«Մեդիալաբի» հարցերին պատասխանում է «Անվտանգություն և ժողովրդավարություն» ՀԿ նախագահ, նախկին պատգամավոր Նաիրա Զոհրաբյանը
– Տիկի՛ն Զոհրաբյան, երկրորդ օրն է, ինչ խորհրդարանում է գլխավոր դատախազը՝ միջնորդությամբ, որ պատգամավորներ Հովիկ Աղազարյանին ու Տարոն Մարգարյանին զրկեն անձեռնմխելիությունից: Իշխող խմբակցությունն էլ արդեն որոշել է, որ միջնորդությունը երկուսի դեպքում էլ բավարարելու է: Ինչպե՞ս եք գնահատում կատարվողը:
– Այն, ինչ կատարվում է Հովիկ Աղազարյանի հանդեպ, ուղղակի թրաֆիքինգի դրսևորում է, իսկ ինչ արվում է Տարոն Մարգարյանի հանդեպ՝ քաղաքական հետապնդում: Ինչո՞ւ ընտրեցին Հովիկ Աղազարյանին՝ սեփական թիմակցին, որը Հիսուսին սկսեց հավատալ Նիկոլ Փաշինյանին ճանաչելուց հետո, սկսեցին նրան ենթարկել բուլինգի, հրապարակային նվաստացման, որովհետև Հովիկ Աղազարյանը հանդգնեց շեղվել, ինչպես ինքն է վերջին եթերներում ասում՝ Նիկոլին աստվածացնելու ՔՊ-ական գծից:
Այն, ինչ հիմա կատարվում է խորհրդարանում, եթե լիներ նախկին որևէ իշխանության օրոք, երբ մարդու անձնական կյանքը, նամակագրությունը, խախտելով իրավական բոլոր նորմերը, իրավապահ համակարգը դներ երկրի ղեկավարի սեղանին, նա էլ պատճեներ ու բաժաներ սեփական կուսակիցներին ու մարդուն ենթարկեին հանրային պարսավանքի, ապա վստահեցնում եմ ձեզ, որ ԵՄ դեսպանները մեկը մյուսի հետևից հայտարարություն կընդունեին, իսկ Եվրոպայի խորհրդի խորհրդարանական վեհաժողովում Հայաստանի հարցով համազեկուցողները հատուկ չարթերային թռիչքով կգային Երևան ու սա կհամարեին ուղղակիորեն մարդու իրավունքների կոպիտ ոտնահարում:
Ես չգիտեմ՝ Հովիկ Աղազարյանը 300 հազար դոլար կաշառք պահանջել է, թե չէ մանր կամ խոշոր եղջերավոր անասուններ արտահանելու համար, բայց եթե նա ենթարկվեր ՔՊ-ի ներքին կանոններին՝ Նիկոլին աստվածացնելու ծիսակարգին, կամավոր վայր դներ մանդատը, հավատացնում եմ ձեզ, որ խոշոր եղջերավոր անասունները շատ ապահով կանցնեին Հայաստան-Իրան սահմանը:
Ինչ վերաբերում է Տարոն Մարգարյանին. այդ գործին ես ծանոթ եմ, դրա հետ կապված մի քանի անգամ գործ հարուցեցին, հետո կարճեցին, հիմա, որպեսզի այն վաղեմության ժամկետի տակ չընկնի՝ կողքից տարբեր անհեթեթություններով ծաղկացրել են: Սա սովորական քաղաքական հետապնդում է, իսկ Նիկոլ Փաշինյանը նորից զարկ է տվել այս գործիքակազմին, որովհետև գնալով Ալիևի պահանջած բոլոր զիջումներին, միևնույն է, Ալիևը հրաժարվում է ստորագրել խաղաղության պայմանագիր, իսկ այսօր Ալիևի հատուկ ներկայացուցիչ Ամիրբեկովը վերջին ուլտիմատումը ներկայացրեց, որ Սահմանադրությունը փոխելու համար դուք շատ քիչ ժամանակ ունեք:
