպերմարկետը: Ձեր կարծիքով՝ այսօվա պայմաններում «Քարֆուրը» կարո՞ղ է աշխատել Հայաստանում:
-Դեռ հայտնի չէ, թե Մաքսային միությանը միանալու դեպքում ինչ ռեժիմով է աշխատելու Հայաստանի մաքսային համակարգը: Եթե ապրանքները Եվրոպայից են ներկրվելու Հայաստան, արդյոք մաքսազերծումը շատ թանկ պետք է լինի, թե՞ ոչ: Իսկ եթե մաքսատուրքերը բարձր լինեն, այդ դեպքում «Քարֆուրի» ներմուծած ապրանքն էլ թանկ կլինի Հայաստանի շուկայի համար: «Քարֆուրը» լավ է Հայաստանի շուկայի համար, որովհետև որակյալ լինելուն զուգահեռ նաև մատչելի է: Բայց եթե մաքսատուրքերը թանկանան, ապրանքը թանկ վաճառվի, ոչ մի իմաստ չկա, որ «Քարֆուրը» գա Հայաստան:
Մարի Ներսեսյան
© Medialab.am