Չեմ բացառում, որ մեղադրյալի կարգավիճակում կհայտնվեմ, բայց մտավախություն չունեմ, որովհետև անհաշտ պայքար եմ մղել կոռուպցիոն ռիսկերի դեմ. Սեյրան Օհանյան

«Մեդիալաբի» հարցերին պատասխանում է Ազգային ժողովի «Հայաստան» խմբակցության ղեկավար, պաշտպանության նախկին նախարար, գեներալ-գնդապետ Սեյրան Օհանյանը

– Պարո՛ն Օհանյան, ձեր գնահատականն եմ խնդրում ԱԱԾ-ի տարածած հաղորդագրության և ՀՀ պաշտպանության նախկին նախարար Դավիթ Տոնոյանի ձերբակալության հետ կապված:

– ԱԱԾ-ի հայտարարության իմաստը հետևյալն է, որ հարուցված է քրեական գործ 2011 թվականի մի հատվածում ռազմամթերքի, հետագայում գնելու և պետությանը, բանակին վնաս հասցնելու մասով: Այդ գործով, իսկապես, կա հարուցված քրեական գործ, ինքս էլ հարցաքննվել եմ՝ մոտավորապես 3-4 ամիս առաջ:

Նախաքննական գաղտնիությունից ելնելով, ինչպես նաև անմեղության կանխավարկածը հաշվի առնելով՝ միայն կարող եմ ասել հետևյալը. մատակարար կազմակերպությունը ՊՆ-ի ու գլխավոր շտաբի պատվերի համաձայն մատակարարել է ավիացիոն ռազմամթերքի խմբաքանակ, որի 30 տոկոսը եղել է սարքին ու պիտանի օգտագործման համար, ընդունել է ԳՇ-ի համապատասխան մասնագիտական հանձնաժողովը, և ՊՆ-ն վճարումն իրականացրել է: 

Այդ խմբաքանակի 70 տոկոսի ոչ պիտանի ու անսարք լինելու պատճառով ՊՆ-ն չի ընդունել ու դրա համար գումար չի վճարել մատակարար կազմակերպությանը, բայց քանի որ այդ հրթիռները չափսերով մեծ են, պայթյունավտանգ ու հրդեհավտանգ են, իսկ մատակարար ընկերությունը այլ քաղաքացիական շինություն չուներ և իրավունք էլ չուներ դրանք քաղաքացիական շինություններում պահպանելու, իր խնդրանքով ՊՆ-ն ի պահ է վերցրել դրանք՝ պայմանով, որ իրենք հետագայում թույլտվություն ձեռք կբերեն ու տարանցիկ փոխադրմամբ դրանք կտանեն այլ երկիր վաճառելու կամ այլ որոշում կընդունեն իրենց հրթիռների վերաբերյալ: Այնուհետև այդ գնումները՝ թե՛ խմբաքանակի մուտքագրումը ՊՆ, թե՛ գներն ու այլ հարցեր 2018, թե 2019 թվականին են իրականացրել, որի հետ ես ընդհանուր առմամբ կապ չունեմ: 

ԱԱԾ-ն պետք է ազնիվ լիներ ու ասեր, որ 2011 թվականի մի պահ վերցրած ոչ սարքին ռազմամթերքը 2018-19 թվականին են ընդունել, այդ դեպքում հասկանալի կլիներ, բայց քանի որ փորձեցին մանիպուլացնել, այնպես ասել, որ սլաքները շեղեն դեպի նախկին, նաև կեղծ մատնությամբ՝ սլաքներն իմ կողմ ուղղել, ստիպված եմ այդ բացատրությունները տալ: 

Այդ տների խուզարկությունները, ձերբակալությունները կեղծ մատնությունն արդարացնելու տեսարաններ են, կարծում եմ, որ նույն այդ մարդիկ, որոնց փորձում են ձերբակալել, երբևէ չեն խուսափել քննչական մարմնի գործողություններից, հանգիստ կարող էին նրանց հրավիրել՝ առանց խուզարկությունների ու ձերբակալությունների և քննչական գործողություններ իրականացնել: Փոխանակ զբաղվեն ավելի կարևոր գործերով, ասենք՝ մեր սահմանների պաշտպանությամբ, մեր երկրի ներսում այլ երկրների գործակալների փնտրելով, նման բաներ են անում, ինչն այնքան էլ ընդունելի չէ ինձ համար:

– Բացառո՞ւմ եք, որ կոնկրետ այս գործի կամ բանակին առնչվող մեկ այլ գործի շրջանակներում մեղադրյալի կարգավիճակում հայտնվեք:

– Վերջին երեք տարին ցույց տվեց, որ շինծու գործեր, այնուամենայնիվ, կարող են սարքել, այնպես, ինչպես ինձ վրա էին սարքել: Ամեն ինչ էլ հնարավոր է, բայց որևէ մտավախություն չունեմ, որովհետև իմ ղեկավարության տարիներին ինքս անհաշտ պայքար եմ մղել այն բոլոր թերությունների, կոռուպցիոն ռիսկերի դեմ, որոնք եղել են:

– Պարո՛ն Օհանյան, եթե սխալվում եմ՝ կխնդրեմ ուղղեք, բայց ձեզ ճի՞շտ հասկացա, որ կոնկրետ գործով էական խախտում չի եղել, որովհետև, ինչպես ասացիք, անսարք ու անպիտան ռազմամթերքի համար պետությունը չի վճարել:

– Իմ ժամանակահատվածում որևէ խախտում չի եղել, ու գումարը չի վճարվել, թե հետագայում ի՞նչ է կատարվել, հարցրեք այն գերատեսչություններից, որոնք նախաքննություն են տանում: 

– Նմանատիպ գործարքների մասին ԱԱԾ-ն կամ այլ պետական կառույցներ ի սկզբանե տեղյակ չե՞ն լինում, պարո՛ն Օհանյան, թե՞ միայն ՊՆ-ն ու ԳՇ-ն են տեղեկություններին տիրապետում:

– Գոյություն ունեն համապատասխան ժողովրդավարության վերահսկողության մեխանիզմներ, որոնք իրականացնում են և՛ պետական բոլոր մարմինները՝ գործադիր, օրենսդիր, դատական մարմիններ, և՛ պաշտպանության նախարարության ներսի վերահսկողական մարմինները: Բայց երբ այսպիսի գործողություններ են իրականացվում ինչ-որ քաղաքական գործողություններից հետո, նշանակում է, որ նաև քաղաքական հետապնդումների տարրեր կան, խոսքս կոնկրետ այս գործին չի վերաբերում: 

– Կոնկրետ գործից ի՞նչ սպասելիքներ ունեք, մինչև վերջ կհասցվի՞, պատասխանատվության ենթարկվողներ կլինե՞ն, թե՞ կլինի ինչպես միշտ: 

– Չեմ կարող ասել՝ ավարտին կհասցնե՞ն, թե՞ ոչ, բայց փորձը ցույց է տալիս, որ այս իշխանություններն իրենց գործը բոլոր ուղղություններով էլ կիսատ են կատարում: Գտնում եմ, որ գործընթացը պետք է մինչև վերջ իրականացվի, որպեսզի նաև հանրության համար ամեն բան մատչելի ու հասկանալի լինի:

Քրիստինե Աղաբեկյան

MediaLaba.am