Փաշինյանը հասկացել է, որ Հայաստանի ինքնիշխանության հաշվին իր բոլոր զիջումները Ալիևից չեն կորզել այդ երանելի ստորագրությունը, որ ուտացնի «խաղաղություն» բառն իր էլեկտորատին, ու այն թուղթը, որի վրա ընդամենը գրված է «խաղաղություն», իսկ ամբողջ բովանդակությունը Հայաստանի Երրորդ հանրապետության մահվան մասին է, ուտացնելով իր էլեկտորատին, հերթական կամ արտահերթ ընտրություններով ապահովի իր վերարտադրությունը:
Ինքն արդեն հասկացել է, որ տոտալ բանկրոտ է, ու դա մենք առաջիկայում կտեսնենք Գյումրիում, այսօր էլ արդեն ահազանգեր կան, որ ընդդիմադիր թեկնածուների շտաբներ է մտնում, ինքը փորձելու է տեռորով իրենց Սարիկին անցկացնել, պետք լինի, ես հստակ կարող եմ կանխատեսել, որ կալանավորելու է թե՛ Վարդան Ղուկասյանին, թե՛ Մարտուն Գրիգորյանին, միևնույն է, սա թակարդն ընկած գազանի, որի գաստրոլը երեկ ԱԺ-ում տեսանք, վերջին թպրտոցներն են, դրանում ավելի քան վստահ եմ:
– Կարծում եք, որ այս ամենի հիմնական պատճառն այն է, որ չի՞ կարողացել այդ խաղաղության փաստաթղթի ստորագրմանը հասնել:
– Միանշանակ, հիմա ինքը փորձելու է տեռորով ապահովել իր վերարտադրությունը՝ անկախ նրանից՝ Գյումրիում կպարտվի, թե չէ, իմ տպավորությամբ, փորձելու է գնալ արտահերթ ընտրությունների, բայց ավելի քան վստահ եմ, որ դա չի հաջողվելու, որովհետև Նիկոլ Փաշինյանի բոլոր աշխարհաքաղաքական տերերից՝ Ռուսաստան, Արևմուտք, այսօր մնացել են միայն Ալիևն ու հիմնականում Էրդողանը:
– Տիկի՛ն Զոհրաբյան, դուք ասում եք՝ նախկիններ, բայց այս իշխանությունն ասում է, որ ինչ անում են՝ օրենքով են անում, նույն ՔՊ խմբակցության ղեկավար Հայկ Կոնջորյանն այսօր խորհրդարանում Հովիկ Աղազարյանին ասաց՝ «Պատկերացնո՞ւմ եք, որ Քոչարյանի ժամանակ լինեիք պատգամավոր, ինչ կլիներ ձեզ հետ»:
– Ես նայել եմ Նյուրենբերգյան դատավարության այն վավերագրական կադրերը, երբ հրեա ժողովրդի ցեղասպանության համար մեղադրվող գազախցիկներն աշխատեցնող նացիստները փորձում էին իրենց գործողությունները տեղավորել այն ժամանակ գործող Գերմանիայի օրենսդրության մեջ: Այնպես որ, ՔՊ-ականների անկանոն շարժումները, որ իրենք ինչ անում են՝ օրենքով են անում, ինձ ուղղակիորեն հիշեցնում է այդ շատ հայտնի զուգահեռը:
– Իշխանությունը այս վարքով, լրագրողների նկատմամբ նաև դրսևորվող վարքով, ինչ-որ բանի հասնելո՞ւ է:
– Ոչ մի բանի: Երբ նայում ենք բոլոր փոքրիկ բռնապետիկների պաշտոնավարման էվոլյուցիան, տեսնում ենք, որ այն պահին, երբ իրենք մոտ են իշխանությունը կորցնելուն, այսպես գազազում են: Ինչքան Նիկոլ Փաշինյանը գնա այս կարգի քաղաքական ռեպրեսիաների, լրագրողների հանդեպ այդ կատաստրոֆիկ անընդունելի պահվածքը, այնքան ստախանովյան քայլերով մոտեցնելու է իր իշխանության ավարտը, իրեն այլևս ոչինչ չի փրկի:
Քրիստինե Աղաբեկյան
MediaLab.am
