«Մեդիալաբի» զրուցակիցն է Ազգային ժողովի ՀՀԿ խմբակցության ղեկավար Վահրամ Բաղդասարյանը:
-Պարոն Բաղդասարյան, կաշառք վերցնելու հարցով դատավոր է ձերբակալվել, սա ի՞նչ է նշանակում, պայքարի նոր փո՞ւլ է սկսվել այս երևույթի դեմ:
-Դա սովորական երևույթ է, եթե կաշառքը կա, պետք է լինի նաև ձերբակալություն: Սա առաջին դեպքը չէ, տարիներ առաջ նույնպես նմանատիպ դեպքեր են եղել, կարող եք էքսկուրս կատարել և մարզերում, և մայրաքաղաքում: Եթե կա նման երևույթ, դա չի նշանակում պետք է բարեփոխումների հետ կապել: Ընդհանրապես, եթե կա երևույթը, դա պետք է կանխել ու պատժել: Շատ նորմալ եմ վերաբերում դրան:
-Բայց հանրությունն ակնկալում է, որ կոռուպցիոն սխեմաներում ներգրավված ավելի խոշոր պաշտոնյաների մասով պետք է բացահայտումներ լինեն, նաև բարձրաստիճան պաշտոնյաներ պետք է պատժվեն: Անընդհատ խոշորին գլխից բռնելու հանձնարարականներ են հնչում, բայց արդյունքը կարծես չենք տեսնում:
-Այսինքն՝ ես չեմ հասկանում, պետք է նստած տեղում որոշենք, որ խոշոր պաշտոնյաներին պետք է տանենք դատապարտենք, գնդակահարե՞նք: Եթե կա երևույթը, երևույթի հետ կապված գործը հարուցվում է, իրավապահները քննում են, և պետք է պատժվեն: Առանց հանգամանքների և առանց հիմքերի վերցնենք ու պատժե՞նք մարդկանց: Եթե կլինեն նման հանգամանքներ, որևէ մեկը ապահովագրված չէ, անկախ նրանից, թե նա որ պոստում է և որ պաշտոնում է աշխատում:
-Այսինքն՝ եթե խոշոր պաշտոնյաներ չեն ձերբակալվում, դուք ասում եք, որ խոշորների շրջանում չկա՞ կաշառակերություն:
-Եթե փաստը վավերացվում է, բնականաբար, այդ փաստը վավերացնելու դեպքում պետք է դրան արձագանք տրվի: Իսկ հիմա ես կարող եմ ասել, որ ընդհանրապես այդ երևույթն արմատախիլ է արվում: Կարելի է ասել, արդեն իսկ գործընթացի մեջ է: Եվ, եթե այս ընթացքում և ընդհանրապես նման երևույթ կլինի, դուք դրա ականատեսը կլինեք: Իսկ եթե ունեք նման փաստեր, խնդրում ենք բարձրաձայնել:
-Բայց բարձրաստիճան պաշտոնյաների շրջանում այդ երևույթը չկա՞:
-Եթե արձանագրված չէ, ուրեմն չկա: Ես ի՞նչ է, օդում ասեմ, որ կա, հետո դուք կասեք՝ անուններ և փաստեր:
-Իսկ ընդհանրապես ՀՀԿ կարծիքով ի՞նչ է կոռուպցիան, ձևակերպումը կարող եք տալ:
-Դուք կարո՞ղ եք աշխարհում գտնել մի մարդ, ով կարող է տալ կոռուպցիայի սահմանումը: Կոռուպցիայի սահմանումն ընդհանրապես հնարավոր չէ տալ: Ամենաէլեմենտար բանը՝ զանգ-միջնորդություն, դա կոռուպցիա է: Միայն սևեռվել եք կաշառակերության վրա, բայց դա բավական լայնածավալ հասկացողություն է: Եվ ես նաև Եվրոպայում հանդիպումների ժամանակ,
Հայաստան-Եվրոպա նիստի ժամանակ եմ այս հարցը բարձրացրել, ասել եմ՝ խնդրում եմ որևէ մեկդ տվեք դրա սահմանումը՝ ո՞րն է կոռուպցիայի սահմանումը: Բոլորը կոռուպցիա են, միջնորդությունները կոռուպցիա են, պաշտոնեական դիրքի չարաշահումը, կաշառակերությունը և տարբեր բնույթի նման արարքները կոռուպցիոն դաշտի մեջ են մտնում:
-Երբ իշխանություններն ասում են, որ ապօրինի հարստացումը քրեականացնելու օրենք են ընդունում, սակայն միաժամանակ հայտարարում են, որ այդ օրենքը հետադարձ ուժ չունի, դա նշանակո՞ւմ է, որ նախկինում ապօրինի հարստացած պաշտոնյաների համար համաներում է հայտարարվում:
-Եթե նախկինում հարստացածների համար կլինեն փաստեր, որ նրանք ևս հարստացել են զարտուղի կամ ապօրինի ճանապարհներով, բնականաբար, այդ գործերը պետք է գնան քննության, և մեղավորները պետք է պատասխանատվություն կրեն:
-Փողերը հետ կբերվե՞ն բյուջե:
-Եթե հիմնավորվի, որ դրանք բյուջեից հափշտակված գումարներն են, բնականաբար, կբերվեն հետ:
-Իսկ ձեզ համար զարմանալի չէ՞, որ պաշտոնյաների մոտ 90 տոկոսը հարուստներ են, այսինքն՝ դա կասկած չի՞ առաջացնում, միգուցե պաշտոնեական դիրքը չարաշահելով են այդ ունեցվածքը դիզել:
֊Մեր ժողովուրդը չի սիրում, որ մարդիկ պետք է հարուստ լինեն: Իհարկե, մենք պետք աշխատենք, որ աղքատներ չլինեն, մենք պետք է ընդհանրապես աղքատների մասին մտածենք: Իսկ ինչքան շատ հարուստներ լինեն քո պետության մեջ, այնքան քո պետության օգուտն է: Իհարկե, կարևոր է, թե ինչ ճանապարհով է հարստացել մարդը:
֊Այո, դա կարևոր է, և խնդիրը այն է, որ հենց պաշտոնյաներն են հարստացել:
֊Այսօրվա պաշտոնյաների մեջ էլ կան բավական հնարավորությունների տեր մարդիկ, որոնք որ եկել են պաշտոնների: Մեկ տարի, երկու տարի հետո պետք է ասեք, որ այդ մարդիկ պաշտոններ ունեցան և հարստացան: Նրանց հարստությունը եղել է բավական հին: Իսկ ինչ մնում է նրան, որ հարստացան, այո, եթե այդ հարստացումը եղել է պետական բյուջեի հաշվին, դրանց մասին մենք պետք է անենք շատ լուրջ հետևություններ:
֊Հետևաբար, հանրությունը սպասի՞, որ արդյունք կլինի այդ ուղղությամբ:
֊Բնականաբար, եթե ամրագրվեն փաստերը և եթե արձանագրվեն… Այդ հարցում պետք է նաև օգնի հանրությունը, եթե ունեն փաստեր, պետք չէ այդ փաստերը թաքցնել կամ վախենալ, պետք է բարձրաձայնել:
Էմմա Մանուկյան
MediaLab.am
