Ծառուկյանն անցնում է մի շարք քրեական գործերով, և նրա հայտարարությունները պաշտպանական մարտավարության մի մաս է, ոչ ավելին. քաղաքագետ

Հեղինակ MediaLab

«Մեդիալաբի» հարցերին պատասխանում է քաղաքագետ, «Հանուն հանրապետության» քաղաքական նախաձեռնության անդամ Ռուբեն Մեհրաբյանը

– ԲՀԿ առաջնորդ Գագիկ Ծառուկյանը հայտարարել է, որ մարզերում մեկնարկում են իրենց կառույցների հետ հանդիպումների շարքը, և արդեն նախօրեին Կոտայքի մարզի կառույցի հետ հանդիպմանը հանդես եկավ մի շարք հայտարարություններով՝ անդրադառնալով ոլորտային խնդիրների՝ մշակույթ, կրթություն:

Ինչպե՞ս եք գնահատում այս հայտարարությունները՝ հաշվի առնելով, որ մինչ այդ ԲՀԿ-ն հայտարարում էր, թե պահանջում է կառավարության հրաժարականը, իսկ հիմա ոլորտային քննադատությամբ է հանդես գալիս:

– Տեղի է ունենում հետևյալը. պարոն Ծառուկյանն անցնում է մի շարք քրեական գործերով, և այս քաղաքական հայտարարությունները պետք է դիտարկել որպես այդ քրեական գործերի շրջանակում նրա պաշտպանական մարտավարության մի մասը և ոչ ավելին: Այսինքն՝ այդ իբր քաղաքական հայտարարությունները քաղաքական բովանդակություն չունեն: 

Ո՛չ կառավարության հրաժարականի պահանջն էր քաղաքական բովանդակություն ունեցող, ո՛չ էլ այս վերջին հայտարարությունները: Ուղղակի նորամուծություններով փորձում է հետաքրքրություն պահել, բայց ոչ ավելին:

– Ընդդիմադիր շատ ուժեր հայտարարում են, որ իշխանությունն արտակարգ դրությունը պահպանում է, որ իրենք հանրահավաքներ չանեն: Հիմա, երբ հանրահավաքների արգելքը հանվել է, ի՞նչ զարգացումներ կարող են լինել:

– Ոչ մի, դրանք լինելու են փոթորիկ մեկ բաժակ ջրում, ոչ ավելին: 

– ԲՀԿ-ն, ՀՅԴ-ն ու Վանեցյանի «Հայրենիք» կուսակցությունները միավորվել ու քննարկումներ են անցկացնում, նշում են, որ պետք է չեղարկել դիմակների հետ կապված տուգանքները: Այս ուժերը նաև այլ ուժերի հետ ամենալայն համախմբման դեպքում որևէ շանս ունե՞ն, թե՞ ոչ:

– Այսօր նրանք փորձում են ժողովրդահաճո հայտարարություններ անել՝ փորձելով դուր գալ ժողովրդին: Գուցե ինչ-որ մի մասն էլ զուտ մերկանտիլ նկատառումներից ելնելով՝ կարողանա դաշնակից գտնել, բայց դա լինելու է մի շատ փոքր խումբ, որը այսօրվա առկա իրերի դասավորության մեջ որևէ բան չի կարող փոխել:

– Ըստ էության դրական չէ՞, որ հանրահավաք են ուզում անել, ի վերջո, կտեսնեն իրենց ունեցած կշիռը հանրության մեջ:

– Ես չեմ կարծում, որ իրենց կշիռը հանրահավաքով պետք է երևա: Նրանց կշիռը հայտնի դարձավ 2018 թվականին, և այդ կշռի մեջ որևէ բան փոխվելու հնարավորություն չեմ տեսնում: 

– Եթե նրանք հանրահավաք կազմակերպեն, կարծում եք՝ հասարակությունը լրիվ անտարբե՞ր կլինի:

– Մեծ հաշվով՝ այո՛: 

– Այսինքն՝ նրանք իրենց քաղաքական հաշվարկներում սխա՞լ են:

– Ես չգիտեմ: Նրանք սխալ են մի բանում, որ շարունակում են զբաղվել քաղաքականությամբ, որն իրենց մոտ նախևառաջ չի ստացվում: Երկրորդ՝ նրանք քաղաքականության մեջ անելիք չունեն:

– Կարծիք է հնչում, որ այս իշխանության մեղավորությունն է, որ ԲՀԿ-ն այսօր ներկայացված է խորհրդարանում: Դուք իշխանության մեղավորությունն այստեղ տեսնո՞ւմ եք: 

– Մասամբ եմ տեսնում, որ նախկին ռեժիմին քաղաքական գնահատական չի տրվել, և երկրորդ՝ արդեն 2,5 տարի է անցել, իսկ մեր դատական համակարգը շարունակում է մնալ նախկին իշխանությունների գործած հանցագործությունների հանցակիցը:

– Ինչո՞ւ իշխանությունը չգնաց ավելի կոշտ քայլերի:

– Ես չունեմ դրա պատասխանը: Կարծում եմ՝ այստեղ ավելի շատ ոչ թե քաղաքական կամքի խնդիր է, այլ վարչարարական շատ մեծ թերություն:

– Ձեզ համար տարակուսելի չէ՞, որ կրթական համակարգից կամ դրա բացերից խոսում է Գագիկ Ծառուկյանը:

– Հարցը հռետորական է, որը հնչում է բավականին զվարճալի: 

– Շատերն ասում են, որ դա անարգանք է կրթությանն ու գիտությանը:

– Դա արդեն մեկնաբանության հարց է: 

– Այս փուլում Հայաստանում կարո՞ղ են արտահերթ գործընթացներ լինել, թե՞ դուք դրանք բացառում եք:

– Մենք գիտենք, որ Հայաստանում նոր Սահմանադրություն է նախապատրաստվում, երբ այն կհաստատվի և կմտնի ուժի մեջ, գուցե այդ ժամանակ դրան հաջորդեն ինչ-որ արտահերթ գործընթացներ կամ չհաջորդեն: Բայց դրանից շուտ ես արտակարգ գործընթացների համար հիմքեր չեմ տեսնում:

– Եթե հաշվի առնենք, որ նոր Սահմանադրության նախագիծը 2022 թվականից շուտ պատրաստ չի լինի, կարո՞ղ ենք արձանագրել, որ գործ ենք ունենալու հերթական խորհրդարանական ընտրությունների հետ:

– Եթե արտահերթ գործընթացների մասին կարող է խոսվել, ապա դա կարող է լինել միայն Սահմանադրության ընդունումից հետո:

Մանե Հարությունյան

MediaLab.am