«Իշխանությունը նրա համար չէ, որ հանրությանը շոյի, հետո կանգնի մեծ պրոբլեմների առաջ». Վահրամ Բաղդասարյան

«Իշխանությունը նրա համար չէ, որ հանրությանը շոյի, հետո կանգնի մեծ պրոբլեմների առաջ». Վահրամ Բաղդասարյան
«Իշխանությունը նրա համար չէ, որ հանրությանը շոյի, հետո կանգնի մեծ պրոբլեմների առաջ». Վահրամ Բաղդասարյան
Հեղինակ MediaLab

«Մեդիալաբի» հարցերին պատասխանում է Ազգային ժողովի ՀՀԿ խմբակցության ղեկավար Վահրամ Բաղդասարյանը:

– Պարո՛ն Բաղդասարյան, թանկացումների դեմ «Ելք» դաշինքը երթ է անելու, արդեն իսկ բողոքի են դուրս եկել երթուղային գծերի տերերն ու վարորդները: Իշխանությունները մտահոգություն չունե՞ն, որ երկրում սոցիալական բունտ կհասունանա:

– Չէ՛, հարցը ոչ թե վերաբերում է մտահոգությանը, այլ եթե կա անհանգստություն, բնականաբար, պետք է բացատրական աշխատանք տարվի: Երևանի քաղաքապետարանն արդեն այդ նախաձեռնությունն արել է, և պետք են ընդհանուր բացատրական աշխատանքներ, որպեսզի գծատերերը կարողանան իրենց հարցերի պատասխաններն ստանալ: Անտարբերությանը ես դեմ եմ, չպետք է լինի անտարբերություն: Եթե անգամ դա զանգվածային բնույթ չունենա, ընդամենը մի քանի քաղաքացիներ հարցեր ունենան, այդ հարցերի պատասխանները պետք է տրվեն: Իսկ ինչ վերաբերում է սոցիալական բունտին, զգույշ եղեք ձեր ձևակերպումներում, պետք չէ այդպիսի ձևակերպումներ անել:

– Ինչո՞ւ, անհավանակա՞ն եք համարում, որ հասարակությունը մեծ խմբերով դուրս կգա փողոց:

– Դա քաղաքական գործընթաց է, և յուրաքանչյուր քաղաքական ուժի մարտավարությունը հատուկ է: Մենք չենք միջամտում այդ քաղաքական ուժերի մարտավարությանը: Համենայնդեպս, հիմքեր չենք տեսնում, որ կարող են նման լայնածավալ մասշտաբի հուզումներ առաջանալ: Խորհրդարանում այդ թեմայով լսումներ են կազմակերպվելու: Եվ թիվ մեկ ամբիոնը Ազգային ժողովի ամբիոնն է, և բոլոր հուզող հարցերը պետք է պատասխան ստանան այս ամբիոնից: Եվ մենք կաշխատենք, որ հանրությանը բավարարենք իրենց հուզող հարցերի շրջանակներում:

– Հնարավո՞ր է, որ իշխանությունները զիջումների գնան և հարկերի նախկին դրույքաչափերը սահմանեն, որպեսզի գնաճը զսպվի:

– Որտեղ կլինեն արհեստական թանկացումներ, որոնք օրենքից չեն բխում, անպայման դրանից պետք է հետևություններ անել: Եվ պետք է նաև զսպող գնային քաղաքականություն ընտրենք: Իսկ այն, ինչն օրենքի շրջանակներում է, պետք է մանրակրկիտ բացատրվի, և նաև պետք է բոլոր ապրանքատեսակներն ուսումնասիրվեն, թե որոնք են թանկացել, որոնք` էժանացել: Իսկ եթե պետք է հետ գնանք, պետք է նաև էժանացած ապրանքների գծով հետ գնանք և ամեն ինչը վերանայենք: Եթե կլինի անհրաժեշտություն, մենք քննարկումներից չենք խուսափում:

– Իշխանությունն այս իրավիճակը չէ՞ր կանխատեսում, որ գների թանկացման հետևանքով ընդզվումներ կլինեն:

– Յուրաքանչյուր իշխանություն իր երկրի հնարավորություններն ու ռեսուրսներն է հաշվարկում և իր հնարավորությունների սահմաններում է առաջ շարժվում: Ամեն ինչ հաշվարկված է, և բնական էր, որ նման երևույթներ կարող են լինել: Մենք չէինք բացառել, բայց նաև պետք է դրա բացատրություններն ունենանք:

– Աղքատ բնակչությանը ո՞նց եք բացատրելու, որ թանկացումները պետք է շարունակվեն:

– Դուք գնում եք մի դաշտ, որտեղ շատ ընդդիմադիր կեցվածքով շոյիչ խոսքեր եք ասում: Իշխանությունը նրա համար չէ, որ մեկ կամ երկու տարվա համար շոյիչ գործողություններ կատարի, որ հանրությանը շոյի, հետո երկու կամ երեք տարուց կանգնի մեծ պրոբլեմների առաջ: Դա է պատճառը, որ և՛ նախընտրական, և՛ հետընտրական տարում նման խոստումներ չեղան, նման բյուջե չներկայացվեց, և շատ պարզ ու ուղիղ հանրությանն ասվեց, որ սա է մեր հնարավորությունը: Մեր նպատակները հեռանկարային են, և մենք հանրությանը պետք է ներկայացնենք այնպիսի ծրագրեր, որոնք իրականացնելու ենք:

– Կանխատեսվում է, որ սոցիալ-տնտեսական պայմանների վատթարացման հետևանքով արտագաղթի տեմպերը կավելանան: Իշխանություններին սա չի՞ մտահոգում:

– Ձեր գնահատականների մեջ բավական խիստ եք: Բնականաբար, նաև արտագաղթը զսպող մեխանիզմների մասին մենք պետք է մտածենք: Եվ պետք չէ նախօրոք ենթադրություններ անել: Չեմ կարծում, որ մեծ մասշտաբի արտագաղթի երևույթի կհանդիպենք: Բայց դրանից մենք պետք է հետևություններ անենք և ընդհանրապես պետք է հատուկ ուշադրություն դարձնենք, արտագաղթը կանխենք:

– Ոստիկանության հրապարակած տվյալներով՝ վերջին հինգ տարիներին ավելի քան 15 հազար մարդ է Հայաստանի քաղաքացիությունը դադարեցրել և այլ երկրի քաղաքացի դարձել: Ինչո՞ւ են մարդիկ հրաժարվում ՀՀ քաղաքացիությունից:

– Ես այդ թվերին հստակ չեմ տիրապետում, բայց կարելի է նաև այդ թվերի շրջանակներում անալիզներ անել: Այդ հարցը շաղկապված է գնաճի հետ, կարելի է լսումների ժամանակ նաև այդ հարցի պարզաբանումներն ստանալ:

– Նաև կան մեկնաբանություններ, որ երկրից հեռացողների մի մասը բանակից խուսափելու պատճառով է քաղաքացիությունը դադարեցնում: Դուք ի՞նչ տեղեկությունների եք տիրապետում:

– Դա միշտ է եղել, բանակից խուսափելու համար գնացել են, 27 տարին լրանում է, որից հետո վերադառնում են: Այդ իսկ պատճառով մենք համապատասխան օրենքում փոփոխություններ ենք կատարում:

Ռոզա Հովհաննիսյան

MediaLab.am