«Մեդիալաբի» հարցերին պատասխանել է ԱԺ ՀՀԿ խմբակցության քարտուղար Գագիկ Մելիքյանը:
-Պարոն Մելիքյան, կառավարությունն ապօրինի հարստացումը քրեականացնելու նախաձեռնությամբ է հանդես գալիս: Այսինքն՝ ապօրինի հարստացման խնդիրը իշխանության մտահոգո՞ւմ է, հնարավո՞ր է խոշոր պաշտոնյաներ պատժվեն կամ, այսպես կոչված, կուլակաթափության գործընթաց տեղի ունենա Հայաստանում:
-Ես նման գործողություններին միշտ դեմ եմ եղել, նման արտահայտություններին՝ նույնպես: ՄԱԿ-ի կոնվեցիայի 20-րդ հոդվածի մասին է ձեր խոսքը: Ես կարծում եմ, որ օրենսդրական դաշտում իրականացվող փոփոխությունները հնարավորություն կըձեռեն, որպեսզի այդ բնագավառում, հատկապես կոռուպցիայի դեմ պայքարի բնագավառում լուրջ քայլեր իրականացվեն:
-Բայց մենք հարուստ պաշտոնյաներ ունենք, այնինչ հայտարարվում է, որ ապօրինի հարստացումը քրեականացնելու օրենքը հետադարձ ուժ չի ունենալու: Այսինքն՝ ապօրինի ճանապարհով նախկինում հարստացածները չպետք է պատժվե՞ն:
-Բոլոր հարցերը քննարկման ընթացքում կբարձրացվեն և իրենց լուծումներն այնպայման կունենան օրենսդրական փոփոխությունների ընթացքում: Ես համոզված եմ, որ կընդունվի այն լավագույնը, որն ընդունելի կլինի բոլորի համար:
-Նոր կառավարության գործունեության շրջանակներում այդուհանդերձ հնարավո՞ր է խոշորին գլխից բռնելու գործողություններ տեսնենք: Արդեն քանի տարի է՝ Սերժ Սարգսյանը հանձնարարել է խոշորին գլխից բռնել, բայց կարծես արդյունք չկա:
-Պայքար կոռուպցիայի դեմ, նշանակում է ամեն ինչ: Կապրենք, կտեսնենք: Պայքար կոռուպցիայի դեմ դա նշանակում է բոլոր օրինական գործողությունների իրականացումը, ինչը չի հակասում ՀՀ օրենսդրությանը:
Հասարակությունը կոնկրետ մարդկանց պատիժների է սպասում: Այդ թվում պատիժներ կլինեն: Ես համոզված եմ, որ հասարակությունը ոչ միայն սպասում է, այլ նաև իր համար ընդունելի են միայն պատիժները, և համոզված եմ, որ պատիժների համար հիմք կարող են հանդիսանալ միայն քրեորեն հետապնդելի արարքները:
-Վարչապետ Կարեն Կարապետյանը խոսում է պրիմիտիվ գողության մասին, ասում, որ այսուհետև բիզնես չի խլվելու, բյուջեի փողերն էլ նպատակային են ծախսվելու: Հասարակությանը, սակայն, հետաքրքրում է հարցը, թե այդ գողությունների համար ո՞վ պետք է պատասխան տա: Դուք ի՞նչ եք կարծում:
-Բոլոր նրանք, ովքեր իրենց պաշտոնեական գործողությունների ընթացքում իրականացրել են ոչ ճիշտ ու անօրինական գործընթաց, բոլորը պետք է ենթարկվեն պատասխանատվության՝ անկախ պաշտոնեական դիրքից:
-Իսկ ե՞րբ պետք է բացահայտվեն այդ գործերը:
-Երբ որ կբացահայտվեն: Եթե նման դեպքեր կան, ես խնդրում եմ հայտարարությամբ հանդես գալ բոլոր այն դեպքերի մասին, որոնց մասին դուք տեղյակ եք:
-Մամուլում բազմիցս օրինականեր ու ահազանգեր են եղել, թե որ պաշտոնյան ինչ ունեցվածք է կուտակել ու ինչպես է հարստացել:
-Ահազանգեր եթե եղել են, ուրեմն այդ ահազանգերը պետք է քննության առարկա դարձնել: Ես չեմ կարծում, որ իր մեջ քրեորեն հետապնդելի որևէ արարք ու գործողություն պարունակող հայտարարություն մնում է առանց հետևանք:
-Ասում եք՝ դեմ եք կուլակաթափման գործընթացին, ինչո՞ւ: Գուցե ՀՀԿ-ականները վախենո՞ւմ են այդ գործընթացից:
-Որևէ մեկը չի վախենում, այդ արտահայտությունն ընդհանրապես անընդունելի է, ես նույնպես չգիտեմ, թե դուք ում նկատի ունեք կամ ինչ նկատի ունեք՝ ասելով «կուլակ» կամ «կուլակաթափություն» կամ որն է այն չափանիշը, որից վերևում կուլակներ են, իսկ ներքևում՝ ոչ:
-Կա՞ն գումարներ, որոնք պետք է հետ բերվեն բյուջե:
-Ես ընդամենը ասացի հետևյալը՝ օրենքի շրջանակներում բոլոր քրեորեն հետապնդելի արարքներ իրականացնողները քննության ընթացքում պետք է պատասխանատվության ենթարկվեն: Ուղղակի ես չգիտեմ այդ չափորոշիչը, որն է համարվում կուլակ, որը՝ ոչ:
-ՀՀԿ խմբակցության ղեկավար Վահրամ Բաղդասարյանն, օրինակ, ապօրինի հարստացման մասին հարցադրում է անում. «Ի՞նչ եք կարծում, սկսենք մերոնց կուլակաթափ անե՞լ ու դատարկե՞նք Հայաստանը»: Այսինքն՝ «կուլակաթափ անել» արտահայտությունը հենց ՀՀԿ-ի ներսում ընդունված արտահայտություն է:
-Ես նման արտահայտություններ չարեցի և չեմ էլ պատրաստվում նման արտահայտություններ անել: Ինձ համար ուղղակի հետաքրքիր է այն սահմանը, որից ներքևում կուլակներ չեն, իսկ վերևում կուլակներ են:
-Ձեր կարծիքով՝ պաշտոնյաների կողմից գողություն, ապօրինի հարստացում եղե՞լ է:
-Եթե դուք ունեք նման փաստեր, նման դեպքերի արձանագրումներ, ես կցանկանամ, որ այդ մասին գրավոր կամ թեկուզ բանավոր հայտարարություններով հանդես գաք: Իմ կարծիքն այն է, որ եղել են իրոք դեպքեր, եղել են նաև ապօրինի հարստացման դեպքեր, որոնց համար նաև պատասխանատվության են ենթարկվել ոչ քիչ պաշտոնատար անձինք:
Էմմա Մանուկյան
MediaLab.am
