«Ընդդիմության մարտավարությունը սխալ է. աշխարհում չկա նման օրինակ, որ հարուստները պայքարի դուրս գան իշխանափոխության համար». Հովիկ Աղազարյան

«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը

Պարո՛ն Աղազարյան, խորհրդարանական ընդդիմադիր ձեր գործընկերները մեկ շաբաթից ավելի է՝ բողոքի ակցիաներ են անցկացնում՝ փողոցներ են փակում, քայլերթեր իրականացնում, ինչպե՞ս եք գնահատում նրանց գործողությունները:

– Ընդդիմության մարտավարությունը սխալ է, որովհետև եթե իրենք զուգահեռներ են անցկացնում 2018-ին մեր իրականացրած միջոցառումների, օրինակ՝ քայլարշավի և մյուս գործողությունների հետ, ապա մենք այն ժամանակ քայլարշավ իրականացրինք, որպեսզի ժողովրդին իրապես իրազեկենք այդ օրվա խնդիրների հետ կապված հարցերն ու փորձենք լսելի լինել ժողովրդին՝ առանց պարտադրվելու, և եթե ժողովուրդն ընկալեր մեր մոտեցումները, ապա հաջորդաբար կկատարեինք մեր հաջորդ քայլերը, որոնք էլ արդեն տեղի ունեցան Երևանում:

Հիմա իրենք ի՞նչ են իրազեկում, որ Արցախի խնդիրը շարունակում է մնալ դեռ չլուծվա՞ծ, ու կան այս կամ այն մակարդակի վտանգնե՞ր: Դա բոլորը գիտեն, ո՞վ չգիտի այդ մասին, իրենք էլ գիտեն, մենք էլ գիտենք, տնային տնտեսուհիներն էլ գիտեն, հետևաբար նրանց մարտավարությունը սխալ է, իրենք պետք է ավելի հստակ օրակարգով հանդես գան ու տեսնեն՝ եթե ունեն աջակցություն՝ հաջորդ քայլերն անեն:

-Դե, հստակ օրակարգը ձեր քաղաքական թիմին իշխանությունից հեռացնելն է:

– Իշխանությանը հեռացնելու այդ թեզը սին է: Ասածս բոլորին չի վերաբերում, որովհետև այդ շարժման, պայքարի շարքերում անկասկած կան մարդիկ, որոնք անկեղծ մղումներ ունեն ու գտնում են, որ այսօր իշխանությունն իսկապես սխալներ է թույլ տալիս, բայց մնացածը, ասենք՝ Ռոբերտ Քոչարյան, Սերժ Սարգսյան, Վանեցյան և իրենց շրջապատի մարդիկ, մեր հայրենիքի հարուստ քաղաքացիներն են, իսկ աշխարհում չկա նման օրինակ, որ հարուստները դուրս գան պայքարի իշխանափոխության համար, հետևաբար կասկածելի են նրանց նպատակների ազնվությունն ու անկեղծությունը:

Իշխանության հեռացումը նրանք ո՞նց են պատկերացնում, շատ տարօրինակ պատկերացում ունեն. գոյություն ունեն Սահմանադրություն, օրենքներ և այլն:

2018 թվականին դուք ինչպես հեռացրեցիք Սերժ Սարգսյանին ու իր թիմին, նույն կերպ էլ իրենք են ուզում անել, պարո՛ն Աղազարյան:

– Երբ մենք ներկայացանք ժողովրդին առանց պարտադրվելու ու ասացինք, որ, սիրելի՛ ժողովուրդ, Սերժ Սարգսյանը պատրաստվում է երրորդ անգամ գալ իշխանության և երկարաձգել իր քաղաքականությունը՝ դրանից բխող բոլոր հետևանքներով՝ մասսայական անօրինականություններ տարբեր բնագավառներում, անարդարության դրսևորումներ և այլն, և այլն, ժողովուրդը ոտքի կանգնեց, ու դա տեղի ունեցավ:

Հիմա մենք պետք է ավանդույթ դարձնենք այդ ամենն օրենքով անել, իսկ այն ժամանակ օրենքները ոտնահարված էին, դրա համար էլ ժողովուրդը ոտքի կանգնեց, հիմա չկա այդ իրավիճակը՝ իմ կարծիքով:

