Իրավապահ մարմինները օրերս հայտարարեցին Հայաստանում կաշառքի դիմաց առանց տեսական ու գործնական քննության վարորդական վկայական տրամադրելու դեպքի մասին, որը գրանցվել էր Վանաձորի հաշվառման-քննական բաժանմունքում, տեսուչի կողմից: Գործով անցնողները դատարանի վճռով տարբեր չափի պատիժներ են ստացել:
«Վարորդի ընկեր» իրավապաշտպան հասարակական կազմակերպության նախագահ Տիգրան Քեյանը նկատում է, որ նման դեպքեր Հայաստանում միշտ են եղել, ուղղակի վերջին շրջանում առանց քննության և կաշառքով վարորդական վկայական ստանալու դեպքերը նվազել են:
«Օրինական ճանապարհով վարորդական վկայական ստանալու գործընթացն այնքան է հեշտացել, որ ամենևին կարիք չկա դիմելու անօրինականության ու այլընտրանքային ճանապարհներով ստանալ այդ փաստաթուղթը»,- «Մեդիալաբին» ասում է Քեյանը:
Նրա խոսքով՝ անձը կարող է տիրապետելով համապատասխան կանոններին, օրինական ճանապարհով, պետական վճարումներ կատարելով մեկ ամսում վարորդական վկայական ստանալ:
Դիտարկմանը, թե շատերն են դժգոհում, օրինակ՝ գործնական քննությունից միտումնավոր կտրելու պրակտիկայից, Քեյանը արձագանքում է. «Ես շատ մարդիկ գիտեմ, որ մեկ անգամ քննությունից շատ արագ ստանում են վարորդական վկայական: Ի՞նչ կարիք կա գնալ ահռելի գումարներ տալ ու վարորդական ստանալ»:
Մասնագետն ասում է՝ եթե անձը վստահ է իր գիտելիքներին ու ցանկություն ունի այդ գիտելիքների միջոցով ստանալ վարորդական վկայական, ապա քննությունների ժամանակ ոչ մի խնդիր չի կարող առաջանալ:
Նրա խոսքով՝ վարորդական վկայականը կաշառքի միջոցով կամ նորմալ ճանապարհով, այսինքն՝ քննությունների միջոցով ստանալը չի նշանակում՝ վարորդը երթևեկության մեջ լա՞վ վարորդ է, թե՞ ոչ:
«Վարորդներ կան, որ կարող են առանց քննության վարորդական վկայական ստանալ, բայց երթևեկության մեջ նորմալ վարորդ չլինել: Դա փաստաթուղթ է, որը թույլ է տալիս քեզ երթևեկել, իսկ թե դու երթևեկության մեջ քեզ ինչպե՛ս ես պահում՝ դա վարորդական վկայականից կախված չէ»,- ասում է նա:
Վարորդական վկայական ստանալու այլընտրանքային ճանապարհների, Քեյանի դիտարկմամբ, հիմնականում դիմում են մարզերում, քանի որ Երևանում վերահսկողությունն ավելի խիստ է:
«Քանի որ Երևանում հսկողությունը խիստ է, հիմնականում տեսուչները չեն գնում այդ քայլին, իսկ մարզերում հսկողությունը թույլ է, դրա համար անօրինականության համար կա պարարտ հող»,- նշում է Քեյանը:
ՀՀ գլխավոր դատախազությունից տեղեկացնում են, որ դատարանի վճռից հետո գլխավոր դատախազի կողմից գրություն է հասցեագրվել ՀՀ ոստիկանության պետին՝ դատավճիռն օրինական ուժի մեջ մտնելուց հետո օրենսդրությամբ սահմանված կարգով քննարկման առարկա դարձնել այդ անձանց վարելու իրավունքը դադարեցնելու հարցը:
Արդյունքում՝ ՀՀ ոստիկանության ՃՈ ծառայության որոշումներով այդ անձանց վարորդական իրավունքի վկայականները, իսկ մեկ անձի դեպքում՝ տրանսպորտային միջոցներ վարելու իրավունք ստանալու տեսական քննության արդյունքներով կազմված արձանագրությունը ճանաչվել են անվավեր:
MediaLab.am