«Կապանում «Քաղաքացիական պայմանագիր» կուսակցության սատարած թեկնածուի պարտությունը սյունեցիների պատասխանն էր վարչապետի պաշտոնակատար Նիկոլ Փաշինյանին՝ նախկին փոխոստիկանապետ Հունան Պողոսյանին մարզպետ նշանակելու համար»,- «Մեդիալաբի» հետ զրույցում նման դիտարկում է անում ընտրական և քաղաքական տեխնոլոգիաների փորձագետ Արմեն Բադալյանը:
Ըստ նրա, Կապանում քաղաքապետի ընտրությունների ժամանակ երկու գործոն աշխատեց՝ մեկը հօգուտ քաղաքապետի թեկնածուի, մյուսը՝ ընդդեմ:
«Երկու գործոնն էլ միաժամանակ աշխատեցվեց վարչապետի կողմից: Մի կողմից Նիկոլ Փաշինյանը գնաց Կապան և հանրահավաքում աջակցություն հայտնեց թեկնածուին, միաժամանակ մի քանի օր առաջ վարչապետի կողմից Սյունիքի մարզպետ նշանակվեց Հունան Պողոսյանը, ինչն այնքան էլ սյունեցիների ցանկությամբ չէր: Եվ գերիշխեց բացասական գործոնը»,- «Մեդիալաբին» ասում է Արմեն Բադալյանը:
Հիշեցնենք, որ հոկտեմբերի 21-ին ՏԻՄ ընտրություններ են անցկացվել Հայաստանի մի շարք համայնքներում, որոնցից խոշորներն են Արմավիր, Էջմիածին, Հրազդան և Կապան քաղաքները: Արմավիրում, Էջմիածնում հաղթել են ՔՊ-ի կողմից սատարվող թեկնածուները, Հրազդանում՝ ՔՊ վարչության նախագահ Սասուն Միքայելյանի որդին, ում սակայն ՔՊ-ն պաշտոնապես չէր սատարում: Իսկ Կապանում ՔՊ թեկնածու Նարեկ Բաբայանը պարտվել է անկուսակցական թեկնածու Գևորգ Փարսյանին: Չնայած Նարեկ Բաբայանին սատարելու համար օրերս Կապան էր մեկնել վարչապետի պաշտոնակատար Նիկոլ Փաշինյանը և հանրահավաքում անձամբ հորդորել ձայն տալ նրան, բայց հաղթեց անկուսակցական թեկնածուն:
Նիկոլ Փաշինյանը, անդրադառնալով այս իրավիճակին, ասել է, որ աննախադեպ բան է տեղի ունեցել, երբ երկրի ղեկավարի սատարած թեկնածուն չի հաղթում: Նրա խոսքով՝ հենց այս իրավիճակի համար է հեղափոխություն արվել, և հեղափոխությունը հաղթել է:
Արմեն Բադալյանի խոսքով՝ Կապանի թեկնածուի պարտության հարցում նաև ենթագործոններ են եղել:
«Մասնավորապես, Կապանի թեկնածուի անձի հետ կապված գործոնն էլ կա, քանի որ չենք կարող ասել, որ նա խիստ աչքի ընկնող քաղաքական գործիչ էր: Բայց հաշվի առնելով, որ Արմավիրում ու Էջմիածնում էլ թեկնածուները խիստ աչքի ընկնող չէին, բայց հաղթեցին, կարող ենք ասել, որ Կապանում գործել է մարզպետի հետ կապված բացասական գործոնը»,- ասում է մասնագետը:
Ըստ նրա՝ վարչապետի սխալ որոշմանը հասարակությունը պատասխանեց քվեարկությամբ: Սա նշանակում է, որ այնքան էլ տեղին չեն այն մեկնաբանությունները, թե Նիկոլ Փաշինյանը մենաշնորհել է քաղաքական դաշտը:
«Կա նաև այլ գործոն, այս ժամանակահատվածում տեղի բնակիչները որևէ տնտեսական նվաճում չեն տեղել: Այսինքն՝ հեղափոխական էյֆորիան ավարտման փուլում է, որոշ համայնքներում ավարտվել է, որոշ տեղերում էլ ավարտման վերջին պահն է: Եվ արդեն մարդիկ պահանջում են կոնկրետ գործեր: Մի բան, որը վարչապետը չի կարողանում լուծել՝ իրավիճակային քաղաքական գործիչ լինելու պատճառով»,- ասաց նա:
Բադալյանի խոսքով՝ արտահերթ խորհրդարանական ընտրությունների անցկացումն այնքան էլ կապված չէ զարգացում ապահովելու հետ: Արտահերթ խորհրդարանական ընտրությունների անցկացումը կապվում է այն բանի հետ, որ Հայաստանում պետք է ավարտվի հեղափոխությունը և վերջնականապես լուծվի իշխանության հարցը: Գործադիր իշխանության հարցը լուծվել է մայիսի 8-ին, Երևան համայնքում՝ սեպտեմբերի 23-ին, և դեկտեմբերի առաջին տասնօրյակում կայանալիք ընտրություններով իշխանության հարցը կլուծվի նաև Ազգային ժողովում:
«Եվ դրանով Հայաստանում հեղափոխությունը կավարտվի, բայց դա չի նշանակում, որ դրան հետևելու է զարգացման ընթացքը: Զարգացումը լրիվ ուրիշ գործոնների հետ է կապված, այս պահի դրությամբ կարող ենք ասել, որ շատ հավանական է՝ դրանից հետո էլ կարող է զարգացում չլինել»,- հավելեց նա:
Արմեն Բադալյանի խոսքով՝ Հայաստանի զարգացումը պետք է պայմանավորված լինի նրանով, թե իշխող քաղաքական թիմն ի՛նչ պատկերացում ունի երկրի ապագայի վերաբերյալ և այդ ուղղությամբ ի՛նչ աշխատանքներ է տանում: Եթե չկա երկրի զարգացման ռազմավարական վեկտորը, և չկան այդ ուղությամբ կատարվող աշխատանքներ, երկարատև լուրջ զարգացում չի լինում:
Ռոզա Հովհաննիսյան
MediaLab.am