«Մեդիալաբի» հարցերին պատասխանել է ԱԺ ՀՀԿ խմբակցության ղեկավար Վահրամ Բաղդասարյանը։
-Պարոն Բաղդասարյան, այս շաբաթ կառավարության նիստը վարեց Սերժ Սարգսյանը։ Իր ելույթում նա նորից վստահություն և աջակցություն հայտնեց Կարեն Կարապետյանի կառավարությանը։ Նա անդրադարձավ կոռուպցիայի դեմ պայքարում նոր համակարգի ներդմանը՝ նշելով. «Մենք կոռուպցիայի դեմ պայքարի նոր և բավականին ազդեցիկ միջոցներ ենք ներդնում և այդ միջոցները պետք է համադրվեն մեր նպատակասլաց աշխատանքի հետ»։ Ի՞նչ նոր մեթոդների մասին է խոսքը։
-Այդ ամենն արտացոլված էր կառավարության ծրագրում, դրանք բոլորը նոր մեթոդներ են և նոր ձևերով պետք է մոտեցումները կատարվեն։
-Այդ դեպքում ի՞նչ կարիք կար գնալ կառավարություն և նորից շեշտել այդ մասին։
-Սա պրակտիկա է։ Բոլոր տարիներին նոր ձևավորվող կառավարության, նոր ձևավորվող Ազգային ժողովի դեպքում նախագահն այց է կատարում, նիստը վարում և իր ուղերձը հղում։ Նայեք ամբողջ տարեգրությունը։ Եվ հիմա հերթական կառավարության նոր ծրագրի հաստատումից հետո կառավարության նիստին նախագահը պարտադիր ներկա է լինում, ինչպես նաև ԱԺ-ում։
-Իսկ ի՞նչ էր ակնարկում Սերժ Սարգսյանը Կարեն Կարապետյանին, երբ ասում էր.«Եթե հեշտ լիներ, ամեն ինչ վաղուց արած-պրծած կլինեինք», փոխարենը Կարեն Կարապետյանն էլ հակադարձում է, որ լավ է պատկերացնում, որ հեշտ չի լինելու, բայց իր թիմի հետ տրամադրված է վճռական:
-Ընդհակառակը, ես կասեի, որ վարչապետի ուժերն է արժևորում, որովհետև այն բեռը, որ այսօրվա կառավարությունը և քաղաքական թիմը դրել է իր ուսերին, դրա իրագործման համար մեծ ջանքեր են պահանջվու: Խոսքը դրա մասին էր։
-ԵՄ դեսպան Պյոտր Սվիտալսկու հայտարարության հետ կապված իշխանությունը շարունակում է նշել, որ մնում է իր դիրքորոշմանը: Արդյոք ճի՞շտ եք համարում միլիոնավոր եվրոներ վերցնել և նման քննադատական գնահատականներ հնչեցնել, որքան հնչեցրեց իշխանությունը:
-Մենք այդ թեման արդեն փակել ենք: Երբ ինքը կտա նոր հայտարարություն, մենք այդ հայտարարությանը կանդրադառնանք:
-Հնարավո՞ր է՝ այս ամենը խոչընդոտ հանդիսանա Հայաստան –ԵՄ առաջիկայում ստորագրվելիք փաստաթղթի կյանքի կոչման համար:
-Չի կարող որևէ ստվեր գցել: Մենք պետք է համագործակցությունը սերտացնենք Եվրոպայի հետ, պետք է բանակցությունները շարունակենք, և որևէ բան չի կարող խոչընդոտել:
-Պարոն Բաղդասարյան, կոռուպցիայի դեմ պայքարի նոր մարմնի հետ կապված ի՞նչ ակնկալիքներ կան: Ի վերջո բազմաթիվ էին նման մարմինները մեզանում, սակայն զրո արդյունք է գրանցվել:
-Չեմ կարծում, որ արդյունք չի եղել, արդյունք եղել է, բայց մեզ չի բավարարել: Հիմա պետք է տեմպերն ավելի ուժեղացնենք և կոռուպցիայի դեմ պայքարն ավելի կոնկրետ կազմակերպենք, որպեսզի արդյունքը շոշափելի լինի։ Բացի այդ, առաջին անգամ մեկ տեղ տրվել է ընդդիմությանը այդ խորհրդում: Բնականաբար, մենք լավատես ենք, և կարծում ենք ավելի արդյունավետ աշխատանք պետք է լինի:
-Լավատես եք և սպասումներ ունեք նաև այս կառավարությունի՞ց:
-Մենք առայժմ հիմքեր չունեն, որ որևէ վատատեսական ենթադրություններ անենք: Կաշխատեն, կտեսնենք, կտանք գնահատականներ:
-2018-ին կտա՞ք այդ հստակ գնահատականը:
-Մեր գնահատականները միշտ հստակ են նաև կառավարության աշխատանքի հետ կապված:
-Ինչո՞ւ են միշտ պատժվում մանր «ձկները», խոշորները մնում արտոնյալ:
-Ես այդ տերմինալոգիային համաձայն չեմ: Ինձ համար բոլորը հավասար են: Եվ հարկավոր է, որ ով նման ոտնձգություն թույլ տա, իր համապատասխան պատիժը ստանա:
-Անգամ եթե իշխանության բարձրաստիճան պաշտոնյա՞ է:
-Անկախ նրանից, թե ովքեր են նրանք:
-Այս տարիներին նմանատիպ բազմաթիվ բացահայտումներ եղան, բայց մենք տեսնում ենք, թե որտեղ են նրանք: Նրանցից մի քանիսը անգամ պատգամավոր դարձան: Իշխանությունը ներում է նրանց, ինչո՞ւ:
-Ներման նման փաստ ես չունեմ, բոլորն իրենց արժանի պատիժը ստացել են և պետք է ստանան:
Մանե Հարությունյան
MediaLab.am