«Մեդիալաբի» հարցերին պատասխանում է ՀՀ ԳԱԱ մոլեկուլային կենսաբանության ինստիտուտի տնօրեն Արսեն Առաքելյանը
– Պարո՛ն Առաքելյան, արդեն հայտնի է, որ սկսվել է կորոնավիրուսի թեստերի արտադրությունը, նախարարն այսօր ներկայացրեց։ Կարո՞ղ եք ասել, թե օրական քանի թեստ է արտադրվում:
– Առայժմ մենք դեռ սպասում ենք փորձարկումների պաշտոնական արդյունքների վերաբերյալ պատասխանին: Իսկ օրական կարտադրենք այնքան, որքան ամենասկզբում նշել էինք՝ 2 հազար թեստ:
Այս պահին արդեն ունենք արտադրված 2 հազար թեստ: Ըստ առողջապահության նախարար Արսեն Թորոսյանի հայտարարության՝ փորձարկումների արդյունքները դրական են, բայց մենք դեռ պաշտոնական գրությունը չենք ստացել, սպասում ենք այդ պատասխանին:
– Սա միայն պետակա՞ն պատվերով արվող հետազոտությունների համար են:
– Այո՛, մենք միայն պետպատվերի շրջանակում ենք գործում, մասնավորներից առաջարկ չենք էլ կարող ունենալ, որովհետև օգտագործում ենք կառավարության տրամադրած նյութերը:
– Նախարարը նշել է, որ սա մեծ առաջընթաց է մեր բժշկագիտության և հիմնարար գիտությունների համար: Հաշվի առնելով այս ձեռքբերումը՝ հնարավո՞ր է, որ դրսից նաև պատվերներ լինեն:
– Առայժմ կդժվարանամ այդ հարցին պատասխանել, որովհետև մենք մեր առջև նմանատիպ խնդիր չենք դրել: Հետագայում գուցե այդ մասին նույնպես խոսք լինի, հիմա ժամանակ էլ չունենք դրա մասին մտածելու:
– Կառավարության կողմից ձեռք բերված նյութերը, որոնք անհրաժեշտ են թեստեր արտադրելու համար, մոտավորապես քանի՞ թեստ արտադրելու համար է:
– Մոտավորապես 100 հազար թեստի համար է: Եթե հետագայում կառավարությունն անհրաժեշտություն տեսնի, ընդլայնման թեման կարող է քննարկվել: Առայժմ դրա մասին խոսք չի եղել:
– Այս թեստերի արդյունքների սխալի հավանականությունը որքա՞ն է:
– Մեր ինստիտուտում փորձարկումների ընթացքում պարզ է դարձել, որ մեր թեստերը իրենց պահում են նույն ձևով, ինչպես այսօր Հայաստանում օգտագործվող այլ թեստեր:
Մենք փորձարկումների ժամանակ կոնկրետ անձանցից նմուշառում չենք կատարում, աշխատում ենք արդեն անջատված ԴՆԹ-ի հետ: Այո՛, աշխատում ենք նույն կերպ, ինչպես մնացած թեստերի դեպքում է:
– Իսկ լաբորատոր հետազոտությունները ձեր ինստիտո՞ւտն է իրականացնում:
– Մենք լաբորատոր հետազոտություններ չենք անում, որովհետև կլինիկական ախտորոշիչ լաբորատորիա չենք: Մենք փորձարկում ենք թեստերի աշխատանքը:
Այդ փորձարկումները ցույց տվեցին, որ թեստերը նորմալ աշխատում են, ճիշտ այնպես, ինչպես մնացած թեստերը, որոնք ներկրվել են: Մեր թեստերը սովորական թեստեր են, որոնք նախատեսված են քթից, կոկորդից նմուշառումով վիրուսի հայտնաբերման համար:
– Կառավարությունը նախնական հատկացված գումարն ավելացրե՞լ է, թե՞ եղածը բավականացրել է:
– Մենք այժմ կառավարությունից ստացել ենք 250 հազար դոլարի նյութեր ու պարագաներ:
– Քանի՞ մարդ է աշխատում թեստերի արտադրության վրա:
– Մոտ 20 մարդ:
Մանե Հարությունյան
MediaLab.am