Պաշտպանության նախկին նախարար Դավիթ Տոնոյանի փաստաբան Սերգեյ Հովհաննիսյանը չի մանրամասնում իրենց տարածած հայտարարության բովանդակությունը, սակայն խոստանում է՝ առաջիկայում նոր հայտարարություն ևս լինելու է:
«Այն, ինչ փորձել ենք ասել, հայտարարությամբ արդեն նշվել է, ավելին չեմ կարող ասել: Առաջիկայում նոր հայտարարություն ևս տարածելու ենք, այնտեղ մանրամասներ կնշվեն», -«Մեդիալաբի» հետ զրույցում ասաց փաստաբան Հովհաննիսյանը:
Նկատենք՝ այսօր ավելի վաղ Տոնոյանի փաստաբանը հայտարարություն էր տարածել՝ նշելով. ««ՀՀ պաշտպանության նախարարի պաշտոնից ազատվելուց հետո պարոն Տոնոյանը ձեռնպահ է մնացել մեկնաբանություններից՝ հաշվի առնելով պետական գաղտնիքը, ՀՀ ազգային անվտանգության եւ միջպետական հարաբերությունների շահերը: Այսօր եւս պարոն Տոնոյանն այդ շահերը վեր է դասում սեփական շահերից եւ տիրապետելով տեղեկատվության մեծ ծավալի՝ այն չի օգտագործում հանրային տիրույթում սեփական պաշտպանության համար: Պարոն Տոնոյանը վստահ է, որ հատուկ մասնագիտական գիտելիքներ ունեցող անձանց կողմից կատարված փորձաքննության արդյունքները փաստարկված եւ անաչառ պատասխաններ կտան ՀՀ զինված ուժերի համար «անորակ» եւ «տեխնիկական նորմերին չհամապատասխանող» զենք-զինամթերքի մասին պնդումներին»,- նշված է հայտարարության մեջ:
Փաստաբանական խումբը վստահեցնում է, որ Դավիթ Տոնոյանը պայքարելու է հանուն արդարության, իր անմեղության եւ բարի համբավի վերականգման համար»:
Հարցին, թե ի՞նչ բովանդակությամբ է լինելու նրա հաջորդ սպասվող հայտարարությունը, Սերգեյ Հովհաննիսյանը հրաժարվեց որևէ բան ասել:
Փաստաբանի տեղեկացմամբ, Դավիթ Տոնոյանի մասնակցությամբ նախաքննական մարմինը քննչական որևէ գործողություն չի իրականացրել: Ինչ վերաբերում է մեղադրանքին, ապա Հովհաննիսյանն ասաց, որ իր պաշտպանյալը կտրականապես համաձայն չէ դրա հետ: Նրանք համաձայն չեն նաև Տոնոյանին կալանավորելու վերաբերյալ դատարանի որոշման հետ, որի դեմ արդեն վերաքննիչ բողոք ներկայացվել է: «Այս պահի դրությամբ հայտնի չէ բողոքի քննության օրը», -նշեց պաշտպանը:
Հիշեցնենք՝ Դավիթ Տոնոյանը մեղադրվում է պաշտպանության նախարարությանը ռազմամթերքի մատակարարման գործընթացում չարաշահում կատարելու առթիվ քննվող գործով:
Մասնավորապես, ԱԱԾ-ի հաղորդագրության համաձայն՝ Դավիթ Տոնոյանը և Դավիթ Գալստյանը (Պատրոն Դավո) մեղադրվում են առանձնապես խոշոր չափերով՝ 2,277,323,840 ՀՀ դրամ գումար հափշտակելու և կեղծիքներ, հանրորեն վտանգավոր արարքներ կատարելու համար:
MediaLab.am
