Այսօր կայացած ՀՀԿ ԳՄ նիստի ժամանակ, կուսակցությունը որոշել եւ հավանության է արժանացրել կառավարության նոր կազմը: Կառավարության նոր կազմը, որը մասամբ փոփոխություն է կրել ներկայացրել է ՀՀԿ մամլո խոսնակ Էդուարդ Շարմազանովը:
ՀՀԿ հետ անսպասելիորեն կոալիցիա չմտած ԲՀԿ նախարարներիը փոխարինվել են. առողջապահության նախարարի պաշտոնում առաջադրվել է պրոֆեսոր, ԵՊԲՀ-ի ռեկտոր Դերենիկ Դումանյանի, սոցապ նախարարի պաշտոնում՝ նույն նախարարության փոխնախարար Արտեմ Ասատրյանի թեկնածությունները։
Հետաքրքական է, որ տրանսպորտի նախարարի պաշտոնում ՀՀԿ-ն առաջադրել է մեկ ու կես տարի առաջ աղմկահարույց պատմությամբ քաղաքապետի պաշտոնը լքած Գագիկ Բեգլարյանի թեկնածությունը:
Հիշեցնենք, որ 2010 թվականի դեկտեմբերին, Գագիկ Բեգլարյանը հրաժարականի դիմում էր ներկայացրել այն բանից հետո, երբ ըստ մամուլում տարածված լուրերի առևանգել և ծեծի էր ենթարկել նախագահի արարողակարգի աշխատակից Արմեն Կանդայանին:
2010-ի դեկտեմբերի 3-ին «Կարեն Դեմիրճյան» մարզահամերգային համալիրում կայացած աշխարհահռչակ օպերային երգիչ Պլասիդո Դոմինգոյի համերգից առաջ Կանդայանը խնդրել էր Սերժ Սարգսյանի համար նախատեսված աթոռի հարևանությամբ նստած Գագիկ Բեգլարյանի տիկնոջը փոխել իր տեղը և մի աթոռ այն կողմ նստել: Սա էլ առաջացրել էր Բեգլարյանի տիկնոջ, ապա նաև` Բեգլարյանի վրդովմունքը:
Ըստ հրապարակումների` վրդովված Բեգլարյանի տիկինը կատարվածի մասին տեղեկացրել էր ամուսնուն, որն էլ գնացել է նախագահական նստավայր, այնտեղ ապտակել Կանդայանին, հետո վերջինիս իր հետ տարել նստավայրից դուրս և ծեծի ենթարկել:
Միջադեպը հաստատել էր նաև Սերժ Սարգսյանի մամլո խոսնակ Արմեն Արզումանյանը, որը, սակայն, հավելել էր, թե մամուլում նշված մանրամասները «ուռճացված են»:
Այնուամենայնիվ, առնվազն մեկ ու կես տարի «ստվերում» մնալուց հետո, շատերի համար անակնկալ է կրկին Գագիկ Բեգլարյանին նման բարձր պաշտոնում տեսնելը, հաշվի առնելով այն, որ վերջինիս պահվածքը որակվում էր որպես «նախագահին հասցված վիրավորանք»:
Սակայն, ենթադրելի է, որ նախագահական ընտրություններից հաշված ամսիներ առաջ նախագահը փորձում է «փորձված» եւ նվիրված մարդկանցից թիմ ձեւավորել, որոնք նեցուկ կլինեն իրեն:
Ինչեւէ, քաղաքական թեժ աշնան սպասելիքներով՝ ստորեւ ներկայացնում ենք կառավարության նոր կազմը:
Աշխատանքի և սոցիալական հարցերի նախարար` Արտեմ Ասատրյան
Արդարադատության նախարար` Հրայր Թովմասյան
Տարածքային կառավարման նախարար՝ Արմեն Գևորգյան
Արտաքին գործերի նախարար` Էդվարդ Նալբանդյան
Կրթության և գիտության նախարար` Արմեն Աշոտյան
Բնապահպանության նախարար` Արամ Հարությունյան
Էկոնոմիկայի նախարար` Տիգրան Դավթյան
Էներգետիկայի և բնական պաշարների նախարար` Արմեն Մովսիսյան
Մշակույթի նախարար` Հասմիկ Պողոսյան
Պաշտպանության նախարար` Սեյրան Օհանյան
Սփյուռքի նախարար` Հրանուշ Հակոբյան
Տրանսպորտի և կապի նախարար` Գագիկ Բեգլարյան
Ֆինանսների նախարար` Վաչե Գաբրիելյան
ԱԻ նախարար՝ Արմեն Երիցյան
Գյուղատնտեսության նախարար` Սերգո Կարապետյան
Ինչպես տեղեկացրել է Շարմազանովը, Սպորտի և երիտասարդության հարցերի նախարարի թեկնածությունը կորոշվի կառավարության նիստի ժամանակ:
© Medialab.am
