«Մեդիալաբի» հարցերին պատասխանում է «Քաղաքացիական պայմանագիր» խմբակցության պատգամավոր Հովիկ Աղազարյանը
– Պարո՛ն Աղազարյան, ՏԻՄ ընտրություններն ավարտվեցին, և արդյունքում գոնե երեք քաղաքներում իշխող ուժը, որին դուք ներկայացնում եք, հաջողության չի հասել: Ի՞նչ եք մտածում այս մասին:
– Այնտեղ, որտեղ չի հաղթել «Քաղաքացիական պայմանագիր» կուսակցության թեկնածուն, հաղթել է ՔՊ-ն՝ մեր կուսակցությունը, որովհետև մենք ձևավորում, արմատավորում ենք նոր քաղաքական մշակույթ, և, հետևաբար, այն քաղաքական ուժերը, այն անհատները, որոնք հավակնություն ունեն այս կամ այնտեղ դրսևորվելու օրենքին համապատասխան, ձևավորում են իրենց միավորումը և մասնակցում են ընտրություններին ու գրանցում հաջողություններ:
Բոլորին հաջողություն եմ ցանկանում ու վստահ եմ՝ կգործեն օրենքի շրջանակներում՝ հանուն այն համայնքի բարօրության, որտեղ առաջադրվել են:
– Նայեք՝ Գորիսի ընտրությունների արդյունքները քննարկումների առիթ դարձան, հնչում էին տեսակետներ, որ խորհրդարանական ընտրություններին իշխող ուժը Սյունիքում հաջողություններ է ունեցել, քանի որ օգտագործվել է զինվորականությունը, հակառակ դեպքում կլիներ այնպես, ինչպես եղավ այս ընտրություններում: Դուք ի՞նչ կարծիքի եք:
– Ես համաձայն չեմ նման գնահատականներին: Մենք պետք է հասկանանք, որ երեկ, այսօր և դեռ տևական ժամանակ համայնքային ընտրությունները, ՏԻՄ ընտրությունները բոլորովին այլ տրամաբանություն ունեն: Բոլորովին այլ:
Այսինքն՝ քաղաքացին, որը որպես համապետական մարմնի ներկայացուցիչ ընտրել է ՔՊ-ին, մեր կուսակցությանը, այդ նույն քաղաքացին, կարող է պատահի՝ իր համայնքում ընտրի ոչ ՔՊ-ի թեկնածուին: Դա շատ նորմալ երևույթ է, հետևաբար, այդ գնահատականները ես չեմ կիսում:
Դա միանգամայն այլ երևույթ է. քաղաքացին ընտրում է ՔՊ-ին ու այդ ուժին վստահում երկրի ղեկավարումը, կառավարումը, և նույն քաղաքացին կարող է իր փոքրիկ համայնքի ղեկավարումը վստահել այլ անձի, որը ՔՊ ներկայացուցիչ չէ:
– Դիտորդներն ահազանգել են ընտրություններում վարչական ռեսուրսի կիրառման մասին, դուք ունե՞ք նման տվյալներ:
– Ես համոզված եմ, որ վարչական ռեսուրս չի կիրառվել իշխանության կողմից, իսկ ինչ վերաբերում է կեղծիքներին, չեմ կարող հստակ բան ասել, որովհետև չունեմ ամբողջական տեղեկություն: Կարող է պատահի, որ այստեղ-այնտեղ եղել են խախտումներ, բայց դրանց մասին կարող են խոսել իրավապահ մարմինները:
Ես մի բանում վստահ եմ՝ մենք՝ որպես հասարակություն, որպես պետություն, գնում ենք ճիշտ ճանապարհով:
– Ընտրությունների մասո՞վ նկատի ունեք:
– Այո՛, ընտրական մշակույթի մասին է խոսքս: Մասնավորապես այն նկատի ունեմ, որ համայնքի ավագանիում մեծամասնություն կարող է ընտրվել այլ ուժ, և դու դրան սովորական վերաբերվես: Ի վերջո, քո քաղաքացին է ընտրվել:
