Երեւանի Փակ շուկայի շուրջ բարձրացրած աղմուկին արձագանքել է Երեւանի քաղաքապետ Տարոն Մարգարյանը՝ նշելով, որ քաղաքապետարանը շինարարարական աշխատանքներ իրականացնելու թույլտվություն չի տրամադրել:
Հիշեցնենք, որ տեւական ժամանակ խոսակցությունների եւ քննարկումների առիթ հանդիսացած Փակ շուկայում մեկնարկած շինարարական աշխատանքների վերաբերյալ երեկ կեսգիշերին հաղորդագրություն էր տարածել «Փրկենք Փակ Շուկան» քաղաքացիական նախաձեռնությունը: Նախաձեռնությունը մասնավորապես ահազանգում էր, այն մասին, որ քանդվում է Երևանի Մաշտոցի պողոտայի վրա գտնվող Փակ շուկայի տանիքը:
«Շարունակվում է վանդալիզմը գլխավոր պողոտայի վրա գտնվող ծածկած շուկայի նկատմամբ: Չնայած պաշտոնյաների կեղծ հավաստիացումներին, թե շուկայի տարածքում շինարարական աշխատանքները դադարեցված են, երեկ երեկոյան հերթական անդառնալի վնասն է հասցվել ճարտարապետական այդ կոթողին, ինչը արձանագրել են տեսախցիկները», -նշված էր հայտարարության մեջ:
Հայտարարությանը հետեւած բուռն արձագանքներին պատասխանել է Տարոն Մարգարյանը:
«Մաշտոցի պողոտայում գտնվող թիվ 1 փակ շուկայում ընթացող աշխատանքների, շուկայի ճակատագրին վերաբերող հարցերի առնչությամբ տեղեկացնում եմ, որ շուկայում շինարարական աշխատանքներ իրականացնելու թույլտվություն Երևանի քաղաքապետարանը չի տրամադրել»,-Ֆեյսբուկ սոցիալական ցանցի իր անձնական էջում կատարած գրառման մեջ նշել է Երեւանի քաղաքապետ Տարոն Մարգարյանը:
Մարգարյանն նշել է, որ «կատարվածն առնչվում է շինարարական կառուցվածքների փլուզմանը, որոնց ամրացման նպատակով տնտեսվարողի կողմից սեփական նախաձեռնությամբ միջոցներ են ձեռնարկվել ամրացման աշխատանքներ իրականացնելու` վթարային իրավիճակներից և փլուզումից խուսափելու նպատակով»:
«Օրվա ընթացքում շուկայի տարածքում աշխատել է Երևանի քաղաքապետարանի և ՀՀ մշակույթի նախարարության ներկայացուցիչների մասնագիտական խումբը, որի ուսումնասիրությունների արդյունքում տրված եզրակացությունից հետո կորոշվեն հետագա քայլերը,-իր էջում կատարած գրառման մեջ նշել է Մարգարյանը,- Եզրակացության և ձեռնարկվելիք քայլերի մասին համապատասխան տեղեկատվություն կտրամադրվի»:
© Medialab.am