Զուգահեռներ անցկացնել 2018 թվականի ու այսօրվա դեպքերի միջև՝ ճիշտ չէ, չնայած պետք է նշել, որ այսօր մեր հայրենիքը գտնվում է ավելի ակնառու մարտահրավերների առաջ, որոնց լուծմանն էլ հենց լծված է իշխանությունը:

Կարծիքներ կան, որ ընդդիմությունը կրկնում է այն ամենը, ինչ 2018-ին դուք էիք անում: Ձեզ մոտ և՞ս այդ տպավորությունն է, ու եթե այո, ապա ինչո՞ւ է ընդդիմությունը կիրառում ձեր քայլերը:

– Բանն այն է, որ նրանց թվում է, թե դա տեխնոլոգիա է եղել ու դա հիմա էլ կարող են կիրարկել, բայց խնդիրն էլ այն է, որ դա չի եղել տեխնոլոգիա: Դա եղել է բազմաթիվ քայլերից մեկը, որը մենք քննարկել ու ընդունել ենք: Պահի տակ, հա՛, այն ժամանակ էլ արագաչափեր փակում էինք և այլն, հիմա իրենք էլ են փակում արագաչափեր, ասենք, այդ կրկնությունը նույնիսկ մի տեսակ անհասկանալի է, էլի:

 – Այսինքն՝ ձեզ համար պարզ չէ՞, թե ինչու է, օրինակ՝ Գեղամ Մանուկյանը արագաչափ փակում:

– Անհասկանալի է, որովհետև եթե ինքն ուզում է դրանով ժողովրդի մասսա հավաքել, դա չի լինի, մարդիկ 2018-ին բոլորովին էլ արագաչափերի համար չէին հավաքվել: Մեկ հասարակ բան ասեմ ձեզ ու կխնդրեմ, որ ուշադիր լինեք ասածիս. երբ մենք քայլելով եկանք հասանք Երևան, այն ժամանակ ես վարչության անդամ էի, բազմաթիվ զանգեր էինք ստանում մարզերից, որ բնակիչներն ուզում են գալ Երևան, բայց խնդրում էին, որ իրենց ապահովենք տրանսպորտով կամ մեքենայի վառելիքի գումարը տայինք:

Մենք, չնայած կարող էինք մեզ նման բան թույլ տալ, բայց կատեգորիկ հրաժարվեցինք դրանից, որովհետև դա կլիներ կեղծ հավաք: Մենք հրաժարվում էինք այդպիսի բաներից ու մոտավորապես հետևյալն ասում. եթե դուք էլ եք գտնում, որ ինչ-որ բան այն չէ մեր երկրում, մի տուփ սիգարետ պակաս ծխեք, դրա գումարը տվեք ավտոբուսին, եկեք:

Իսկ հիմա մեր ընդդիմադիր գործընկերները փող են բաժանում, այդ ձևով չեն կարող առաջ գնալ: Ճիշտ է, կարող է այդ փողի շնորհիվ տեղային հաջողություններ ունենան, բայց դա կլինի լոկալ հաջողություն, ու ես իրենց, բնականաբար, հաջողություն չեմ ցանկանում իշխանություններին հեռացնելու գործում այն տարբերակով, որ իրենք են մտածում:

Պարո՛ն Աղազարյան, կարծում եք՝ եթե ընդդիմությունը շարունակի նման կերպ՝ չի՞ կարողանա ձեր քաղաքական թիմին հեռացնել իշխանությունից:

– Չեն կարող, որովհետև իշխանությունը շատ կուռ է ու բաղկացած է գաղափարի շուրջ հավաքված մարդկանցից, իսկ նման մարդկանց կոտրելը շատ դժվար է: Հնարավոր չէ այդ կերպ հեռացնել մի ուժի, որն ունի վստահություն իր գաղափարների ու թիմակիցների նկատմամբ:

Հանրությո՞ւնն էլ է համաձայն ձեր թիմի գաղափարներին:

– Չէ՛, ես կարծում եմ, որ հանրության շատ-շատ մարդիկ այս կամ այն հարցի շուրջ ունեն անհամաձայնություններ մեր նկատմամբ ու չեն գտնում, որ մեր քայլերը ճիշտ են, ու դա բնական է: Բայց հավաքական իմաստով, վերջնական, իրենք մեր որդեգրած ուղղությունը սատարում են:

Քրիստինե Աղաբեկյան

MediaLab.am