Որտե՞ղ է երաշխիքը, որ իշխող կուսակցության թեկնածուն հենց այն անհատն է, որը կոչված է լավագույնս լուծելու համայնքի առաջ ծառացած խնդիրները: Այդ հարցը որոշողը պետք է լինի համայնքի սիրտը, այդ սրտով պետք է անցնեն թեկնածուները, իսկ այդ սիրտը ժողովրդի կողմից կատարված ընտրությունն է: Ժողովուրդն ասում է՝ այս մեկը հարմար չի, սա է հարմար, հետևաբար, ամեն ինչ նորմալ է:
Բայց, իհարկե, մենք պետք է հետևություններ անենք, սխալները վեր հանենք ու հետագայում ավելի հաջող հանդես գանք:
– Օրինակ՝ պարո՛ն Աղազարյան, Գորիսի ընտրություններից ի՞նչ հետևություն եք անում, ազատազրկման մեջ գտնված թեկնածուի ուժը փաստորեն հաղթեց ձեր թեկնածուին:
– Չէ՛, ազատազրկման մեջ հայտնվելը այս պարագայում թեկնածուին օգնեց, դրական եղավ, և ամենևին էլ բացասական նշանակություն չունեցավ նրա համար: Նրան ներկայացնում էին որպես հալածյալի, շատ ազդեցություն ունեցավ այն, որ ասում էին՝ ջահել տղա է, ընտրենք, որպեսզի ինքը խուսափի ազատազրկումից և այլն: Տարբեր մոտեցումներ կային այդ ուժին ընտրելու համար:
Մենք հարցին շատ սևուսպիտակ ենք նայում: Հիմա չի ընտրվել իշխանության թեկնածուն, ընտրվել է մեկը, որը իր փոքր հայրենիքում վայելում է մարդկանց համակրանքը: Այստեղ խնդիրն այլ է՝ ամեն տեղ յուրաքանչյուրս պետք է աշխատենք մնալ օրենքի շրջանակներում, ով չի լինի օրենքի շրջանակներում, պետք է պատասխան տա դրա համար:
– Կա՞ որոշում՝ ինչպես է ՔՊ-ն աշխատելու Գյումրիում, կկազմվի՞ կոալիցիա:
– Այս պահին չգիտեմ, թե ինչ որոշում կկայացվի, և ինչ շարունակություն կունենա, բայց թե՛ Գյումրիում, թե՛ Գորիսում մենք ունենք բավականին թվով ավագանու անդամներ, և նրանք, վստահաբար, լծված կլինեն իրենց ներդրումը բերելու առկա խնդիրների լուծմանը:
Չէ՞ որ եթե մենք խոր ուսումնասիրենք տարբեր քաղաքական ուժերի, միավորումների ծրագրային դրույթները, ընդհանուր առմամբ նպատակները պարզ են, և դրա կենտրոնում ՀՀ քաղաքացին է:
Մեր ուժը փորձելու է իր ռեսուրսներով ազդել, որ հնարավորինս մոտ լինի խնդիրների լուծումը:
– Ստացվում է՝ դուք չեք նեղվում ընտրությունների նման արդյունքներից:
– Ես նեղվում եմ սպորտային իմաստով, կարող էինք ավելի բարձր արդյունքներ արձանագրել: Իհարկե նեղվում եմ: Բայց քաղաքական իմաստով չեմ նեղվում, որովհետև կարծում եմ՝ բոլորս գործում ու աշխատում ենք օրենքների շրջանակում և ցանկացած քայլի համար պատրաստ ենք պատասխան տալու:
Այս պահին այսպես է եղել, ուրեմն այդպես է: Եթե ուզում ենք, որ մեր հնարավորությունները ավելի առարկայական լինեն տեղական մակարդակում, ապա պետք է հետևողական լինենք, ավելի մանրակրկիտ լինենք թե՛ թեկնածուի ընտրության հարցում, թե՛ կազմակերպչական հարցերում, որպեսզի մեր աշխատանքը ավելի լավ ներկայացնենք:
Հասմիկ Համբարձումյան
MediaLab.am
