«Մեդիալաբի» հարցերին պատասխանում է «Քաղաքացիական պայմանագիր» կուսակցության վարչության փոխնախագահ, ԱԺ պատգամավոր Գևորգ Պապոյանը
– Պարո՛ն Պապոյան, «Անկախ դիտորդ» դաշինքը երեք աղբյուրներից ստացել է տեղեկատվություն, որ Սպիտակ համայնքի ղեկավար Քաջայր Նիկողոսյանը հանդիպումներ է ունեցել համայնքի բնակավայրերի վարչական ղեկավարների հետ և հրահանգել իրենց համայնքի հետ կապ ունեցող և Երևանում հաշվառված քաղաքացիներին հորդորել ավագանու ընտրություններին քվեարկել Տիգրան Ավինյանի և «Քաղաքացիական պայմանագրի» օգտին։ Ըստ այդ հրապարակման՝ այդ գործընթացը հրահանգել ու համակարգում եք դուք։
– Ես արդեն ասել եմ, որ հանդիպելու ենք դատարանում։ Շոշափվել է իմ ու կուսակցության անունը, ու, բնականաբար, պետք է պատասխան տրվի։ Չնայած հանգամանքին, որ այնտեղ որևէ հակաօրինական բան չի բացահայտվել, ամբողջովին եղել է քաղաքական խոսակցություն տվյալ անձի ու մեր կուսակից քաղաքական գործիչների հետ, այնուամենայնիվ, ես որևէ անձի չեմ հանձնարարել իմ անունից զանգեր իրականացնել, որևէ մեկից որևէ բան չեմ պահանջել, իմ անվան հետ են խաղացել ու նաև մեր կուսակցության, ու դա, իմ գնահատմամբ՝ զրպարտություն է, որի համար պետք է պատասխան տան։
– Բայց կան ձայնագրություններ, որոնցում զրուցակիցը հստակ ձեր անունն է տալիս, եթե չի եղել նման բան, ինչո՞ւ է ձեր անունը տալիս։
– Ա՛յ դա չեմ կարող ասել, մարդիկ կան, որոնք իմ անունը լսելիս հոգեխանգարմունքի մեջ են ընկնում, գուցե հենց դրա համար էլ իմ անունն են շրջանառել, բայց դա իմ քաղաքական գործունեությունը որևէ կերպ չի կարող դադարեցնել, ընդհակառակը՝ ես շատ ավելի ակտիվ, ավելի ուժեղ ու մեծ ջանքերով եմ աշխատելու ի շահ Հայաստանի ու «Քաղաքացիական պայմանագիր» կուսակցության գաղափարների տարածման, իսկ անհաջողակները թող շարունակեն նման աշխատանքով զբաղվել։
– Այսինքն՝ պնդում եք, թե ձեր կուսակցությունը Երևանի քաղաքապետի ընտրությունների համար վարչական ռեսուրս չի՞ կիրառում, ընտրողների ցուցակագրում չի՞ անում, ու այս հրապարակումը իրականությանը չի՞ համապատասխանում։
– Վարչական լծակի կիրառման մասին այնտեղ խոսք անգամ չկա, զանգում հարցնում է՝ ցուցակները կազմե՞լ եք, ասում է՝ ի՞նչ ցուցակ, ասում է՝ դե, որ ձեզ ասել են: Պատասխանը լինում է այն, որ ինձ ոչ մեկը չի ասել ցուցակ կազմիր, այդտեղ վարչական լծակի կիրառում կա՞։ Հարցնում է՝ ձեր կուսակից ընկերներին, հարազատներին չե՞ք հորդորելու, ասում է՝ առանց հորդորելու էլ իրենք ընտրելու են ՔՊ, դա վարչական լծա՞կ է։
Ավելին ասեմ, ես նորմալ եմ վերաբերվում նրան, որ իմ կուսակից ընկերները հորդորեն իրենց հարազատներին ընտրել իրենց գաղափարակից կուսակցությանը, և շատ շնորհակալ եմ բոլորին դրա համար, բայց, ցավոք սրտի, ես իմ ընկերներին նման բան չեմ ասել, բայց հնարավոր է ասեմ, ինչը շատ նորմալ է:
Դա քաղաքականություն է, որովհետև ես քաղաքական գործիչ եմ, համայնքի ղեկավարը քաղաքական գործիչ է, մեր տարածքային կառույցի ղեկավարն է, վարչական շրջանների ղեկավարները քաղաքական գործիչներ են: Մեր տարածքային խորհրդի անդամները, նրանք աշխատանքից դուրս՝ ոչ աշխատանքային ժամին ու ոչ աշխատանքի օրերին կարող են զբաղվել քաղաքականությամբ, ու ես ողջունում եմ իմ ընկերների՝ քաղաքականությամբ զբաղվելու ջանքերը։
– Իսկ ինչո՞վ է պայմանավորված, որ մարդիկ ձեր անունը լսելիս, ինչպես ասացիք՝ հոգեխանգարմունքի մեջ են ընկնում, պարո՛ն Պապոյան։
– Դե երևի նրանից է, որ տվյալ մարդիկ անհաջողակներ են, հստակ պատճառը չեմ կարող ասել, ես իմ պետության, իմ ժողովրդի համար շատ բաց ճակատով, ուղիղ խոսելով գնում եմ առաջ, միգուցե ոմանց իմ խոսելը դուր չի գալիս: Օրինակ՝ վերջերս «Հայաքվեի» կողմից մեծ հարձակման էի ենթարկվել, որովհետև իմ հարցազրույցներից հետո իրենց ստորագրահավաքի տեմպերը, իմ տեղեկություններով, մի քանի անգամ ընկել է։
Կան նման բազմաթիվ շրջանակներ, որոնց վրա իմ քաղաքական խոսքն ազդեցություն է ունենում, ու, բնականաբար, այդ մարդիկ իմ ելույթները լսելիս, քաղաքական գործունեությունը տեսնելիս որոշակի ցնցումների մեջ են ընկնում, բայց դրան նորմալ եմ վերաբերվում։
– Եթե վստահեցնում եք, որ այդ ամենը իրականությանը չի համապատասխանում, ապա մեր գործընկերներն ի՞նչ նպատակով պետք է նման բան հրապարակեին։
– Ենթադրում եմ, որ փորձել վարկաբեկել «Քաղաքացիական պայմանագիր» կուսակցությանը և ինձ, բայց իմ գնահատմամբ ու նաև բազմաթիվ նամակներ եմ ստանում, նաև տեսնում եմ արձագանքները, կարծում եմ, որ շատ լավ փիար էր մեր կուսակցության համար, որովհետև ցույց տվեց, որ մենք ցուցակագրումով չենք զբաղվում, զբաղվում ենք մաքուր քաղաքական գործընթացներով, մաքուր քաղաքականությամբ ու հենց այդպես էլ տանելու ենք հաղթանակ առաջիկա ընտրություններում։
– Արդեն դիմե՞լ եք դատարան, ի՞նչ հոդվածով եք դիմելու, զրպարտությա՞ն։
– Իրավաբանն այժմ զբաղվում է այդ հարցով։ Մենք խնդիր ենք տեսնում եզրակացության մեջ, խնդիր չենք տեսնում զանգելու մեջ և զանգելն ենք համարում նորմալ և մեր գործընկերների պատասխանները, այնտեղ ամեն ինչ նորմալ է: Եզրակացությունը, որ ասվում է, թե իմ հրահանգով ՔՊ-ն զբաղվում է վարչական լծակների օգտագործմամբ, դա է խնդիրը։ Այդտեղ տեսնում ենք զրպարտություն ու մեր բարի համբավին հասցված վնաս։
– Ինչպես համոզված եք, որ առաջիկա ընտրություններին հաղթելու եք, նույնպես էլ համոզված եք, որ դատարանում և՞ս հաղթելու եք այս գործով։
– Ես Հայաստանի դատարանների վրա ոչ մի վստահություն չունեմ, մեր ժողովրդի իմաստությանը չեմ կասկածում։ Հայաստանի դատարանները որևէ կերպ չեն ենթարկվում Հայաստանի իշխանություններին, ընդհակառակը՝ շատ հաճախ տեսնում ենք հակառակ որոշումներ, հետևաբար որևէ կերպ չեմ խառնվելու այդ գործընթացներին: Իրավական գործընթաց է, կգնա, կտեսնենք՝ ինչ կլինի, բայց մեր ժողովրդի իմաստությանն ու վճռականությանը չեմ կասկածում։
Քրիստինե Աղաբեկյան
MediaLab.am
